ಟೆನಿಸ್‌ಗೆ ನಿವೃತ್ತಿ ಘೋಷಿಸಿದ ಚೆಕ್‌ನ ರಾಡೆಕ್‌ ಸ್ಟೆಪನೆಕ್‌

ಪ್ರೇಗ್‌(ಚೆಕ್‌ ಗಣರಾಜ್ಯ): ಚೆಕ್‌ ಗಣರಾಜ್ಯದ ತಾರಾ ಟೆನಿಸ್‌ ಆಟಗಾರ ರಾಡೆಕ್‌ ಸ್ಟೆಪನೆಕ್‌ ಟೆನಿಸ್‌ಗೆ ನಿವೃತ್ತಿ ಘೋಷಿಸಿದ್ದಾರೆ. ಸ್ಟೆಪನೆಕ್‌ ಕಳೆದ ಜನವರಿಯಲ್ಲಿ ಆಸ್ಟ್ರೇಲಿಯಾ ಓಪನ್‌ ಆಡಿರುವುದೇ ಕೊನೆ. ಆಮೇಲೆ ಗಾಯದಿಂದ ಸೊಂಟದ ಬೆನ್ನುಮೂಳೆಯ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಹೀಗಾಗಿ ಮತ್ತೆ ಕೋರ್ಟ್‌ಗೆ ಮರಳಲು ಸಾಧ್ಯವಾಗಲಿಲ್ಲ.

38 ವರ್ಷದ ಸ್ಟೆಪನೆಕ್‌ ಪುರುಷರ ಡಬಲ್ಸ್‌ನಲ್ಲಿ ಎರಡು ಗ್ರ್ಯಾನ್‌ಸ್ಲಾಮ್‌ ಜಯಿಸಿದ್ದಾರೆ. 2012ರಲ್ಲಿ ಆಸ್ಟ್ರೇಲಿಯಾ ಓಪನ್‌ ಮತ್ತು 2013ರಲ್ಲಿ ಯುಎಸ್‌ ಓಪನ್‌ನಲ್ಲಿ ಗೆಲುವು ಪಡೆದಿದ್ದಾರೆ. ಈ ಎರಡೂ ಗ್ರ್ಯಾನ್‌ಸ್ಲಾಮ್‌ ಗೆದ್ದಿರುವುದು ಭಾರತದ ಲಿಯಾಂಡರ್‌ ಪೇಸ್‌ ಜತೆಗಾರರಾಗಿ ಅನ್ನುವುದು ವಿಶೇಷವಾಗಿದೆ. ಸಿಂಗಲ್ಸ್‌ನಲ್ಲಿ ವಿಶ್ವ ನಂ.8ನೇ ಶ್ರೇಯಾಂಕದವರೆಗೂ ಏರಿದ್ದರು. ಇದು ಸ್ಟೆಪನೆಕ್‌ ಅವರ ಜೀವನ ಶ್ರೇಷ್ಠ ಶ್ರೇಯಾಂಕವಾಗಿದೆ.