ಟ್ವೆಂಟಿ20 ಪಂದ್ಯ: ಶಾಹಿದ್‌ ಅಫ್ರಿದಿ ಸ್ಫೋಟಕ ಶತಕ

ಡರ್ಬಿಶೈರ್‌: ಪಾಕಿಸ್ಥಾನದ ಮಾಜಿ ಆಲ್‌ರೌಂಡರ್‌ ಶಾಹಿದ್‌ ಅಫ್ರಿದಿ ಸಿಡಿಸಿದ ಸ್ಫೋಟಕ ಶತಕದಿಂದಾಗಿ ಹ್ಯಾಂಪ್‌ಶೈರ್‌ ತಂಡವು ಡರ್ಬಿಶೈರ್‌ನಲ್ಲಿ ನಡೆದ ಟ್ವೆಂಟಿ20 ಬ್ಲಾಸ್ಟ್‌ ಕ್ವಾರ್ಟರ್‌ಫೈನಲ್‌ ಪಂದ್ಯದಲ್ಲಿ ಫಾಲ್ಕನ್ಸ್‌ ತಂಡದೆದುರು 101 ರನ್ನುಗಳಿಂದ ಜಯ ಸಾಧಿಸಿದೆ. 

ಡರ್ಬಿಶೈರ್‌ನಲ್ಲಿ ನಡೆದ ಈ ಪಂದ್ಯದಲ್ಲಿ 37ರ ಹರೆಯದ ಅಫ್ರಿದಿ 10 ಬೌಂಡರಿ ಮತ್ತು 7 ಸಿಕ್ಸರ್‌ ನೆರವಿನಿಂದ ಕೇವಲ 42 ಎಸೆತಗಳಲ್ಲಿ ಶತಕ ಸಿಡಿಸಿದರು. ಇದರಿಂದಾಗಿ ಹ್ಯಾಂಪ್‌ಶೈರ್‌ ತಂಡ 8 ವಿಕೆಟಿಗೆ 249 ರನ್ನುಗಳ ಬೃಹತ್‌ ಮೊತ್ತ ಪೇರಿಸಿತು. ಇದು ಹ್ಯಾಂಪ್‌ಶೈರ್‌ ತಂಡ ಟ್ವೆಂಟಿ20 ಪಂದ್ಯದಲ್ಲಿ ದಾಖಲಿಸಿದ ಗರಿಷ್ಠ ಮೊತ್ತವಾಗಿದೆ. ನಾಯಕ ಜೇಮ್ಸ್‌ ವಿನ್ಸ್‌ 36 ಎಸೆತಗಳಿಂದ 55 ರನ್‌ ಹೊಡೆದರು. ಹ್ಯಾಂಪ್‌ಶೈರ್‌ ಈ ಹಿಂದೆ 2006ರಲ್ಲಿ ಮಿಡ್ಲ್ಸೆಕ್ಸ್‌ ವಿರುದ್ಧ 2 ವಿಕೆಟಿಗೆ 225 ರನ್‌ ಪೇರಿಸಿದ್ದು ಈ ಹಿಂದಿನ ಗರಿಷ್ಠ ಮೊತ್ತವಾಗಿತ್ತು.

ಗೆಲ್ಲಲು 250 ರನ್‌ ಗಳಿಸುವ ಗುರಿ ಪಡೆದ ಫಾಲ್ಕನ್ಸ್‌ ತಂಡ 148 ರನ್ನಿಗೆ ಆಲೌಟಾಗಿ ಶರಣಾ ಯಿತು. ಲಿಯಮ್‌ ಡಾಸನ್‌ ಮತ್ತು ಅಬೋಟ್‌ ತಲಾ 3 ವಿಕೆಟ್‌ ಕಿತ್ತರು. 20 ಎಸೆತಗಳಲ್ಲಿ ಅರ್ಧಶತಕ ಪೂರ್ತಿಗೊಳಿಸಿದ್ದ ಅಫ್ರಿದಿ 65 ರನ್‌ ತಲುಪಿದ ವೇಳೆ ಜೀವದಾನ ಪಡೆದಿದ್ದರು.