Pro Kabaddi: ಬೆಂಗಳೂರು ಬುಲ್ಸ್‌ ಗೆ 18ನೇ ಸೋಲು

ಪುಣೆ: ಪ್ರೊ ಕಬಡ್ಡಿ ಲೀಗ್‌ (ಪಿಕೆಎಲ್‌) 11ನೇ ಆವೃತ್ತಿಯಲ್ಲಿ ಅತೀ ಕಳಪೆ ಪ್ರದರ್ಶನ ನೀಡಿರುವ ಬೆಂಗಳೂರು ಬುಲ್ಸ್‌ ತಂಡ ತನ್ನ ಸೋಲಿನ ಓಟವನ್ನು ರವಿವಾರವೂ ಮುಂದುವರಿಸಿತು. ತಮಿಳ್‌ ತಲೈವಾಸ್‌ ವಿರುದ್ಧದ ಪಂದ್ಯದಲ್ಲಿ ಅದು 42-32 ಅಂತರದ ಸೋಲನುಭವಿಸಿತು. ಇದು ಕೂಟದಲ್ಲಿ ಆಡಿದ 21 ಪಂದ್ಯಗಳಲ್ಲಿ ಬುಲ್ಸ್‌ ಅನುಭವಿಸಿದ 18ನೇ ಸೋಲು. ಇನ್ನೊಂದೆಡೆ ತಲೈವಾಸ್‌ ತಂಡ ಆಡಿದ 21 ಪಂದ್ಯಗಳಲ್ಲಿ 8ನೇ ಗೆಲುವು ದಾಖಲಿಸಿತು.

ದಿನದ ಇನ್ನೊಂದು ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ ತಂಡವು ಯು ಮುಂಬಾ ತಂಡವನ್ನು 47-30 ಅಂಕಗಳಿಂದ ಮಣಿಸಿದೆ. ಈ ಗೆಲುವಿ ನಿಂದ ಹರಿಯಾಣ ತಾನಾಡಿದ 22 ಪಂದ್ಯ ಗಳಿಂದ 16 ಪಂದ್ಯ ಗಳಲ್ಲಿ ಜಯಭೇರಿ ಬಾರಿಸಿ ಒಟ್ಟಾರೆ 84 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ಹರಿಯಾಣ ಈ ಪಂದ್ಯದಲ್ಲಿ ರೈಡಿಂಗ್‌ ಮೂಲಕ 22 ಮತ್ತು ಟ್ಯಾಕಲ್‌ನಲ್ಲಿ 17 ಅಂಕ ಸಂಪಾದಿಸಿತು. ತಂಡದ ಶಿವಂ ಪತಾರೆ ರೈಡಿಂಗ್‌ನಲ್ಲಿ 9 ಅಂಕ ಸಹಿತ ಒಟ್ಟು 14 ಅಂಕ ಗಳಿಸಿದರೆ ವಿನಯ್‌ ಆರಂಕ ಪಡೆದರು. ಮುಂಬಾ ತಂಡದ ಸತೀಶ್‌ ಕಣ್ಣನ್‌ ರೈಡಿಂಗ್‌ನಲ್ಲಿ ಒಟ್ಟು 9 ಅಂಕ ಪಡೆದರು.

ತಮಿಳ್‌ ಭರ್ಜರಿ ಪ್ರದರ್ಶನ
ತಮಿಳ್‌ ತಲೈವಾಸ್‌ ಪರ ಹಿಮಾಂಶು ಮತ್ತು ಮೋಯಿನ್‌ ಶಫಾ ಭರ್ಜರಿ ಪ್ರದರ್ಶನ ನೀಡಿದರು. ರೈಡರ್‌ ಹಿಮಾಂಶು 13 ಅಂಕ ಗಳಿಸಿದರೆ, ಮೋಯಿನ್‌ 9 ಅಂಕ ಗಳಿಸಿದರು. ಅಮಿರ್‌ ಹೊಸೈನ್‌ 4, ಸಾಯಿಪ್ರಸಾದ್‌, ಎಂ.ಅಭಿಷೇಕ್‌, ನಿತೇಶ್‌ ಕುಮಾರ್‌ ತಲಾ 3 ಅಂಕ ಗಳಿಸಿ ತಂಡವನ್ನು ಬೆಂಬಲಿಸಿದರು. ಬುಲ್ಸ್‌ ಪರ ಸುಶೀಲ್‌ 15 ಅಂಕ ಗಳಿಸಿ ಹೋರಾಟ ನೀಡಿದರಾದರೂ ಉಳಿದ ಆಟಗಾರರ ಬೆಂಬಲವಿಲ್ಲದೆ ತಂಡ ಸೊರಗಿತು.

ಇಂದಿನ ಪಂದ್ಯ
1. ಗುಜರಾತ್‌ vs ಡೆಲ್ಲಿ
ಆರಂಭ: ರಾತ್ರಿ 8 ಗಂಟೆ

ಕ್ರೀಡೆ