ತುಂಬೆ ಅಣೆಕಟ್ಟಿನಲ್ಲಿ 4.88 ಮೀ. ನೀರು

ಬಂಟ್ವಾಳ: ಮಂಗಳೂರು ನಗರಕ್ಕೆ ನೀರು ಪೂರೈಕೆ ಮಾಡುವ ತುಂಬೆ ಅಣೆಕಟ್ಟಿನಲ್ಲಿ ಬುಧವಾರ ನೀರಿನ ಮಟ್ಟ 4.88 ಮೀ. ಇದ್ದು, ಒಂದು ವೇಳೆ 4.50 ಮೀ.ಗೆ ಇಳಿದರೆ ಶಂಭೂರು ಎಎಂಆರ್‌ ಅಣೆಕಟ್ಟಿನಿಂದ ತುಂಬೆಗೆ ನೀರು ಹರಿಸಬೇಕಾಗುತ್ತದೆ.

ಕಳೆದ ವರ್ಷ ಈ ಸಮಯದಲ್ಲಿ ಎಎಂಆರ್‌ ಅಣೆಕಟ್ಟಿನಿಂದ ಒಂದು ಬಾರಿ ನೀರು ಹರಿಸಿದ್ದರಿಂದ ತುಂಬೆಯಲ್ಲಿ 5.11 ಮೀ. ನೀರು ಇತ್ತು. ಪ್ರಸ್ತುತ ನದಿಯಲ್ಲಿ ನೀರಿನ ಒಳಹರಿವು ನಿಂತಿದ್ದರೂ ಕಳೆದ ವರ್ಷಕ್ಕೆ ಹೋಲಿಸಿದರೆ ನೀರಿನ ಒಳಹರಿವು ಹೆಚ್ಚು ದಿನಗಳವರೆಗೆ ಕಂಡುಬಂದ ಹಿನ್ನೆಲೆಯಲ್ಲಿ ಈ ಬಾರಿ ನೀರಿನ ಸಮಸ್ಯೆ ಬಾರದು ಎಂದು ಅಧಿಕಾರಿಗಳು ಹೇಳುತ್ತಾರೆ.

ಈ ಬಾರಿ ನೀರಿನ ಒಳಹರಿವು ಹೆಚ್ಚಾಗಿದ್ದ ಕಾರಣ ಹಲವು ಬಾರಿ 6 ಮೀ.ಗಿಂತ ಹೆಚ್ಚಿನ ನೀರನ್ನು ಹೊರಗೆ ಬಿಡಲಾಗಿತ್ತು. ತುಂಬೆಯಲ್ಲಿ ಈಗ ಇರುವುದು 4.88 ಮೀ. ಆದರೂ ಎಎಂಆರ್‌ ಅಣೆಕಟ್ಟಿನಲ್ಲಿ ಹೇರಳವಾದ ಜಲಸಂಗ್ರಹವಿದೆ. ತುಂಬೆಯಲ್ಲಿ 4.50 ಮೀ.ಗೆ ನೀರು ಇಳಿದರೆ ಮಾತ್ರ ಎಎಂಆರ್‌ನಿಂದ ಹರಿಸಲಾಗುವುದು ಎಂದು ಸಹಾಯಕ ಕಾರ್ಯಪಾಲಕ ಎಂಜಿನಿಯರ್‌ ನರೇಶ್‌ ಶೆಣೈ ತಿಳಿಸಿದ್ದಾರೆ.