ನೆಲಕ್ಕೆ ನೀರುಣಿಸಿದ ಕೂಟೇಲು ಕಿಂಡಿ ಅಣೆಕಟ್ಟು

ನಿಡ್ಪಳ್ಳಿ: ಇಲ್ಲಿಯ ಕೂಟೇಲು ಎಂಬಲ್ಲಿ ನಿರ್ಮಿಸಿದ ಕಿಂಡಿ ಅಣೆಕಟ್ಟು ಸ್ಥಳೀಯರಿಗೆ ಪ್ರಯೋಜನಕಾರಿಯಾಗಿದೆ. ಮಲೆಗಾಲ ಕಳೆದು ಬೇಸಗೆ ಕಾಲಿಟ್ಟ ಕೂಡಲೇ ಜಮೀನು, ತೋಟ, ಗದ್ದೆಗಳಿಗೆ ನೀರು ಹಾಯಿಸಬೇಕಾಗುತ್ತದೆ. ಹರಿದು ಪೋಲಾಗುವ ನೀರನ್ನು ಕಟ್ಟೆ ಕಟ್ಟಿ ನಿಲ್ಲಿಸಿ, ಅಂತರ್ಜಲವನ್ನೂ ಹೆಚ್ಚಿಸಲು ಸಹಕಾರಿಯಾಗುವುದರಿಂದ ಎರಡು ತಿಂಗಳು ನೀರು ಹಾಯಿಸುವ ಶ್ರಮವೂ ಉಳಿತಾಯವಾಗುತ್ತದೆ.

ನಾಲ್ಕು ವರ್ಷಗಳ ಹಿಂದೆ ಸಣ್ಣ ನೀರಾವರಿ ಇಲಾಖೆ ವತಿಯಿಂದ ನಿಡ್ಪಳ್ಳಿ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಕೂಟೇಲು ಎಂಬಲ್ಲಿ ನಿರ್ಮಿಸಿದ ಕಿಂಡಿ ಅಣೆಕಟ್ಟಿಗೆ ಸ್ಥಳೀಯರು ಹಲಗೆ ಹಾಕುತ್ತಿದ್ದು, ಸುಮಾರು ಅರ್ಧ ಕಿ.ಮೀ. ವರೆಗೆ ನೀರು ತುಂಬುತ್ತದೆ. ಕೆರೆ, ಬಾವಿಗಳು ತುಂಬಿ ನೀರಿನ ಸಮಸ್ಯೆಯನ್ನು ತಕ್ಕ ಮಟ್ಟಿಗೆ ನೀಗಿಸುತ್ತಿದೆ ಎಂದು ಸ್ಥಳೀಯರು ಹೇಳುತ್ತಾರೆ.

ಎರಡು ತಿಂಗಳು ನೀರಿನ ಸಮಸ್ಯೆ ಇಲ್ಲ
ಹರಿದು ಹೋಗುವ ನೀರನ್ನು ಅಣೆಕಟ್ಟು ಕಟ್ಟಿ ಸಂಗ್ರಹಿಸಿದರೆ ಅಂತರ್ಜಲ ಮಟ್ಟ ಹೆಚ್ಚುತ್ತದೆ. ಇನ್ನು ಎರಡು ತಿಂಗಳು ನೀರಿನ ಸಮಸ್ಯೆ ಇಲ್ಲದೆ ನಿಭಾಯಿಸಬಹುದು. ತಂಪಾದ ವಾತಾವರಣವೂ ಹಿತವೆನಿಸುತ್ತದೆ. ಎಲ್ಲ ಕಡೆಗಳಲ್ಲೂ ಇದನ್ನು ಅನುಸರಿಸಿದರೆ ಪ್ರಯೋಜನಕಾರಿಯಾದೀತು.
   ಚಂದ್ರಶೇಖರ ಪ್ರಭು ಗೊಳಿತ್ತಡಿ
   ಸ್ಥಳೀಯ ಕೃಷಿಕ

ಕೃಷಿಕರಿಗೆ ಲಾಭವಿದೆ
ಅನಾವಶ್ಯಕವಾಗಿ ಹರಿದು ಹೋಗುವ ನೀರನ್ನು ಕಿಂಡಿ ಅಣೆಕಟ್ಟು ಮೂಲಕ ನಿಲ್ಲಿಸಿದರೆ ಕೃಷಿಕರಿಗೆ ಲಾಭವಿದೆ. ಇವುಗಳ ಬಗ್ಗೆ ಸರಕಾರ ಮತ್ತು ಇಲಾಖೆಗಳು ಆದ್ಯತೆ ನೀಡಿದರೆ ಅಂತರ್ಜಲ ಮಟ್ಟ ಇನ್ನಷ್ಟು ಹೆಚ್ಚುತ್ತದೆ, ಬರಗಾಲದ ಛಾಯೆ ಆವರಿಸುವುದನ್ನು ತಡೆಯುತ್ತದೆ. ಅವಕಾಶ ಇದ್ದಲ್ಲೆಲ್ಲ ಗ್ರಾ.ಪಂ.ಗಳು ಕಿಂಡಿ ಅಣೆಕಟ್ಟು ನಿರ್ಮಿಸಲು ಮುಂದಾಗಬೇಕು. 
– ಸುಮತಿ ಗಣೇಶ್‌, ಆನಾಜೆ
  ಅಧ್ಯಕ್ಷರು, ನಿಡ್ಪಳ್ಳಿ ಗ್ರಾಮ ಪಂಚಾಯತ್ 

ವಿಶೇಷ ವರದಿ