ಯಶಸ್ಸಿಗೆ ಕೌಶಲ್ಯ, ನೈಪುಣ್ಯತೆ ಅನಿವಾರ್ಯ: ಸಿದ್ದೇಗೌಡ

ದೊಡ್ಡಬಳ್ಳಾಪುರ: ನಮ್ಮ ಅವಶ್ಯಕತೆಗೆ ತಕ್ಕಂತೆ ಜವಾಬ್ದಾರಿಗಳು ಪೂರಕವಾಗಿರಬೇಕು. ನಮ್ಮ ಪ್ರತಿಕ್ರಿಯೆಯಲ್ಲಿಯೂ ಮೌಲ್ಯಗಳಿದ್ದಾಗ ಮಾತ್ರ ಪರಿಪೂರ್ಣ ಜೀವನ ನಡೆಸಲು ಸಾಧ್ಯವಿದ್ದು, ಇಂದಿನ ಯುವಪೀಳಿಗೆ ಈ ದಿಸೆಯಲ್ಲಿ ಗಂಭೀರವಾಗಿ ಚಿಂತಿಸುವ ಅಗತ್ಯವಿದೆ ಎಂದು ತುಮಕೂರು ವಿಶ್ವವಿದ್ಯಾನಿಲಯ ಕುಲಪತಿ ಪ್ರೋ.ವೈ.ಎಸ್‌.ಸಿದ್ದೇಗೌಡ ಹೇಳಿದರು.

ನಗರದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಮತ್ತು ಸ್ನಾತಕೋತ್ತರ ಕೇಂದ್ರದಲ್ಲಿ ನಡೆದ ಸಾಂಸ್ಕೃತಿಕ, ಕ್ರೀಡೆ ಸೇರಿದಂತೆ ವಿವಿಧ ಘಟಕಗಳ ಸಮಾರೋಪ ಹಾಗೂ ಕಾಲೇಜು ವಾರ್ಷಿಕೋತ್ಸವ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದರು.

ನಮ್ಮ ಸಾಂಸ್ಕೃತಿಕ ಬದುಕು ಉತ್ತಮವಾಗಿದ್ದರೆ ಮಾತ್ರ ದೇಶ ಸುಭದ್ರವಾಗಿರಲು ಸಾಧ್ಯ. ಹೀಗಾಗಿ ಅತ್ಯಂತ ಜವಾಬ್ದಾರಿ ನಾಗರಿಕರಾಗಿ ವರ್ತಿಸುವ ಕಡೆಗೆ ಸದಾ ನಮ್ಮ ಚಿಂತನೆಗಳು ಇರಬೇಕು. ತಾವು ಬೆಳೆಯುವುದರೊಂದಿಗೆ ಇತರರನ್ನು ಬೆಳೆಸಬೇಕು. ಇಂದು ಶಿಕ್ಷಣ ಪಡೆಯಲು ಹಲವಾರು ಸೌಲಭ್ಯಗಳಿವೆ. ನಾವು ವ್ಯಾಸಂಗ ಮಾಡುತ್ತಿದ್ದ ಸಂದರ್ಭದಲ್ಲಿ ಅನಕ್ಷರಸ್ಥ ಕುಟುಂಬಗಳಿಂದ ಪದವಿ ಪಡೆಯುವುದೇ ದೊಡ್ಡ ವಿಚಾರವಾಗಿತ್ತು. ಕುಗ್ರಾಮಗಳಿಂದ ನಗರಕ್ಕೆ ಶಿಕ್ಷಣ ಪಡೆಯಲು ಹರಸಾಹಸ ಮಾಡುವ ವಾತಾವರಣವಿತ್ತು ಎಂದರು.

ಇಂದು ಯಾವುದೇ ವಿಚಾರಗಳಾದರೂ ಸಾಮಾಜಿಕ ಮಾಧ್ಯಮಗಳಲ್ಲಿ ತಿಳಿಯ ಬಹುದಾಗಿದ್ದು, ಯುವಕರಿಗೆ ಉಪಯೋಗವಾಗುತ್ತಿದೆ. ಆದರೆ ಇದೇ ಮಾಧ್ಯಮಗಳು ಯುವಕರು ಅವನತಿಯ ದಾರಿ ಹಿಡಿಯುವುದಕ್ಕೂ ಕಾರಣವಾಗುತ್ತಿರುವುದು ವಿಷಾದಕರ. ಮಾನವ ಸಂಪನ್ಮೂಲಗಳು ಸಮರ್ಪಕವಾಗಿ ಬಳಕೆ ಆಗಬೇಕು. ಯಾವುದೇ ಕ್ಷೇತ್ರದಲ್ಲಿರಲಿ ಕೌಶಲ್ಯ ಮತ್ತು ನೈಪುಣ್ಯತೆಯನ್ನು ಸಾಧಿಸಿದಾಗ ಮಾತ್ರ ಯಶಸ್ಸು ಸಾಧ್ಯ ಎಂದು ಕಿವಿ ಮಾತು ಹೇಳಿದರು. 

