Manipal: ಅಪಘಾತ ತಡೆಯಲು ಹೀಗೆ ಮಾಡಿ!

ಮಣಿಪಾಲ: ರಾ.ಹೆ.169ಎ ಮಣಿಪಾಲದಿಂದ ಪರ್ಕಳಕ್ಕೆ ಹೋಗುವಾಗ ಸಿಗುವ ಈಶ್ವರ ನಗರದ ಪಂಪ್‌ ಹೌಸ್‌ ಎದುರು ಪದೇಪದೆ ಅಪಘಾತ ನಡೆಯುತ್ತಿದ್ದು, ಇದನ್ನು ತಡೆಯಲು ತುರ್ತಾಗಿ ಏನಾದರೂ ಕ್ರಮಗಳನ್ನು ಕೈಗೊಳ್ಳಲೇಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.

ಭೂಸ್ವಾಧೀನ ಸಹಿತ ಕಾನೂನು ತೊಡಗಿನಿಂದಾಗಿ ಸದ್ಯಕ್ಕೆ ಈಶ್ವರ ನಗರದಿಂದ ಪರ್ಕಳವನ್ನು ಸಂಪರ್ಕಿಸುವ ಹೆದ್ದಾರಿ ಕಾಮಗಾರಿಗೆ ತಡೆಯಾಗಿದೆ. ಈಗ ಈಶ್ವರನಗರದವರೆಗೆ ನೇರವಾದ ಚತುಷ್ಪಥ ರಸ್ತೆ ಇದೆ. ಮುಂದಿನ ಹೊಸ ರಸ್ತೆ ಕಾಮಗಾರಿಯೂ ಇದೇ ನೇರದಲ್ಲಿ ನಡೆಯಬೇಕಾಗಿದೆ. ಆದರೆ, ಜಾಗ ಬಿಟ್ಟುಕೊಡದ ಕಾರಣ ಅಲ್ಲಿಂದ ಬಲಕ್ಕೆ ಡೈವರ್ಷನ್‌ ಪಡೆದು ಇಳಿಜಾರಿನಲ್ಲಿ ಇಳಿದು, ಮೇಲೆ ಹತ್ತಿ ಹೊಸ ಮಾರ್ಗವನ್ನು ಸಂಪರ್ಕಿಸಬೇಕು. ಮಣಿಪಾಲದಿಂದ ಈಶ್ವರನಗರ ಮೂಲಕ ಸಾಗುವ ರಸ್ತೆಯಲ್ಲಿ ವೇಗವಾಗಿ ಸಾಗುವ ವಾಹನಗಳಿಗೆ ಒಮ್ಮಿಂದೊಮ್ಮೆ ಡೈವರ್ಷನ್‌ ಇರುವುದು ಅರಿವಿಗೆ ಬಾರದೆ ನೇರವಾಗಿ ಸಾಗಿ ಅಲ್ಲಿರುವ ಪಂಪ್‌ ಹೌಸ್‌ಗೆ ಡಿಕ್ಕಿ ಹೊಡೆಯುವುದು, ಪಲ್ಟಿ ಹೊಡೆಯುವುದು ನಡೆಯುತ್ತಿದೆ. ಈ ವರ್ಷದಲ್ಲೇ 9 ಕಾರುಗಳು ಡಿಕ್ಕಿ ಹೊಡೆದು ಹಲವಾರು ಮಂದಿ ಗಾಯಗೊಂಡಿದ್ದಾರೆ.

ಪಂಪ್‌ಹೌಸ್‌ ಸಮೀಪಿಸುತ್ತಿದ್ದಂತೆ ಚತುಷ್ಪಥ ಕೊನೆಯಾಗಿ ಕೂಡಲೇ ರಸ್ತೆ ಸಣ್ಣದಾಗುತ್ತದೆ, ತಿರುವು ಸಿಗುತ್ತದೆ. ಹೊಸದಾಗಿ ಈ ರಸ್ತೆಯಲ್ಲಿ ಸಂಚಾರ ಮಾಡುವವರಿಗೆ ಅದರ ಅರಿವು ಇಲ್ಲದೇ ಇರುವುದರಿಂದ ನೇರವಾಗಿ ಪಂಪ್‌ಹೌಸ್‌ಗೆ ಹೋಗಿ ಡಿಕ್ಕಿ ಹೊಡೆಯುತ್ತಿದ್ದಾರೆ. ಈವರೆಗೆ ಅಪಘಾತ ಆಗಿರುವ ಎಲ್ಲ ವಾಹನಗಳು ಹೊರ ಜಿಲ್ಲೆಗಳದ್ದಾಗಿವೆ.

ಹೆದ್ದಾರಿ ಇಲಾಖೆಯವರು ಸರಿಯಾದ ಡೈವರ್ಷನ್‌ ಫ‌ಲಕ, ಹಂಪ್ಸ್‌ ಹಾಕುವ ಮೂಲಕ ಅಪಘಾತ ತಡೆಯಬಹುದು ಎನ್ನುವುದು ಸ್ಥಳೀಯರಾದ ಪರ್ಕಳದ ಎಚ್‌.ಎ.ಕೆ. ಪೈ ಅವರ ಸಲಹೆ.

ಏನೇನು ಮಾಡಬಹುದು?
1. ಮಣಿಪಾಲಕ್ಕಿಂತ ಸ್ವಲ್ಪ ಮುಂದೆ ಹೋಗುವಾಗಲೇ ಅಪಘಾತ ವಲಯ/ ನಿಧಾನವಾಗಿ ಚಲಿಸಿ/ಡೈವ ರ್ಷನ್‌ ಇದೆ ಎಂಬ ಎಚ್ಚರಿಕೆ ಫ‌ಲಕ ಹಾಕಬಹುದು.
2. ಅಪಘಾತ ನಡೆಯುವ ಜಾಗದಲ್ಲಿ ಎಚ್ಚರಿಕೆ ಫ‌ಲಕ ಇದ್ದರೂ ಅದಕ್ಕೇ ಢಿಕ್ಕಿ ಹೊಡೆದ ಪ್ರಸಂಗವೂ ನಡೆದಿದೆ. ಹೀಗಾಗಿ ಬೋರ್ಡ್‌ ದೊಡ್ಡದಾಗಿರಬೇಕು.
3. ಕಾಂಕ್ರಿಟ್‌ ರಸ್ತೆ ಮುಕ್ತಾಯವಾಗುವ ಮುನ್ನವೇ ಸ್ಪೀಡ್‌ ಬ್ರೇಕರ್‌ ಅಳವಡಿಸಿದರೆ ತಕ್ಕ ಮಟ್ಟಿಗೆ ವಾಹನ ಗಳು ಚಾಲಕರ ನಿಯಂತ್ರಣಕ್ಕೆ ಬರಲು ಸಾಧ್ಯವಿದೆ.