ನಗರದಲ್ಲಿ ನಾಳೆ ಅಪರಂಜಿ ಹಬ್ಬ

ಬೆಂಗಳೂರು: ಅಪರಂಜಿ ಮಾಸಪತ್ರಿಕೆ ಏಪ್ರಿಲ್‌1 ರಂದು ನಗರದಲ್ಲಿ “ಅಪರಂಜಿ ಹಬ್ಬ 2018’ಅನ್ನು ಹಮ್ಮಿಕೊಂಡಿದೆ. ಬೆಳಗ್ಗೆ 10 ಗಂಟೆಗೆ ಭಾರತೀಯ ವಿದ್ಯಾಭವನದ ಖೀಂಚಾ ಸಭಾಂಗಣದಲ್ಲಿ ನಡೆಯುವ ಕಾರ್ಯಕ್ರಮವನ್ನು ಭಾರತೀಯ ವಿದ್ಯಾಭವನದ ಅಧ್ಯಕ್ಷ ಎನ್‌.ರಾಮಾನುಜ ಉದ್ಘಾಟಿಸಲಿದ್ದಾರೆ.

ಹಿರಿಯ ಲೇಖಕ ಶ್ರೀನಿವಾಸ ವೈದ್ಯ ಅವರು ಸಮಾರಂಭದ ಅಧ್ಯಕ್ಷತೆಯನ್ನು ವಹಿಸಲಿದ್ದು,ನಿವೃತ್ತ ಪೊಲೀಸ್‌ ಅಧಿಕಾರಿ ಡಿ.ವಿ.ಗುರು ಪ್ರಸಾದ್‌ ಅವರು ಅರಪಂಜಿ ವಿಶೇಷಾಂಕವನ್ನು ಬಿಡುಗಡೆಗೊಳಿಸಲಿದ್ದಾರೆ. ಕಾರ್ಯಕ್ರಮದಲ್ಲಿ ಅಪರಂಜಿ ಪತ್ರಿಕೆಯ ಸಂಪಾದಕ ಎಂ. ಶಿವಕುಮಾರ್‌, ಅಪರಂಜಿ ಪತ್ರಿಕೆ ನಡೆದು ಬಂದದಾರಿ ಬಗ್ಗೆ ಬೆಳಕು ಚೆಲ್ಲಲಿದ್ದಾರೆ.

ಅಪರಂಜಿ ಲೇಖಕಿಯರ ಬದುಕು ಬರಹ ಕುರಿತ ಕಾರ್ಯಕ್ರಮದಲ್ಲಿ ವಾಣಿ ಸುರೇಶ್‌, ಕುಮುದ ಪುರುಷೋತ್ತಮ್‌, ಶ್ಯಾಮಲ ರವಿಶಂಕರ್‌, ಸಹನಾ ಪ್ರಸಾದ್‌ ಸೇರಿದಂತೆ ಮತ್ತಿತರರು ಪಾಲ್ಗೊಳ್ಳಲಿದ್ದಾರೆ. ಇದೇ ವೇಳೆ ಹಾಸ್ಯ ಭಾಷಣಕಾರ ವೈ.ವಿ.ಗುಂಡೂರಾವ್‌ ಅವರು ಹಾಸ್ಯ ಮಧುರ ಗೀತೆಗಳ ಗಾಯನ ಕಾರ್ಯಕ್ರಮ ನಡೆಸಿಕೊಡಲಿದ್ದಾರೆ ಎಂದು ಪ್ರಕಟಣೆ ತಿಳಿಸಿದೆ.