ನಿವೃತ್ತಿ ವದಂತಿ ನಿರಾಕರಿಸಿದ ಪ್ರೊ ಕಬಡ್ಡಿ ತಾರೆ ಅನೂಪ್‌ 

ಲಕ್ನೋ: ಅಂತಾರಾಷ್ಟ್ರೀಯ ಕಬಡ್ಡಿಯಿಂದ ನಿವೃತ್ತಿಯಾಗುವ ಸುದ್ದಿಯನ್ನು ಪ್ರೊ ಕಬಡ್ಡಿಯ ತಾರಾ ರೈಡರ್‌ ಯು ಮುಂಬಾ ತಂಡದ ನಾಯಕ ಅನೂಪ್‌ ಕುಮಾರ್‌ ಮತ್ತೂಮ್ಮೆ ನಿರಾಕರಿಸಿದ್ದಾರೆ.ನಾನು ಸದ್ಯದಲ್ಲೇ ನಿವೃತ್ತಿಯಾಗುತ್ತೇನೆ ಅನ್ನುವುದು ಸುಳ್ಳು ಸುದ್ದಿ. ಈ ಹಿಂದೆ ಕೂಡ ಈ ತರಹದ ಸುದ್ದಿಯನ್ನು ಹಬ್ಬಿಸಲಾಗಿತ್ತು. ಇದು ಮನಸ್ಸಿಗೆ ನೋವು ತರುತ್ತದೆ. ನಾನು ಎಲ್ಲಿಯೂ ನಿವೃತ್ತಿ ಆಗುತ್ತೇನೆ ಎಂದು ಹೇಳಿಲ್ಲ. ಕಬಡ್ಡಿ ಆಡುವ ಶಕ್ತಿ ತನ್ನಲ್ಲಿ ಇನ್ನೂ ಇದೆ ಎಂದು ತಿಳಿಸಿದ್ದಾರೆ.

ಪ್ರೊ ಕಬಡ್ಡಿಯಲ್ಲಿ 400ಕ್ಕೂ ಅಧಿಕ ಅಂಕ ಸಂಪಾದಿಸಿರುವ ಕೆಲವೇ ಆಟಗಾರರಲ್ಲಿ ಅನೂಪ್‌ ಕುಮಾರ್‌ ಕೂಡ ಒಬ್ಬರು. ಅನೂಪ್‌ ನಿವೃತ್ತಿಯಾಗುತ್ತಾರೆ ಎಂದು ಕಳೆದ ವರ್ಷ ನಡೆದ ಕಬಡ್ಡಿ ವಿಶ್ವಕಪ್‌ನಲ್ಲಿಯೂ ಸುದ್ದಿಯಾಗಿತ್ತು. ಆದರೆ ಆ ಸಂದರ್ಭದಲ್ಲಿ ಅನೂಪ್‌ ನಿವೃತ್ತಿ ಸುದ್ದಿಯನ್ನು ತಳ್ಳಿ ಹಾಕಿದ್ದರು.

ಹರಿಯಾಣದ ಅನೂಪ್‌ ಶಾಲಾ ದಿನಗಳಿಂದಲೇ ಕಬಡ್ಡಿ ಆಡುತ್ತಾ ಬಂದವರು. ತಂದೆ ಅಭ್ಯಾಸದ ಕಡೆ ಲಕ್ಷ ಕೂಡ ಎಂದರೂ ಶಿಕ್ಷಣದ ಕಡೆ ದೃಷ್ಟಿ ಹರಿಸದ ಅನೂಪ್‌ ಕಬಡ್ಡಿಯನ್ನು ಅಭ್ಯಾಸ ನಡೆಸುತ್ತಿದ್ದರು. ಪ್ರೊ ಕಬಡ್ಡಿಯ ಕಳೆದ ನಾಲ್ಕು ಆವೃತ್ತಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಭಾರತ ತಂಡದ ನಾಯಕರೂ ಆಗಿದ್ದಾರೆ. ಸದ್ಯ ಪ್ರೊ ಕಬಡ್ಡಿಯಲ್ಲಿ ಯು ಮುಂಬಾ ತಂಡವನ್ನು ಮುನ್ನಡೆಸುತ್ತಿದ್ದಾರೆ.