T20 Ranking; ಶಫಾಲಿ, ಹರ್ಮನ್‌ಪ್ರೀತ್‌ ಪ್ರಗತಿ

ದುಬಾೖ: ನೂತನ ವನಿತಾ ಟಿ20 ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಭಾರತದ ಓಪನರ್‌ ಶಫಾಲಿ ವರ್ಮ ಮತ್ತು ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಉತ್ತಮ ಪ್ರಗತಿ ಸಾಧಿಸಿದ್ದಾರೆ.

ದಕ್ಷಿಣ ಆಫ್ರಿಕಾ ವಿರುದ್ಧ ಮಿಂಚಿದ ಹರ್ಮನ್‌ಪ್ರೀತ್‌ ಕೌರ್‌ 3 ಸ್ಥಾನ ಮೇಲೇರಿದ್ದು, 12ನೇ ರ್‍ಯಾಂಕ್‌ ಗಳಿಸಿದ್ದಾರೆ. ಶಫಾಲಿ ವರ್ಮ ಅವರದು 2 ಸ್ಥಾನಗಳ ಪ್ರಗತಿ. ನ್ಯೂಜಿಲ್ಯಾಂಡ್‌ನ‌ ಅಮೇಲಿಯಾ ಕೆರ್‌ ಮತ್ತು ಇಂಗ್ಲೆಂಡ್‌ನ‌ ಡೇನಿಯಲ್‌ ವ್ಯಾಟ್‌ ಅವರೊಂದಿಗೆ ಜಂಟಿ 15ನೇ ಸ್ಥಾನದಲ್ಲಿದ್ದಾರೆ.

ಪ್ರಚಂಡ ಫಾರ್ಮ್ನಲ್ಲಿರುವ ಆರಂಭಿಕ ಆಟಗಾರ್ತಿ ಸ್ಮತಿ ಮಂಧನಾ ಭಾರತದ ಅತ್ಯುನ್ನತ ರ್‍ಯಾಂಕ್‌ನ ಆಟಗಾರ್ತಿಯಾಗಿದ್ದು, 5ನೇ ಸ್ಥಾನ ಕಾಯ್ದುಕೊಂಡಿದ್ದಾರೆ.

ಟಿ20 ಬೌಲಿಂಗ್‌ ರ್‍ಯಾಂಕಿಂಗ್‌ನಲ್ಲಿ ದೀಪ್ತಿ ಶರ್ಮ ತೃತೀಯ ಸ್ಥಾನದಲ್ಲಿ ಮುಂದುವರಿದಿದ್ದಾರೆ. ರಾಧಾ ಯಾದವ್‌ ಅವರದು ಬರೋಬ್ಬರಿ 8 ಸ್ಥಾನಗಳ ಜಿಗಿತ. ಅವರೀಗ 15ನೇ ರ್‍ಯಾಂಕ್‌ ಹೊಂದಿದ್ದಾರೆ. 6 ಸ್ಥಾನ ಮೇಲೇರಿದ ಪೂಜಾ ವಸ್ತ್ರಾಕರ್‌ 23ನೇ, 9 ಸ್ಥಾನಗಳ ಪ್ರಗತಿ ಸಾಧಿಸಿದ ಶ್ರೇಯಾಂಕಾ ಪಾಟೀಲ್‌ 60ನೇ ರ್‍ಯಾಂಕ್‌ ಗಳಿಸಿದ್ದಾರೆ.