ಪ್ರಧಾನಿ ಮೋದಿ ಮಹಾ ಸುಳ್ಳುಗಾರ: ರಾಹುಲ್‌

ಕೊಪ್ಪಳ: ಹೈದ್ರಾಬಾದ್‌ ಕರ್ನಾಟಕದ ನೆಲದಿಂದ ಚುನಾವಣಾ ರಣಕಹಳೆ ಮೊಳಗಿಸಿರುವ ಎಐಸಿಸಿ ಅಧ್ಯಕ್ಷ ರಾಹುಲ್‌ ಗಾಂಧಿ  ಭಾನುವಾರವೂ ಕೇಂದ್ರ ಸರ್ಕಾರ ಹಾಗೂ ಪ್ರಧಾನಿ ನರೇಂದ್ರ ಮೋದಿ ಅವರ ವಿರುದ್ಧ ನೇರಾ ನೇರ ವಾಗ್ಧಾಳಿ ಮುಂದುವರಿಸಿದರು. ತಾಮು ಪಾಲ್ಗೊಂಡ ರ್ಯಾಲಿಯಲ್ಲಿ ಆಕ್ರೋಶ ಭರಿತರಾಗಿಯೇ ಮಾತನಾಡಿದ ರಾಹುಲ್‌, “ಮೋದಿ   ಮಹಾನ್‌ ಸುಳ್ಳುಗಾರ’ ಎಂದು ಪುನರುಚ್ಚರಿಸಿದ್ದಾರೆ.

ಕೊಪ್ಪಳ ಜಿಲ್ಲೆಯ ಯಲಬುರ್ಗಾ, ಕುಷ್ಟಗಿ, ಕನಕಗಿರಿ, ಗಂಗಾವತಿ ಹಾಗೂ ಕಾರಟಗಿಯಲ್ಲಿ ರೋಡ್‌ ಶೋ, ಪಕ್ಷದ ಸಮಾವೇಶದಲ್ಲಿ ಪಾಲ್ಗೊಂಡು ವಾಕ್ಸಮರ ನಡೆಸಿದರು. ಪ್ರಧಾನಿ ನರೇಂದ್ರ ಮೋದಿ ಅವರು ಕರ್ನಾಟಕದ ಬಸವಣ್ಣನ ನೆಲದಲ್ಲಿ ನಿಂತು ಮಾತನಾಡುತ್ತಾರೆ. ಆದರೆ ಹೇಳಿದಂತೆ ಯಾವುದನ್ನೂ ಮಾಡುತ್ತಿಲ್ಲ. ಲೋಕಸಭೆಯಲ್ಲೂ ಕಾಯಕವೇ ಕೈಲಾಸ ಎನ್ನುವ ಬಸವಣ್ಣನ ಸಿದ್ಧಾಂತ ಪ್ರಸ್ತಾಪ ಮಾಡುತ್ತಾರೆ. ಯಾವುದೇ ಕಾಯಕ ಮಾಡುತ್ತಿಲ್ಲ. ಎನ್‌ಡಿಎ ಸರ್ಕಾರ ಕೇವಲ 10 ಕೋಟಿ ಬಂಡವಾಳ ಶಾಹಿಗಳ, ಕೋಟ್ಯಧಿಧೀಶರ ಪರವಾಗಿ ಕೆಲಸ ಮಾಡುತ್ತಿದೆ. ಬಡ ಜನರ, ರೈತಪರ, ಅವರ ಕಲ್ಯಾಣಕ್ಕೆ ಹಣ ನೀಡುತ್ತಿಲ್ಲ ಎಂದು ಆರೋಪಿಸಿದರು.

“ರೈತರ ಸಾಲ ಮನ್ನಾ ಮಾಡಿ ಎಂದು ನಾನು ಒಂದು ಬಾರಿ ಪ್ರಧಾನಿ ಮೋದಿ ಮೋದಿ ಕಚೇರಿಗೆ ತೆರಳಿ ಬೇಡಿಕೆ ಮುಂದಿಟ್ಟಿದ್ದೆ. ಆದರೆ ನಮ್ಮ ಬೇಡಿಕೆಗೆ ಪ್ರಧಾನಿ ಉತ್ತರ ನೀಡಲೇ ಇಲ್ಲ. ಭರವಸೆಯನ್ನೂ ಕೊಡಲಿಲ್ಲ. ಸೌಜನ್ಯಕ್ಕೂ ಸಾಲ ಮನ್ನಾದ ಕುರಿತು ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ. ಆದರೆ ದೇಶದಲ್ಲಿ ಬಂಡವಾಳ ಶಾಹಿಗಳ 10 ಲಕ್ಷ ಕೋಟಿ ಸಾಲವನ್ನು ಕೇಂದ್ರ ಸರ್ಕಾರ ನಿಧಾನವಾಗಿ ಮನ್ನಾ ಮಾಡುತ್ತಿದೆ. ಆದರೆ ರೈತರ 1 ರೂ. ಸಾಲವನ್ನೂ ಮನ್ನಾ ಮಾಡಲಿಲ್ಲ. ಕೇಂದ್ರ ರೈತರ ಪರವಾಗಿದೆಯಾ? ಕೇವಲ 10 ಕೋಟಿ ಬಂಡವಾಳಶಾಹಿ ಪರವಾಗಿದೆಯಾ ಎನ್ನುವುದನ್ನು ಜನತೆ ನೋಡಬೇಕಿದೆ ಎಂದರು.

