Ind vs WI T20: ದ್ವಿತೀಯ ಟಿ20 ಪಂದ್ಯದಲ್ಲಿ ತಿರುಗಿ ಬಿದ್ದ ವೆಸ್ಟ್‌ ಇಂಡೀಸ್‌ ವನಿತೆಯರು

ನವಿ ಮುಂಬಯಿ: ದ್ವಿತೀಯ ಟಿ20 ಪಂದ್ಯದಲ್ಲಿ ತಿರುಗಿ ಬಿದ್ದ ವೆಸ್ಟ್‌ ಇಂಡೀಸ್‌ ವನಿತೆಯರು ಭಾರತವನ್ನು 9 ವಿಕೆಟ್‌ಗಳಿಂದ ಸೋಲಿಸಿ ಸರಣಿಯನ್ನು ಸಮಬಲಕ್ಕೆ ತರುವಲ್ಲಿ ಯಶಸ್ವಿಯಾಗಿದ್ದಾರೆ.

ಭಾರತ 9 ವಿಕೆಟಿಗೆ 159 ರನ್‌ ಗಳಿಸಿದರೆ, ವೆಸ್ಟ್‌ ಇಂಡೀಸ್‌ 15.4 ಓವರ್‌ಗಳಲ್ಲಿ ಒಂದೇ ವಿಕೆಟಿಗೆ 160 ರನ್‌ ಬಾರಿಸಿತು. ಮೊದಲ ಪಂದ್ಯವನ್ನು ಭಾರತ 49 ರನ್ನುಗಳಿಂದ ಜಯಿಸಿತ್ತು. ಚೇಸಿಂಗ್‌ ವೇಳೆ ನಾಯಕಿ ಹ್ಯಾಲಿ ಮ್ಯಾಥ್ಯೂಸ್‌ ಸಿಡಿದು ನಿಂತು 47 ಎಸೆತಗಳಿಂದ ಅಜೇಯ 85 ರನ್‌ ಬಾರಿಸಿದರು. ಈ ಪಂದ್ಯಶ್ರೇಷ್ಠ ಇನ್ನಿಂಗ್ಸ್‌  17 ಬೌಂಡರಿಗಳನ್ನು ಒಳಗೊಂಡಿತ್ತು.

ಕೌರ್‌ ಗೈರಲ್ಲಿ ನಾಯಕತ್ವ ವಹಿಸಿದ್ದ ಸ್ಮತಿ ಮಂಧನಾ ಬ್ಯಾಟಿಂಗ್‌ ಸರದಿ ಯಲ್ಲಿ ಮಿಂಚಿದರು. ಒಂದೆಡೆ ವಿಕೆಟ್‌ ಉರುಳುತ್ತಿದ್ದರೂ 14ನೇ ಓವರ್‌ ತನಕ ಕ್ರೀಸ್‌ ಆಕ್ರಮಿಸಿಕೊಂಡ ಎಡಗೈ ಆರಂಭಗಾರ್ತಿ 41 ಎಸೆತ ಎದುರಿಸಿ 62 ರನ್‌ ಬಾರಿಸಿದರು. 9 ಬೌಂಡರಿ ಹಾಗೂ ಭಾರತದ ಸರದಿಯ ಏಕೈಕ ಸಿಕ್ಸರ್‌ ಇದರಲ್ಲಿ ಸೇರಿತ್ತು.

ವಿಕೆಟ್‌ ಕೀಪರ್‌ ರಿಚಾ ಘೋಷ್‌ 32 ರನ್‌ ಹೊಡೆದರು (17 ಎಸೆತ, 6 ಬೌಂಡರಿ). ಉಳಿದಂತೆ ಎರಡಂಕೆಯ ಗಡಿ ದಾಟಿದ ಇಬ್ಬರೆಂದರೆ ದೀಪ್ತಿ ಶರ್ಮ (17) ಮತ್ತು ಜೆಮಿಮಾ (13). ವಿಂಡೀಸ್‌ ಬೌಲಿಂಗ್‌ ಸರದಿಯಲ್ಲಿ ಡಿಯಾಂಡ್ರಾ ಡಾಟಿನ್‌, ಶಿನೆಲ್‌ ಹೆನ್ರಿ, ಹ್ಯಾಲಿ ಮ್ಯಾಥ್ಯೂಸ್‌ ಮತ್ತು ಎಫಿ ಫ್ಲೆಚರ್‌ ತಲಾ 2 ವಿಕೆಟ್‌ ಕೆಡವಿದರು. ಇವರಲ್ಲಿ ಡಾಟಿನ್‌ ಅತ್ಯಂತ ಮಿತವ್ಯಯಿ ಎನಿಸಿದರು (4-0-14-2).