ಗಬ್ಬು ನಾರುತ್ತಿದೆ ಚರಂಡಿ

ಕುಂದಾಪುರ: ಇಲ್ಲಿನ ಪುರಸಭೆಯ ವಡೇರ ಹೋಬಳಿಯ ಹುಂಚಾರಬೆಟ್ಟು ಸಮೀಪ ಚರಂಡಿ ಗಬ್ಬೆದ್ದು ನಾರುತ್ತಿದ್ದು ಪುರಸಭೆ ತುರ್ತು ಗಮನಹರಿಸಬೇಕಿದೆ. ಪುರಸಭೆಯ 21ನೆ ವಾರ್ಡ್‌ನಲ್ಲಿ ಹನುಮಾನ್‌ ಗ್ಯಾರೇಜ್‌ನ ಹಿಂದೆ ಸುಮಾರು 15 ಮನೆಗಳ ಎದುರು ಹಾದುಹೋಗುವ ಚರಂಡಿಯಿಂದಾಗಿ ಮನೆಮಂದಿ ಕಿಟಕಿ, ಬಾಗಿಲು ಮುಚ್ಚಿ ಕೂರಬೇಕಾದ ಸ್ಥಿತಿ ಇದೆ. ನೀರು ಹರಿಯದೇ ನಿಂತ ಕಾರಣ ಕೀಟಾಣುಗಳು ಹುಟ್ಟಿಕೊಳ್ಳಲು ಅನುವು ಮಾಡಿಕೊಟ್ಟಂತಾಗಿದೆ. ಈ ಬಗ್ಗೆ ಕ್ರಮಕೈಗೊಳ್ಳುವಂತೆ ಸ್ಥಳೀಯರು ಪುರಸಭೆಗೆ ಮನವಿ ನೀಡಿದ್ದಾರೆ.