ರಾಜ್ಯಸಭೆ 55 ಸ್ಥಾನಕ್ಕೆ ಮಾರ್ಚ್ 26ರಂದು ಚುನಾವಣೆ, ರಾತ್ರಿ ಫಲಿತಾಂಶ ಘೋಷಣೆ

ನವದೆಹಲಿ: 55 ರಾಜ್ಯ ಸಭಾ ಸದಸ್ಯರು ಏಪ್ರಿಲ್ ನಲ್ಲಿ ನಿವೃತ್ತಿಯಾಗುತ್ತಿರುವ ಹಿನ್ನೆಲೆಯಲ್ಲಿ ಮಾರ್ಚ್ 26ರಂದು ನೂತನ ಸದಸ್ಯರ ಆಯ್ಕೆಗಾಗಿ ಹದಿನೇಳು ರಾಜ್ಯಗಳಲ್ಲಿ ಚುನಾವಣೆ ನಡೆಯಲಿದ್ದು, ಅದೇ ದಿನ ಫಲಿತಾಂಶ ಪ್ರಕಟವಾಗಲಿದೆ ಎಂದು ಚುನಾವಣಾ ಆಯೋಗ ತಿಳಿಸಿದೆ.

ಪ್ರಸ್ತುತ ಮೇಲ್ಮನೆಯಲ್ಲಿ ಭಾರತೀಯ ಜನತಾ ಪಕ್ಷ 16 ಸ್ಥಾನ, ಕಾಂಗ್ರೆಸ್ 13 ಸ್ಥಾನ, ತೃಣಮೂಲ ಕಾಂಗ್ರೆಸ್ (ಟಿಎಂಸಿ) 4, ಎಐಎಡಿಎಂಕೆ 4, ಬಿಜು ಜನತಾ ದಳ 3, ಜೆಡಿಯು 3 ಮತ್ತು ಎನ್ ಸಿಪಿ 2, ಶಿವಸೇನೆ 1, ರಿಪಬ್ಲಿಕ್ ಪಾರ್ಟಿ ಆಫ್ ಇಂಡಿಯಾ(ಅಠಾವಳೆ), ಟಿಡಿಪಿ, ಟಿಆರ್ ಎಸ್, ಸಿಪಿಐಎಂ, ಬೋಡೋ ಲ್ಯಾಂಡ್ ಪೀಪಲ್ಸ್ ಫ್ರಂಟ್, ಆರ್ ಜೆಡಿ 01 ಸ್ಥಾನ ಹೊಂದಿದೆ.

ಚುನಾವಣಾ ಆಯೋಗದ ಮಾಹಿತಿ ಪ್ರಕಾರ, ರಾಜ್ಯಸಭೆಯ 55 ಸ್ಥಾನಗಳಿಗೆ ನಡೆಯಲಿರುವ ಚುನಾವಣೆಗೆ ಮಾರ್ಚ್ 6ರಂದು ಅಧಿಸೂಚನೆ ಹೊರಡಿಸಲಾಗುವುದು. ನಾಮಪತ್ರ ಸಲ್ಲಿಸಲು ಕೊನೆಯ ದಿನಾಂಕ ಮಾರ್ಚ್ 13. ಮಾರ್ಚ್ 16ರಂದು ನಾಮಪತ್ರ ಪರಿಶೀಲನೆ, ನಾಮಪತ್ರ ವಾಪಸ್ ಪಡೆಯುವ ಕೊನೆಯ ದಿನಾಂಕ ಮಾರ್ಚ್ 18. ರಾಜ್ಯಸಭೆಗೆ ಮಾ.26ರಂದು ಬೆಳಗ್ಗೆ 9ರಿಂದ ಸಂಜೆ 4ರವರೆಗೆ ಮತದಾನ ನಡೆಯಲಿದೆ. 5ಗಂಟೆಯಿಂದ ಮತಎಣಿಕೆ ಆರಂಭವಾಗಲಿದೆ ಎಂದು ತಿಳಿಸಿದೆ.