WCS: ಇಂದಿನಿಂದ ವಿಶ್ವ ಹವಾಮಾನ ಶೃಂಗ- ಪ್ರಧಾನಿ ಮೋದಿ ಭಾಗಿ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಶುಕ್ರವಾರ ದುಬೈನಲ್ಲಿ ನಡೆಯುತ್ತಿರುವ ವಿಶ್ವ ಹವಾಮಾನ ಕ್ರಿಯಾಸಮಿತಿ ಶೃಂಗದಲ್ಲಿ ಪಾಲ್ಗೊಳ್ಳಲಿದ್ದಾರೆ. ಯುಎಇ ಅಧ್ಯಕ್ಷತೆಯಲ್ಲಿ ವಿಶ್ವಸಂಸ್ಥೆ ಈ ಶೃಂಗ ನಡೆಸುತ್ತಿದೆ. ಈ ವೇಳೆ ಮೋದಿ ಮೂರು ಉನ್ನತಮಟ್ಟದ ಸಭೆಗಳಲ್ಲಿ ಪಾಲ್ಗೊಳ್ಳಲಿದ್ದಾರೆ. ಪ್ರಸ್ತುತ ಸಿಒಪಿ (ಕಾನ್ಫರೆನ್ಸ್‌ ಆಫ್ ಪಾರ್ಟೀಸ್‌)ಯ 28ನೇ ಶೃಂಗ ಆಯೋಜನೆಗೊಂಡಿದೆ. ನ.30ರಿಂದ ಡಿ.12ರವರೆಗೆ ನಡೆಯಲಿದೆ.

ದುಬೈ ಭೇಟಿಗೂ ಮುನ್ನ ಪ್ರತಿಕ್ರಿಯೆ ನೀಡಿರುವ ಪ್ರಧಾನಿ ಮೋದಿ, ಭಾರತ ಮಾತಿಗೆ ತಕ್ಕಂತೆ ನಡೆದುಕೊಂಡಿದೆ. ಜಿ20 ಸಭೆಯಲ್ಲಿ ಭಾರತ ಹವಾಮಾನಕ್ಕೆ ಗರಿಷ್ಠ ಆದ್ಯತೆ ನೀಡಿತ್ತು. ದೆಹಲಿ ಜಿ20 ಸಭೆಯಲ್ಲಿ ಎಲ್ಲ ನಾಯಕರು ಹವಾಮಾನ ಕಾಪಾಡುವುದಕ್ಕೆ, ಸುಸ್ಥಿರ ಅಭಿವೃದ್ಧಿಗೆ ಆದ್ಯತೆ ನೀಡಿದ್ದರು. ಜಿ20ಯಲ್ಲಿ ಉಂಟಾದ ಒಮ್ಮತವನ್ನು ಸಿಒಪಿ28ನಲ್ಲಿ ಮುಂದುವರಿಸಿಕೊಂಡು ಹೋಗಲಾಗುತ್ತದೆ ಎಂಬ ಭರವಸೆ ನನ್ನದು ಎಂದಿದ್ದಾರೆ. ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಹವಾಮಾನ ಕಾಪಾಡಲು ಅಗತ್ಯ ಆರ್ಥಿಕ, ತಾಂತ್ರಿಕ ನೆರವು ಸಿಗಬೇಕಿದೆ ಎನ್ನುವುದು ಅವರ ಆಗ್ರಹ.