“ಬಿಗಿ ಕಪಾಳ ಮೋಕ್ಷ ಮಾಡುವೆ’ಟ್ರೋಲಿಗರಿಗೆ ಝರೀನ್‌ ಎಚ್ಚರಿಕೆ

ಹೊಸದಿಲ್ಲಿ : 2010ರಲ್ಲಿ ಅನಿಲ್‌ ಶರ್ಮಾ ಅವರ “ವೀರ್‌” ಚಿತ್ರದ ಮೂಲಕ ಬಾಲಿವುಡ್‌ ಪ್ರವೇಶಿಸಿ ತನ್ನ ಬೋಲ್ಡ್‌ ಆ್ಯಂಡ್‌ ಬ್ಯೂಟಿಫ‌ುಲ್‌ ಪಾತ್ರಗಳು ಮತ್ತು ದಿಟ್ಟ ನಟನೆಯ ಹಲವಾರು ಚಿತ್ರಗಳ ಮೂಲಕ ಪ್ರಸಿದ್ಧಿಗೆ ಬಂದಿರುವ ಬಾಲಿವುಡ್‌ ನಟಿ ಝರೀನ್‌ ಖಾನ್‌ಗೆ ಸಾಮಾಜಿಕ ಜಾಲ ತಾಣದಲ್ಲಿ  ಗಣನೀಯ ಸಂಖ್ಯೆಯ ಬೆಂಬಲಿಗರು ಇದ್ದಾರೆ. ಹಾಗೆಯೇ ಆಕೆಯನ್ನು  ಟ್ರೋಲ್‌ ಮಾಡುವವರ ಸಂಖ್ಯೆಯೂ ಹೆಚ್ಚಿದೆ. 

ಬಾಲಿವುಡ್‌ ನ ಪ್ರಸಿದ್ಧ ತಾರೆಯೋರ್ವರನ್ನು ಬಹುವಾಗಿ ಹೋಲುವ ಕಾರಣಕ್ಕೂ ಟ್ರೋಲ್‌ ಆಗಿರುವ ಝರೀನ್‌ ಖಾನ್‌, ತಾನೊಬ್ಬ ಸಾಮಾನ್ಯ ನಟಿ ಎಂದು ನಿಂದಿಸಿ ತನ್ನ ಆತ್ಮಸ್ಥೈರ್ಯವನ್ನು ಕುಗ್ಗಿಸುವ ರೀತಿಯಲ್ಲಿ ಟ್ರೋಲ್‌ ಮಾಡುವವರ ವಿರುದ್ಧ  ಸಾಮಾಜಿಕ ಜಾಲ ತಾಣದಲ್ಲಿ ಕಿಡಿ ಕಾರಿದ್ದಾಳೆ. 

ಈಚಿನ ಎಂಟಿವಿ ಟ್ರೋಲ್‌ ಪೊಲೀಸ್‌ ಶೋದಲ್ಲಿ ಝರೀನ್‌ ಖಾನ್‌ ತನ್ನ ವಿರುದ್ಧದ ಟ್ರೋಲಿಗರನ್ನು ಜಾಲಾಡಿದ್ದಾಳೆ. ಇನ್‌ಸ್ಟಾಗ್ರಾಂ ನಲ್ಲಿ ಚಿಕ್ಕದೊಂದು ತನ್ನ ವಿಡಿಯೋ ಚಿತ್ರಿಕೆಯನ್ನು ಪೋಸ್ಟ್‌ ಮಾಡಿರುವ ಆಕೆ, “ನಿಮಗೆ ನನ್ನ ಬಗ್ಗೆ ಹೇಳುವುದಿದ್ದರೆ ನೇರವಾಗಿ ನನ್ನ ಮುಖಕ್ಕೇ ಹೇಳಿಬಿಡಿ; ಅದು ಬಿಟ್ಟು ಕದ್ದು ಮುಚ್ಚಿ ತೆರೆಮರೆಯಲ್ಲಿ ನಿಂತು ಅನಾಮಿಕರಾಗಿದ್ದುಕೊಂಡು ನನ್ನನ್ನು ಟ್ರೋಲ್‌ ಮಾಡಬೇಡಿ; ಹಾಗೇನಾದರೂ ಮಾಡಿದರೆ ನಾನು ನಿಮಗೆ ಬಿಗಿಯಾಗಿ ಕಪಾಳಮೋಕ್ಷ ಮಾಡಿಯೇನು’ ಎಂದು ಬೆದರಿಕೆ ಹಾಕಿದ್ದಾಳೆ.