ಖಾಸಗಿ ಡೈರಿಯಲ್ಲಿ ಬಿ.ಎಸ್‌.ವೈ. –ಶೋಭಾ ವಿವಾಹದ ಉಲ್ಲೇಖ?

ನವದೆಹಲಿ: ಆದಾಯ ತೆರಿಗೆ ಇಲಾಖೆಯ ಬಳಿಯಲ್ಲಿ ಇದೆ ಎನ್ನಲಾಗುತ್ತಿರುವ ಯಡಿಯೂರಪ್ಪನವರ ಖಾಸಗಿ ಡೈರಿಯ ಕೆಲವೊಂದು ಪುಟಗಳನ್ನು ಖಾಸಗಿ ಸುದ್ದಿ ವೆಬ್‌ ಸೈಟ್‌ ಒಂದು ಬಹಿರಂಗಗೊಳಿಸುತ್ತಿರುವಂತೆ ರಾಜ್ಯ ಮತ್ತು ರಾಷ್ಟ್ರರಾಜಕಾರಣದಲ್ಲಿ ತಲ್ಲಣ ಪ್ರಾರಂಭವಾಗಿದೆ. ಒಂದುಕಡೆ ಈ ಡೈರಿಯಲ್ಲಿ ನಮೂದಾಗಿರುವ 1800 ಕೋಟಿ ರೂಪಾಯಿಗಳ ಕಪ್ಪ ಸಂದಾಯ ಕುರಿತಾಗಿ ಕಾಂಗ್ರೆಸ್‌ ಗಂಭೀರ ಆರೋಪವನ್ನು ಪತ್ರಿಕಾಗೋಷ್ಠಿಯಲ್ಲಿ ಮಾಡಿದೆ. ಇನ್ನು ಡೈರಿಯ ಒಂದೊಂದು ಪುಟಗಳಲ್ಲಿ ಇದೆ ಎನ್ನಲಾಗುತ್ತಿರುವ ರಹಸ್ಯ ಮಾಹಿತಿಗಳು ಇದೀಗ ಬಹಿರಂಗವಾಗತೊಡಗಿದೆ. ಅದರಲ್ಲಿ ಒಂದು ಯಡಿಯೂರಪ್ಪ ಮತ್ತು ಶೋಭಾ ಕರಂದ್ಲಾಜೆ ನಡುವಿನ ಸಂಬಂಧ ಕುರಿತಾದ ಮಾಹಿತಿ.

ಸ್ವತಃ ಯಡಿಯೂರಪ್ಪನವರೇ ತಮ್ಮ ಖಾಸಗಿ ಡೈರಿಯಲ್ಲಿ ಬರೆದುಕೊಂಡಿರುವಂತೆ, ತಮ್ಮ ಪತ್ನಿ ಮೈತ್ರಾ ದೇವಿ ಅವರು ನಿಧನರಾದ ಬಳಿಕ ತಮ್ಮನ್ನು ಕಾಡುತ್ತಿದ್ದ ಒಂಟಿತನದಿಂದ ಮುಕ್ತಿ ಪಡೆಯಲು ಶೋಭಾ ಕರಂದ್ಲಾಜೆಯವರನ್ನು ಕೇರಳದಲ್ಲಿರುವ ಚೊಟ್ಟಾಣಿಕ್ಕರ ಭಗವತಿ ದೇವಸ್ಥಾನದಲ್ಲಿ ಹಿಂದೂ ಸಂಪ್ರದಾದಂತೆ ವಿವಾಹ ಆಗಿದ್ದಾಗಿ ಈ ಡೈರಿಯಲ್ಲಿ ಬರೆದುಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಮಾತ್ರವಲ್ಲದೇ ತಮ್ಮ ಈ ವಿವಾಹಕ್ಕೆ ಯಡೆಯೂರು ಸಿದ್ದಲಿಂಗನೇ ಸಾಕ್ಷಿ ಎಂದೂ ಬರೆದುಕೊಂಡಿದ್ದಾರೆ! ಈ ಡೈರಿಯ ಪುಟಗಳು ಇದೀಗ ಎಲ್ಲೆಡೆ ಹರಿದಾಡುತ್ತಿದೆ.

ಕೇಂದ್ರದ ಹಿರಿಯ ನಾಯಕರಿಗೆ ಸಾವಿರಾರು ಕೋಟಿ ರೂಪಾಯಿಗಳ ಕಪ್ಪ ಸಂದಾಯದ ವಿಚಾರ ಮತ್ತು ಬಿ.ಎಸ್‌.ವೈ. ಹಾಗೂ ಶೋಭಾ ಕರಂದ್ಲಾಜೆ ನಡುವಿನ ವೈವಾಹಿಕ ಸಂಬಂಧದ ವಿಚಾರ ಮುಂಬರುವ ದಿನಗಳಲ್ಲಿ ರಾಜ್ಯ ಬಿಜೆಪಿಯಲ್ಲಿ ಯಡಿಯೂರಪ್ಪನವರ ಹಿಡಿತದ ಮೇಲೆ ಹಾಗೂ ಶೋಭಾ ಕರಂದ್ಲಾಜೆಯವರ ರಾಜಕೀಯ ಭವಿಷ್ಯದ ಮೇಲೆ ಯಾವ ರೀತಿಯಲ್ಲಿ ಪರಿಣಾಮ ಬೀರುತ್ತದೆ ಎಂಬುದನ್ನು ಕಾದುನೋಡಬೇಕಾಗಿದೆ.