ಶದಾಬ್ ಖಾನ್, ಶಾರ್ಟ್ ಒಪ್ಪಂದ ಕಡಿತಗೊಳಿಸಿದ ಸರ್ರೆ ಕೌಂಟಿ

ಲಂಡನ್: ಪಾಕಿಸ್ಥಾನದ ಶದಾಬ್ ಖಾನ್ ಮತ್ತು ಆಸ್ಟ್ರೇಲಿಯಾದ ಡಾರ್ಸಿ ಶಾರ್ಟ್ ಅವರ ಜೊತೆಗಿನ ಒಪ್ಪಂದವನ್ನು ಸರ್ರೆ ಕೌಂಟಿ ಅಂತ್ಯಗೊಳಿಸಿದೆ. ಕೋವಿಡ್-19 ಕಾರಣದಿಂದ ಕೌಂಟಿ ಕೂಟ ಮುಂದೂಡಿಕೆಯಾದ ಕಾರಣಕ್ಕೆ ಈ ನಿರ್ಧಾರ ಕೈಗೊಳ್ಳಲಾಗಿದೆ.

ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ ಮೇ 28ರಿಂದ ಟಿ20 ಬ್ಲಾಸ್ಟ್ ನಡೆಯಬೇಕಿತ್ತು. ಅದರಲ್ಲಿ ಶದಾಬ್ ಮತ್ತು ಶಾರ್ಟ್ ಸರ್ರೆ ಪರ ಆಡಬೇಕಿತ್ತು. ಆದರೆ ಕೋವಿಡ್-19 ಸೋಂಕಿನ ಕಾರಣ ಇಂಗ್ಲೆಂಡ್ ಮತ್ತು ವೇಲ್ಸ್ ನ ಎಲ್ಲಾ ವೃತ್ತಿಪರ ಕ್ರಿಕೆಟ್ ಅನ್ನು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ಜುಲೈ ಒಂದರವರೆಗೆ ಮುಂದೂಡಿಕೆ ಮಾಡಿದ ಕಾರಣ ಟಿ20 ಬ್ಲಾಸ್ಟ್ ಕೂಡಾ ಮುಂದೂಡಿಕೆಯಾಗಿದೆ.

ಕೂಟ ಮುಂದೂಡಿಕೆ ಮತ್ತು ದೇಶಿಯ ಕ್ರಿಕೆಟ್ ನಡೆಯುವ ಬಗೆಗಿನ ಅನಿರ್ಧಿಷ್ಟತೆಯಿಂದಾಗಿ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಎರಡೂ ಕಡೆಯಿಂದಲೂ ಒಪ್ಪಿಯೇ ನಿರ್ಧರಿಸಲಾಗಿದೆ ಎಂದು ಸರ್ರೆ ಹೇಳಿಕೆ ನೀಡಿದೆ.

ಇತರ ಕೌಂಟಿಗಳಾದ ಯಾರ್ಕ್ ಶೈರ್, ಲ್ಯಾನ್ ಶೈರ್, ಹ್ಯಾಂಪ್ ಶೈರ್ ಗಳು ವಿದೇಶಿ ಆಟಗಾರರನನ್ನು ಕೈಬಿಟ್ಟಿದೆ. ಭಾರತದ ಚೇತೇಶ್ವರ ಪೂಜಾರ ಮತ್ತು ರವಿ ಅಶ್ವಿನ್ ಅದರಲ್ಲಿ ಪ್ರಮುಖರು.