Theft Case ಕಟಪಾಡಿ: ಮನೆಯಲ್ಲಿ ಕಳವು; ಪ್ರಕರಣ ದಾಖಲು

ಕಾಪು: ಸಂಸಾರ ಸಹಿತ ಥಾಯ್ಲೆಂಡ್‌ನ‌ಲ್ಲಿ ವಾಸವಿರುವ ಹಬಿಬುಲ್ಲಾ ಸಾಹೇಬ್‌ ಅವರಿಗೆ ಸೇರಿದ ಕಟಪಾಡಿ ಮೂಡುಬೆಟ್ಟು ನಾಗಬನದ ಬಳಿಯ ಮನೆಯಲ್ಲಿ ಕಳ್ಳತನ ನಡೆದ ಘಟನೆ ಶನಿವಾರ ಬೆಳಕಿಗೆ ಬಂದಿದೆ.

ಪ್ರಸ್ತುತ ಹಬಿಬುಲ್ಲಾ ಸಾಹೇಬ್‌ ಅವರು ವಿದೇಶದಲ್ಲಿರುವುದರಿಂದ ಅವರ ಅಳಿಯ ಮಹಮ್ಮದ್‌ ಶಕೀಲ್‌ ಮನೆಯನ್ನು ನೋಡಿಕೊಳ್ಳುತ್ತಿದ್ದರು. ಆ ಮನೆಯನ್ನು ಕೆಲಸದಾಕೆ ಪ್ರತೀದಿನ ಶಕೀಲ್‌ ಅವರ ಬಳಿಯಿಂದ ಬೀಗದ ಕೀ ಪಡೆದುಕೊಂಡು ಬಂದು ಮನೆಯನ್ನು ಸ್ವಚ್ಛಗೊಳಿಸಿ ಬಳಿಕ ಮನೆಯ ಕೀಯನ್ನು ತಂದು ನೀಡುತ್ತಿದ್ದರು. ಆ. 5ರಂದು ಕೂಡಾ ಮನೆ ಸ್ವಚ್ಛಗೊಳಿಸಿ ಆಕೆ ಕೀಯನ್ನು ವಾಪಸ್‌ ನೀಡಿದ್ದು, ಶನಿವಾರ ಎಂದಿನಂತೆ ಕೀ ಪಡೆದು ಸ್ವಚ್ಛಗೊಳಿಸಿ ತೆರಳಿದ್ದರು. ಸಂಜೆ ಶಕೀಲ್‌ ಬಂದು ನೋಡಿದಾಗ ಯಾರೋ ಕಳ್ಳರು ಯಾವುದೋ ಬಲವಾದ ಸಾಧನದಿಂದ ಜಖಂಗೊಳಿಸಿ ಬಾಗಿಲು ತೆರೆದು ಒಳಗೆ ಪ್ರವೇಶಿಸಿರುವುದು ಬೆಳಕಿಗೆ ಬಂದಿದೆ.

ಮನೆಯೊಳಗೆ ಪ್ರವೇಶಿಸಿದ್ದ ಕಳ್ಳರು 1,000 ರೂ. ಮೌಲ್ಯದ ಸಿ.ಸಿ. ಕೆಮರಾ ಡಿವಿಆರ್‌ ಹಾಗೂ 10,000 ರೂ. ಮೌಲ್ಯದ ಕಬ್ಬಿಣದ ಲಾಕರನ್ನು ಕಳವು ಮಾಡಿಕೊಂಡು ಹೋಗಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಮನೆಗೆ ಅಳವಡಿಸಿದ್ದ ಸಿಸಿ ಕೆಮರಾ ಈ ಮೊದಲೇ ಹಾಳಾಗಿತ್ತು ಎಂದು ತಿಳಿದು ಬಂದಿದೆ.

ಕಾಪು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.