ಬಾರ್ಸಿಲೋನಾ ಕ್ಲಬ್‌ ತೊರೆಯುವ ಮೆಸ್ಸಿ

ಬಾರ್ಸಿಲೋನಾ (ಸ್ಪೇನ್‌): ಇತ್ತೀಚೆಗಷ್ಟೇ ಬೇಯರ್ನ್ ಮ್ಯೂನಿಚ್‌ ಕೂಟ ಮುಗಿದಿದೆ. ಅಲ್ಲಿ ನಡೆದ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಬೇಯರ್ನ್ ಮ್ಯೂನಿಚ್‌ ಎದುರು ಲಿಯೋನೆಲ್‌ ಮೆಸ್ಸಿ ನಾಯಕತ್ವದ ಬಾರ್ಸಿಲೊನಾ 2-8ರಿಂದ ಹೀನಾಯವಾಗಿ ಸೋತಿತ್ತು. ಆ ಸಂಕಟದ ಬೆನ್ನಲ್ಲೇ ನಾಯಕ ಮೆಸ್ಸಿ ತಂಡವನ್ನು ತೊರೆಯುವುದಾಗಿ ಪ್ರಕಟಿಸಿದ್ದಾರೆ. ಅವರು ಈಗಾಗಲೇ ಮ್ಯಾಂಚೆಸ್ಟರ್‌ ಸಿಟಿ ತಂಡದೊಂದಿಗೆ ಮಾತುಕತೆ ನಡೆಸಿದ್ದಾರೆ ಎಂದು ಹೇಳಲಾಗಿದೆ.

ವಿಶ್ವದ ಫ‌ುಟ್‌ಬಾಲ್‌ ದಂತಕತೆ ಮೆಸ್ಸಿ ಒಂದು ಕಾಲದಲ್ಲಿ ಏಕಾಂಗಿಯಾಗಿ ತಂಡವನ್ನು ಗೆಲ್ಲಿಸಿಕೊಂಡು ಬರುತ್ತಿದ್ದರು. ಇತ್ತೀಚೆಗೆ ಆ ಶಕ್ತಿ ಕುಗ್ಗಿದೆ ಎನ್ನುವುದು ಹಲವು ಪಂದ್ಯಗಳಲ್ಲಿ ಸಾಬೀತಾಗಿದೆ. ಇದಕ್ಕೆ ಇತರ ಆಟಗಾರರ ಕಳಪೆ ಆಟವೂ ಕಾರಣವಿರಬಹುದು. 2018ರಿಂದ ಸತತವಾಗಿ ಸೋಲುಗಳೇ ಎದುರಾಗುತ್ತಿವೆ. 2020ರಲ್ಲಂತೂ ಪೂರ್ತಿಯಾಗಿ ಸೋಲೇ ಕಂಡುಬಂದಿದೆ. ಮೆಸ್ಸಿ ಬಾರ್ಸಿಲೋನಾ ತೊರೆಯಲು ಇದೇ ಕಾರಣ ಇರಬಹುದು.