ಜಾನಪದ ಗಾಯಕ ಅಮ್ಮಾ ರಾಮಚಂದ್ರ.ಜಿ ಮಾತನಾಡಿ, ಬದುಕಿನಲ್ಲಿ ಕಷ್ಟಗಳನ್ನು ಮೆಟ್ಟಿ ಗುರಿ ಸಾಧಿಸುವುದನ್ನು ಬಡತನ ಕಲಿಸುತ್ತದೆ. ವಿದ್ಯಾರ್ಥಿಗಳು ಪರೀಕ್ಷೆಗಳಲ್ಲಿ ಅನುತ್ತೀರ್ಣರಾಗಿ ಆತ್ಮಹತ್ಯೆ ಮಾಡಿಕೊಳ್ಳುವ ಹಂತಕ್ಕೆ
ಹೋಗುತ್ತಿರುವುದು ದುರಂತದ ಸಂಗತಿ. ತಮ್ಮ ಬದುಕಿನ ಘಟನೆಗಳನ್ನು ಮೆಲುಕು ಹಾಕಿ ಎಸ್‌ಎಸ್‌ ಎಲ್‌ಸಿ ಪರೀಕ್ಷೆಯಲ್ಲಿ ಅನುತ್ತೀರ್ಣರಾಗಿದ್ದ ನಾನು ಎಂಎ ಪರೀಕ್ಷೆಯಲ್ಲಿ ರ್‍ಯಾಂಕ್‌ ಗಳಿಸುವ ಹಂತಕ್ಕೆ ಬೆಳೆದೆ. ಬಡತನದ ಹಿನ್ನೆಲೆಯಲ್ಲಿ, ಹಲವಾರು ಕೆಲಸಗಳನ್ನು ಮಾಡುತ್ತಾ, ಗೋಡೆ ಕಟ್ಟುವ ಕೆಲಸ ಮಾಡಿದ್ದೆ. ಮೈಸೂರಿನ ಕಾಲೇಜಿನಲ್ಲಿ ನಾನು ಗೋಡೆ ಕಟ್ಟಿದ್ದ ಕಾಲೇಜಿನಲ್ಲಿಯೇ ಮುಖ್ಯ ಅತಿಥಿಗಳಾಗಿ ಹೋಗುವ ಯೋಗ್ಯತೆ ಸಂಪಾದಿಸಿದೆ. ಇದಕ್ಕೆ ನನ್ನ ತಂದೆ, ತಾಯಿಯರ ಮಾರ್ಗದರ್ಶನ, ಪ್ರೇರಣೆಯೂ ಕಾರಣವಾಗಿದೆ ಎಂದು ಸ್ಮರಿಸಿದರು.

ತಮ್ಮ ಸುಮಧುರ ಕಂಠದಿಂದ ಜಾನಪದ ಗೀತೆ, ಭಾವಗೀತೆಗಳನ್ನು ಹಾಡಿ ವಿದ್ಯಾರ್ಥಿಗಳನ್ನು ರಂಜಿಸಿದರು. ಕಾಲೇಜಿನ ಪ್ರಾಂಶುಪಾಲ ಪ್ರೊ. ಎಸ್‌.ಪಿ.ರಾಜಣ್ಣ ಅಧ್ಯಕ್ಷತೆ ವಹಿಸಿದರು.

ವಿವಿಧ ಸಾಂಸ್ಕೃತಿಕ ಹಾಗೂ ಕ್ರೀಡಾ ಚಟುವಟಿಕೆಗಳಲ್ಲಿ ಭಾಗವಹಿಸಿ ವಿಜೇತರಾದವರಿಗೆ ಬಹುಮಾನಗಳನ್ನು ವಿತರಿಸಲಾಯಿತು. ಎನ್‌ ಸಿಸಿಯಲ್ಲಿ ರಾಷ್ಟ್ರಮಟ್ಟದಲ್ಲಿ ಸಾಧನೆ ಮಾಡಿದ ಹಾಗೂ ಕಾಲೇಜಿನ ಉತ್ತಮ ವಿದ್ಯಾರ್ಥಿಗಳನ್ನು ಅಭಿನಂದಿಸಲಾಯಿತು. ಕಾಲೇಜು ಅಭಿವೃದ್ಧಿ ಸಮಿತಿ ಸದಸ್ಯ ಡಿ.ಶ್ರೀಕಾಂತ, ಕಾಲೇಜಿನ ಪ್ರಾಧ್ಯಾಪಕರಾದ ಅಮರನಾರಾ ಯಣಸ್ವಾಮಿ, ಕ್ರೀಡಾ ವಿಭಾಗದ ಬಾಲಾ ನಾಯಕ್‌, ಡಾ.ಎಂ.ವಿ.ಸಿದ್ಧರಾಮರಾಜು, ಡಾ.ಸುದರ್ಶನ್‌ ಕುಮಾರ್‌, ಪ್ರವೀಣ್‌, ಶ್ರೀನಿವಾಸಯ್ಯ, ಸದಾಶಿವ ರಾಮಚಂದ್ರಗೌಡ ಮತ್ತಿತರರು ಇದ್ದರು.