ಪದ್ಮನಾಭ ತೀರ್ಥರ ಆರಾಧನೆ; ಮಂತ್ರಾಲಯ ಶ್ರೀ ಹೇಳಿಕೆಗೆ ಉತ್ತರಾದಿ ಮಠ ಆಕ್ಷೇಪ

ಕಲಬುರಗಿ: ಕೊಪ್ಪಳ ಜಿಲ್ಲೆ ಆನೆಗೊಂದಿಯ ನವ ವೃಂದಾವನಗಡ್ಡಿ ಯಲ್ಲಿ ಪದ್ಮನಾಭ ತೀರ್ಥರ ಆರಾಧನೆಗೆ ಸಂಬಂಧಿಸಿದಂತೆ ಮಂತ್ರಾಲಯ ಮಠಾಧೀಶರಾದ ಶ್ರೀ ಸುಬುಧೇಂದ್ರತೀರ್ಥರು ನೀಡಿರುವ ಹೇಳಿಕೆ ಅವರ ಪೀಠ-ಪರಂಪರೆಗೆ ತಕ್ಕುದ್ದಲ್ಲ ಎಂದು ಶ್ರೀಉತ್ತರಾದಿ ಮಠದ ಮುಖ್ಯ ನಿರ್ವಹಣಾ ಧಿಕಾರಿ ಪಂ. ವಿದ್ಯಾಧೀಶಾಚಾರ್ಯ ಗುತ್ತಲ್‌ ಹೇಳಿದ್ದಾರೆ.

ಪರ ಮಠೀಯರನ್ನು ಟೀಕಿಸುವ ಭರದಲ್ಲಿ,ಶ್ರೀ ಸುಬುಧೇಂದ್ರತೀರ್ಥರು ವಾಸ್ತವಾಂಶಗಳಿಗೆ ದೂರವಾದ ಹೇಳಿಕೆ ಗಳನ್ನು ನೀಡಿದ್ದು ಅಲ್ಲದೇ ಸರ್ವೋಚ್ಚ ನ್ಯಾಯಾಲಯದ ಆದೇಶವನ್ನು ಉಲ್ಲಂಘಿಸಿದಂತಿದೆ. ಪರ ಮಠೀಯರು ಸೌಹಾರ್ದ ಸಂಧಾನಕ್ಕಾಗಿ ಕಿಂಚಿತ್ತೂ ಪ್ರಯತ್ನ ಮಾಡುತ್ತಿಲ್ಲ ಎಂದಿರುವುದು ಉತ್ತರಾದಿಮಠ ಹಾಗೂ ಸಮಸ್ತ ಮಾಧ್ವ ಸಮುದಾಯದ ಸಜ್ಜನರಿಗೆ ಘಾಸಿ ಉಂಟು ಮಾಡಿದೆ ಎಂದು ತಿಳಿಸಿದ್ದಾರೆ.