ಐ.ಟಿ. ಕಚೇರಿ ದಾಳಿ ಆರೋಪಿಗಳ ಬಂಧನ:ಪೊಲೀಸ್‌ ಆಯುಕ್ತರಿಗೆ ಬಿಜೆಪಿ ಮನವಿ

ಮಹಾನಗರ:  ಸಚಿವ ಡಿ.ಕೆ.ಶಿವಕುಮಾರ್‌ ಅವರ ಮೇಲೆ ನಡೆದ ಐ.ಟಿ. ದಾಳಿಯನ್ನು ಖಂಡಿಸಿ ಮಂಗಳೂರಿನಲ್ಲಿ ಯುವ ಕಾಂಗ್ರೆಸ್‌ ಕಾರ್ಯಕರ್ತರು ನಗರದ ಆದಾಯ ತೆರಿಗೆ ಕಚೇರಿಗೆ ಮುತ್ತಿಗೆ ಹಾಕಿ ಸರಕಾರಿ ವಸ್ತುಗಳನ್ನು ಹಾನಿ ಮಾಡಿರುವುದರ ವಿರುದ್ಧ ಕ್ರಮ ಜರಗಿಸಬೇಕು ಎಂದು  ಜಿಲ್ಲಾ ಬಿಜೆಪಿ  ವತಿಯಿಂದ ಪೊಲೀಸ್‌ ಆಯುಕ್ತರಿಗೆ ಮನವಿ ನೀಡಲಾಯಿತು.

ಘಟನೆಯ ಸಂದರ್ಭದ ಛಾಯಾಚಿತ್ರಗಳು ಪೊಲೀಸ್‌ ಮತ್ತು ಮಾಧ್ಯಮಗಳಲ್ಲಿ ಲಭ್ಯವಿದ್ದು ಆರೋಪಿಗಳನ್ನು ಸುಲಭವಾಗಿ ಗುರುತಿಸಬಹುದಾಗಿದೆ. ಆರೋಪಿ ಗಳು ನಗರದೆಲ್ಲೆಡೆ ರಾಜಾರೋಷವಾಗಿ ಓಡಾಡಿಕೊಂಡಿದ್ದರೂ ಪೊಲೀಸರಿಗೆ ಸಿಗದಿರುವುದು ವಿಪರ್ಯಾಸ. ಆದ್ದರಿಂದ ಪೋಲಿಸ್‌ ಇಲಾಖೆ ಈ ದೂರನ್ನು ಗಂಭೀರವಾಗಿ ಪರಿಗಣಿಸಿ, ಯಾವುದೇ ರಾಜಕೀಯ ಒತ್ತಡಕ್ಕೆ ಒಳಗಾಗದೆ ಆರೋಪಿಗಳನ್ನು ತತ್‌ಕ್ಷಣ ಬಂಧಿಸಿ, ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿ ಮಾಜಿ ವಿಧಾನ ಪರಿಷತ್‌ ಸದಸ್ಯರಾದ ಮೋನಪ್ಪ ಭಂಡಾರಿ ಮತ್ತು ಮಂ.ನಗರ.ದಕ್ಷಿಣ ಮಂಡಲದ ಅಧ್ಯಕ್ಷ  ವೇದವ್ಯಾಸ್‌ ಕಾಮತ್‌ ಮೊದಲಾದವರು ಮನವಿ ಸಲ್ಲಿಸಿದರು.

ಈ ಸಂದರ್ಭದಲ್ಲಿ ನಿತಿನ್‌ ಕುಮಾರ್‌, ಜಿಲ್ಲಾ ಉಪಾಧ್ಯಕ್ಷ ರವಿಶಂಕರ ಮಿಜಾರ್‌, ಜಿಲ್ಲಾ ವಕ್ತಾರ  ಜಿತೇಂದ್ರ ಕೊಟ್ಟಾರಿ, ಮಂಡಲದ ಉಪಾಧ್ಯಕ್ಷ ಶ್ರೀನಿವಾಸ್‌ ಶೇಟ್‌, ಹಿಂದುಳಿದ ವರ್ಗದ ಮೋರ್ಚಾದ ಸದಾನಂದ ನಾವುರ ಉಪಸ್ಥಿತರಿದ್ದರು.