ವಿದ್ಯಾರ್ಥಿಗಳ ಹೊಡೆದಾಟ “ವೈರಲ್‌’ 

ಮಂಗಳೂರು: ನಗರದ ಮಿಲಾಗ್ರಿಸ್‌ ಕಾಲೇಜಿನ ವಿದ್ಯಾರ್ಥಿಯೊಬ್ಬನಿಗೆ ಅದೇ ಕಾಲೇಜಿನ ವಿದ್ಯಾರ್ಥಿ ತಂಡವೊಂದು ಬೆನ್ನಟ್ಟಿ  ಹೊಡೆಯುವ ದೃಶ್ಯ ‘ವೈರಲ್‌’ ಆಗಿದೆ. ಘಟನೆ ಬುಧವಾರ ಸಂಜೆ ನಡೆದಿದೆ ಎನ್ನಲಾಗಿದ್ದು, ಕಾಲೇಜು ಗೇಟ್‌ನಿಂದ ಒಬ್ಬ ವಿದ್ಯಾರ್ಥಿಯನ್ನು ವಿದ್ಯಾರ್ಥಿಗಳ ತಂಡವೊಂದು ಹೊಡೆಯುತ್ತಿರುವುದು ಹಾಗೂ ಆ ವಿದ್ಯಾರ್ಥಿ ಓಡಿ ತಪ್ಪಿಸಿಕೊಳ್ಳಲು ಯತ್ನಿಸಿದಾಗ ಬೆನ್ನಟ್ಟುತ್ತಿರುವ ದೃಶ್ಯದ ವೀಡಿಯೋ ಮೊಬೈಲ್‌ ಫೋನ್‌ಗಳಲ್ಲಿ ಹರಿದಾಡುತ್ತಿದೆ. 

ವಿದ್ಯಾರ್ಥಿಗಳ ತಂಡ ಬೆನ್ನಟ್ಟಿದಾಗ ಆ ವಿದ್ಯಾರ್ಥಿ ಪಕ್ಕದಲ್ಲಿರುವ ಫಳ್ನೀರ್‌ ರಸ್ತೆ ದಾಟಿ ಮಿಲಾಗ್ರಿಸ್‌ ಚರ್ಚ್‌ ಕಂಪೌಂಡ್‌ ಹಾಗೂ ಮಿಲಾಗ್ರಿಸ್‌ ಚರ್ಚ್‌ನ ಮುಖ್ಯ ಗೇಟ್‌ ತನಕವೂ ಹೋಗಿ ಆತನಿಗೆ ಹಲ್ಲೆ ಮಾಡುತ್ತಿರುವ ದೃಶ್ಯ ಈ ವೀಡಿಯೋದಲ್ಲಿದೆ. ಹೊಡೆತ ತಿಂದಿರುವ ವಿದ್ಯಾರ್ಥಿ ಇನ್ನೋರ್ವ ವಿದ್ಯಾರ್ಥಿಯ ತಂದೆಯನ್ನು ಹೀಯಾಳಿಸಿದ್ದಕ್ಕಾಗಿ ಈ ಘಟನೆ ನಡೆದಿದೆ ಎನ್ನಲಾಗಿದೆ. ಬಂದರು ಪೊಲೀಸರು ಎರಡೂ ಕಡೆಯ ವಿದ್ಯಾರ್ಥಿಗಳನ್ನು ಕರೆಸಿ ಎಚ್ಚರಿಕೆ ನೀಡಿ ಬಿಟ್ಟಿದ್ದಾರೆ. ಯಾವುದೇ ಪ್ರಕರಣ ದಾಖಲಾಗಿಲ್ಲ.