ಮಂಗಳನಲ್ಲಿ ನೀರಿನ ಕೊಳ!

ಹೊಸದಿಲ್ಲಿ: ಮಂಗಳನಲ್ಲಿ ನೀರಿನ ಕುರುಹು ಇದೆಯೇ ಎಂದು ದಶಕಗಳಿಂದಲೂ ಸಂಶೋಧನೆ ನಡೆಯುತ್ತಿದೆ. ಈವರೆಗೂ ಹಲವು ಬಾರಿ ನೀರಿನ ಕುರುಹು ಕಂಡುಬಂದಿದೆಯಾದರೂ ಅದನ್ನು ಸಾಬೀತುಪಡಿಸುವ ಅಥವಾ ಸಾಕ್ಷೀಕರಿಸುವ ಯಾವುದೇ ಪುರಾವೆ ಲಭ್ಯವಾಗಿರಲಿಲ್ಲ. ಆದರೆ ಈ ಬಾರಿ ಮಂಗಳನಲ್ಲಿ ಸುಮಾರು 82 ಕಿ.ಮೀ ಅಗಲದ ಹಾಗೂ 2 ಕಿ.ಮೀ ಆಳದ ಕೆರೆಯೊಂದು ಇರುವುದು ತಿಳಿದುಬಂದಿದೆ.

ಯುರೋಪಿಯನ್‌ ಸ್ಪೇಸ್‌ ಏಜೆನ್ಸಿಯು ಈ ಚಿತ್ರವನ್ನು ಬಿಡುಗಡೆ ಮಾಡಿದ್ದು, ಮಾರ್ಸ್‌ ಎಕ್ಸ್‌ಪ್ರೆಸ್‌ ನೌಕೆ ಈ ಚಿತ್ರವನ್ನು ಸೆರೆಹಿಡಿದಿದೆ. ಈ ಕೆರೆಯನ್ನು ಕೊರೊಲೆವ್‌ ಎಂದು ಕರೆಯಲಾಗಿದೆ. ಇದರಲ್ಲಿ ಹಿಮಗಡ್ಡೆಯಿದ್ದು, ಇದರ ಮೇಲಿನ ಪದರವನ್ನು ಕೋಲ್ಡ್‌ ಟ್ರಾಪ್‌ ಎಂದು ಗುರುತಿಸಲಾಗಿದೆ. 

ಅಂದರೆ ಇದು ಕೆಳಭಾಗದಲ್ಲಿನ ಮಂಜುಗಡ್ಡೆಯ ವಾತಾವರಣದ ಉಷ್ಣತೆಯಿಂದ ಕರಗದಂತೆ ತಡೆಯುತ್ತದೆ. ಹೀಗಾಗಿ ಈ ಕೆರೆಯು ಎಂದಿಗೂ ಹಿಮದ ರೂಪದಲ್ಲಿಯೇ ಇರುತ್ತದೆ. 2003 ರಲ್ಲಿ ಉಡಾವಣೆ ಮಾಡಲಾಗಿರುವ ಮಾರ್ಸ್‌ ಎಕ್ಸ್‌ಪ್ರೆಸ್‌ನ ಮಹತ್ವದ ಸಂಶೋಧನೆ ಇದಾಗಿದ್ದು, ಇದರಿಂದ ನೀರಿನ ಮೂಲ ಹುಡುಕುವ ವಿಜ್ಞಾನಿಗಳಿಗೆ ಇನ್ನಷ್ಟು ಸಾಧ್ಯತೆಗಳನ್ನು ತೆರೆದಿಟ್ಟಿದೆ.