ತೃಣಮೂಲ ಕಾಂಗ್ರೆಸ್‌ ನಾಯಕ ನಿರ್ಮಲ್‌ ಕುಂಡು ಕೊಲೆ: ಇಬ್ಬರು ಶಂಕಿತರು ಆರೆಸ್ಟ್‌

ಕೋಲ್ಕತ : ತೃಣಮೂಲ ಕಾಂಗ್ರೆಸ್‌ ನಾಯಕ ನಿರ್ಮಲ್‌ ಕುಂಡು ಅವರ ಕೊಲೆಗೆ ಸಂಬಂಧಿಸಿ ಪಶ್ಚಿಮ ಬಂಗಾಲ ಪೊಲೀಸರು ಇಬ್ಬರು ಶಂಕಿತರನ್ನು ಬಂಧಿಸಿರುವುದಾಗಿ ವರದಿಗಳು ತಿಳಿಸಿವೆ.

ಬಂಧಿತ ಆರೋಪಿಗಳಲ್ಲಿ ಒಬ್ಟಾತನು ಬಿಜೆಪಿ ಕಾರ್ಯಕರ್ತ ಸುಮನ್‌ ಕುಂಡು ಹಾಗೂ ಮತ್ತೋರ್ವ ಆರೋಪಿ ಮಾಜಿ ಟಿಎಂಸಿ ಯುವ ನಾಯಕ ಉತ್ತಮ್‌ ಮಂಡಲ್‌ ಎಂದು ವರದಿಗಳು ಹೇಳಿವೆ.

ಟಿಎಂಸಿ ವಾರ್ಡ್‌ ಕಾರ್ಯದರ್ಶಿ ನಿರ್ಮಲ್‌ ಕುಂಡುವನ್ನು ಉತ್ತರ ಕೋಲ್ಕತದ ಡಂಡಂ ನಲ್ಲಿ ನಿನ್ನೆ ಮಂಗಳವಾರ ರಾತ್ರಿ ಬೈಕಿನಲ್ಲಿ ಬಂದಿದ್ದ ಮೂವರು ದುಷ್ಕರ್ಮಿಗಳು ಗುಂಡಿಕ್ಕಿ ಕೊಂದಿದ್ದರು.

ನಿರ್ಮಲ್‌ ಕುಂಡು ಅವರು ಡಂಡಂ ಮುನಿಸಿಪಾಲಿಟಿ ಪ್ರದೇಶದ ವಾರ್ಡ್‌ ನಂಬರ್‌ 6ರ ಟಿಎಂಸಿ ಅಧ್ಯಕ್ಷರಾಗಿದ್ದರು. ಗುಂಡಿನ ದಾಳಿಗೆ ಗುರಿಯಾಗಿದ್ದ ಇವರನ್ನು ಒಡನೆಯೇ ಆಸ್ಪತ್ರೆಗೆ ಒಯ್ಯಲಾಯಿತಾದರೂ ಅಲ್ಲಿ ಆತ ಅದಾಗಲೇ ಮೃತಪಟ್ಟಿರುವುದಾಗಿ ತಿಳಿಸಲಾಯಿತು.