ಸುದೀಪ್‌ ಅಭಿನಯದ “ಪೈಲ್ವಾನ್‌’ ಚಿತ್ರದ ಚಿತ್ರೀಕರಣ ಭರದಿಂದ ಸಾಗುತ್ತಿದೆ. ಚೆನ್ನೈನಲ್ಲಿ ಚಿತ್ರೀಕರಣ ಆರಂಭಿಸಿದ “ಪೈಲ್ವಾನ್‌’ ಅಲ್ಲಿ ಯಶಸ್ವಿಯಾಗಿ ಚಿತ್ರೀಕರಣ ಮುಗಿಸಿಕೊಂಡು ಬೆಂಗಳೂರಿಗೆ ವಾಪಾಸ್‌ ಆಗಿದೆ. ಸೋಮವಾರದಿಂದ ಬೆಂಗಳೂರಿನಲ್ಲಿ ಚಿತ್ರೀಕರಣ ಆರಂಭವಾಗಲಿದೆ. ಚೆನ್ನೈನಲ್ಲಿ 15 ದಿನಗಳ ಕಾಲ ಚಿತ್ರೀಕರಣ ಮಾಡಲಾಗಿದೆ.
ಇಲ್ಲಿ ಮಿಡ್ಲ್ಕ್ಲಾಸ್‌ ಏರಿಯಾಗಳನ್ನು ನಿರ್ದೇಶಕ ಕೃಷ್ಣ ಚಿತ್ರೀಕರಿಸಿಕೊಂಡಿದ್ದಾರೆ. ಮಾರ್ಕೇಟ್‌, ರಸ್ತೆ ಸೇರಿದಂತೆ ಇತರ ಭಾಗಗಳ ಚಿತ್ರೀಕರಣ ಮಾಡಲಾಗಿದೆ. ತುಂಬಾ ನೈಜವಾಗಿ ಮೂಡಿಬಂದ ಖುಷಿ ಚಿತ್ರತಂಡಕ್ಕಿದೆ. ಚೆನ್ನೈನಲ್ಲಿ ನಡೆದ ಚಿತ್ರೀಕರಣದಲ್ಲಿ ಸುದೀಪ್‌, ಆಕಾಂಕ್ಷಾ, ಸುಶಾಂತ್‌ ಸೇರಿದಂತೆ ಅನೇಕರು ಭಾಗವಹಿಸಿದ್ದಾರೆ.
ಚೆನ್ನೈ ಚಿತ್ರೀಕರಣದಿಂದ ವಾಪಾಸ್‌ ಆದ ಸುದೀಪ್‌ ಕೂಡಾ “ಪೈಲ್ವಾನ್‌’ ಬಗ್ಗೆ ಖುಷಿಯಿಂದ ಟ್ವೀಟ್‌ ಮಾಡಿದ್ದಾರೆ. “ಪೈಲ್ವಾನ್‌ ಚಿತ್ರೀಕರಣ ತುಂಬಾ ಚೆನ್ನಾಗಿ ನಡೆಯಿತು. ತಂಡದ ಪ್ರತಿಯೊಬ್ಬರು ಉತ್ಸಾಹದಿಂದ ಪಾಲ್ಗೊಂಡರು. ಯಾರು ಕೂಡಾ ತಮ್ಮ ಉತ್ಸಾಹದಲ್ಲಿ ಹಿಂದೆ ಬೀಳಲಿಲ್ಲ.ಚಿತ್ರೀಕರಣದ ಪ್ರತಿ ಅಂಶವನ್ನು ಎಂಜಾಯ್‌ ಮಾಡಿದ್ದೇನೆ.
ನಿರ್ದೇಶಕ ಕೃಷ್ಣ ಅವರ ಆತಿಥ್ಯ ಕೂಡಾ ಚೆನ್ನಾಗಿತ್ತು. ಎರಡನೇ ಹಂತದ ಚಿತ್ರೀಕರಣಕ್ಕಾಗಿ ಎದುರು ನೋಡುತ್ತಿದ್ದು, ಇಲ್ಲಿ ಸುನೀಲ್‌ ಶೆಟ್ಟಿ ಅಣ್ಣ ಕೂಡಾ ಭಾಗಿಯಾಗಲಿದ್ದಾರೆ’ ಎಂದು “ಪೈಲ್ವಾನ್‌’ ಬಗ್ಗೆ ಖುಷಿ ಹಂಚಿಕೊಂಡಿದ್ದಾರೆ. ಸುದೀಪ್‌ ಟ್ವೀಟ್‌ಗೆ ಪ್ರತಿಕ್ರಿಯಿಸಿರುವ ಸುನೀಲ್‌ ಶೆಟ್ಟಿ, “ನಾನು ಕೂಡಾ ಚಿತ್ರೀಕರಣಕ್ಕಾಗಿ ಎದುರು ನೋಡುತ್ತಿದ್ದೇನೆ. ನನ್ನ ಮೊದಲ ಚಿತ್ರ ಬೇರೆ.
ಎಕ್ಸೆ„ಟ್‌ ಜೊತೆಗೆ ನರ್ವಸ್‌ ಆಗಿದ್ದೇನೆ’ ಎಂದು ಟ್ವೀಟ್‌ ಮಾಡಿದ್ದಾರೆ. ಕನ್ನಡದಲ್ಲಿ ಸುನೀಲ್‌ ಶೆಟ್ಟಿಯವರ ಮೊದಲ ಚಿತ್ರ ಇದಾಗಿದ್ದು, ಈ ಹಿಂದೆ ಅನೇಕ ಸಿನಿಮಾಗಳಲ್ಲಿ ಅವರ ಹೆಸರು ಕೇಳಿಬಂದಿತ್ತಾದರೂ ಸುನೀಲ್‌ ಶೆಟ್ಟಿ ನಟಿಸಿರಲಿಲ್ಲ. ಅಂದಹಾಗೆ, ಎರಡನೇ ಹಂತದ ಚಿತ್ರೀಕರಣ ಜೂನ್‌ ಕೊನೆಯಲ್ಲಿ ಹೈದರಾಬಾದ್‌ನಲ್ಲಿ ಆರಂಭವಾಗಲಿದೆ. ಸುನೀಲ್‌ ಶೆಟ್ಟಿ ಹಾಗೂ ಸುದೀಪ್‌ ಅವರ ದೃಶ್ಯಗಳನ್ನು ಇಲ್ಲಿ ಚಿತ್ರೀಕರಿಸಲಿದ್ದಾರೆ ನಿರ್ದೇಶಕ ಕೃಷ್ಣ.
