ಯಮುನಾ ಎಕ್ಸ್‌ಪ್ರೆಸ್‌ವೇಯಲ್ಲಿ ಅಪಘಾತಗಳ ಸರಣಿ: ಆರು ಸಾವು

ನೋಯ್ಡಾ : ದಟ್ಟನೆಯ ಮಂಜು ಮುಸುಕಿದ ಯಮುನಾ ಎಕ್ಸ್‌ಪ್ರೆಸ್‌ವೇ ಯಲ್ಲಿ ಇಂದು ಬೆಳಗ್ಗೆ  ನಡೆದ ನಾಲ್ಕು ಪ್ರತ್ಯೇಕ ಅಪಘಾತಗಳಲ್ಲಿ ಆರು ಮಂದಿ ಮಡಿದಿರುವುದಾಗಿ ವರದಿಯಾಗಿದೆ. 

ಮೊದಲ ಅಪಘಾತದಲ್ಲಿ ಉದ್ಯಮಿ ಸಂತೋಷ್‌ ಚತುರ್ವೇದಿ ಎಂಬವರು ಮಥುರಾದಿಂದ ನೋಯ್ಡಾಗೆ ತಮ್ಮ ಸ್ನೇಹಿತನೊಂದಿಗೆ ಪ್ರಯಾಣಿಸುತ್ತಿದ್ದ ಕಾರು ಜೇವಾರ್‌ ಟೋಲ್‌ ಪ್ಲಾಜಾ ಸಮೀಪ ಇನ್ನೊಂದು ವಾಹನಕ್ಕೆ ಢಿಕ್ಕಿ ಹೊಡೆದಾಗ ಮೂವರು ಸ್ಥಳದಲ್ಲೇ ಮೃತಪಟ್ಟು ಇತರ ಆರು ಮಂದಿ ಗಂಭೀರವಾಗಿ ಗಾಯಗೊಂಡರು.

ಈ ಅವಘಡದಿಂದ ಎಕ್ಸ್‌ಪ್ರೆಸ್‌ ವೇಯಲ್ಲಿ ಭಾರೀ ಟ್ರಾಫಿಕ್‌ ಜಾಮ್‌ ಉಂಟಾಯಿತು ಎಂದು ಪೊಲೀಸರು ತಿಳಿಸಿದ್ದಾರೆ. 

ಛಪಾರ್‌ಗಢ ಗ್ರಾಮಕ್ಕೆ ಸಮೀಪದಲ್ಲಿ ನಡೆದ ಎರಡನೇ ಅಪಘಾತದಲ್ಲಿ ಬೈಕ್‌ ಗೆ ವಾಹನವೊಂದು ಢಿಕ್ಕಿ ಯಾದಾಗ ಬೈಕ್‌ ಸವಾರ ಸ್ಥಳದಲ್ಲೇ ಸಾವಪ್ಪಿದ. 

ಮೂರನೇ ಅಪಘಾತದಲ್ಲಿ  ಬಸ್ಸು ಮಹಿಳೆಯ ಮೇಲೆ ಹರಿದು ಆಕೆ ಸ್ಥಳದಲ್ಲೇ ಮೃತಪಟ್ಟಳು. 

ನಾಲ್ಕನೇ ಅಪಘಾತದಲ್ಲಿ ವಾಹನವೊಂದು ಪಾದಚಾರಿಯ ಮೇಲೆ ಹರಿದು  ಆತ ಸ್ಥಳದಲ್ಲೇ ಸಾವಪ್ಪಿದ. 

ಗಾಯಾಗಳುಗಳನ್ನು ಗ್ರೇಟರ್‌ ನೋಯ್ಡಾ ಆಸ್ಪತ್ರೆಗೆ ಸೇರಿಸಲಾಗಿದೆ; ಶವಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಗ್ರಾಮಾಂತರ ಎಸ್‌ಪಿ ಸುಜಾತಾ ಸಿಂಗ್‌ ತಿಳಿಸಿದ್ದಾರೆ.