ದೇಶದ ಖಜಾನೆಗೆ ಹಣದ ಕೊರತೆಯಿಲ್ಲ:
ದೇಶದ ಖಜಾನೆಯಲ್ಲಿ ಯಾವುದೇ ಹಣದ ಕೊರತೆಯಿಲ್ಲ. ಆದರೆ ಪ್ರಧಾನಿ ರೈತರ ಬೆಳೆಗೆ ಬೆಂಬಲ ಬೆಲೆ ಕೊಡುತ್ತಿಲ್ಲ. ಬಡವರಿಗೆ ಸಹಾಯ ಮಾಡುತ್ತಿಲ್ಲ. ಪ್ರಧಾನಿ ಮೋದಿ ಅವರು ದೇಶಾದ್ಯಂತ ಪ್ರವಾಸ ಮಾಡುವ ವೇಳೆ ದಲಿತರಿಗೆ, ಆದಿವಾಸಿಗಳಿಗೆ ಸಹಾಯ ಮಾಡುತ್ತೇನೆ ಎಂದು ಭಾಷಣ ಮಾಡಿ ಭರವಸೆ ನೀಡುತ್ತಿದ್ದಾರೆ. ಆದರೆ ಅವರ ಬಜೆಟ್‌ನಲ್ಲಿ ದಲಿತರು, ಆದಿವಾಸಿಗಳಿಗೆ ಕೇವಲ 55 ಸಾವಿರ ಕೋಟಿ ಅನುದಾನ ಮೀಸಲಿಟ್ಟಿದ್ದಾರೆ. 

ವಿಶೇಷವೆಂಬಂತೆ ಕರ್ನಾಟಕದಲ್ಲಿ ಸಿಎಂ ಸಿದ್ದರಾಮಯ್ಯ ಸರ್ಕಾರ ಎಸ್‌ಸಿ, ಎಸ್‌ಟಿಗೆ 27 ಸಾವಿರ ಕೋಟಿ ಅನುದಾನ ಮೀಸಲಿಟ್ಟಿದೆ. ಕೇಂದ್ರವು ಎಸ್‌ಸಿ, ಎಸ್‌ಟಿಗೆ ಮೀಸಲಿಟ್ಟ ಹಣ ಹಾಗೂ ಕರ್ನಾಟಕ ಸರ್ಕಾರ ಮೀಸಲಿಟ್ಟ ಹಣದ ವ್ಯತ್ಯಾಸ ನೋಡಿದರೆ ಯಾವುದು ಜನಪರ ಸರ್ಕಾರವಿದೆ ಎಂದು ಜನರಿಗೆ ಗೊತ್ತಾಗಲಿದೆ ಎಂದರು.

ಪ್ರಧಾನಿ ಮೋದಿ ಲೋಕಸಭೆಯಲ್ಲಿ ಇತ್ತಿಚೆಗೆ 1 ಗಂಟೆ 45 ನಿಮಿಷ ಮಾತನಾಡಿದರು. ಆದರೆ ಬಡವರ, ಮಹಿಳೆಯರ, ಮಕ್ಕಳ, ಆರೋಗ್ಯದ ಬಗ್ಗೆ ಮಾತನಾಡಲಿಲ್ಲ. ಬರಿ ಕಾಂಗ್ರೆಸ್‌ ಸರ್ಕಾರ ಹಾಗಿತ್ತು. ಹೀಗಿತ್ತು ಎನ್ನುವ ಗತಕಾಲದ ಮಾತನ್ನಾಡಿದ್ದಾರೆ. ಜನತೆ ಪ್ರಧಾನಿಯನ್ನು ಲೋಕಸಭೆಗೆ ಕಾಂಗ್ರೆಸ್‌ ವಿರುದ್ಧ ಭಾಷಣ ಮಾಡಲು ಆಯ್ಕೆ ಮಾಡಿ ಕಳಿಸಿಲ್ಲ. ಜನರ ಸಮಸ್ಯೆಗೆ ಸ್ಪಂದಿಸಲು ಆಯ್ಕೆ ಮಾಡಿ ಕಳಿಸಿದ್ದಾರೆ. ಭಾಷಣದಲ್ಲೇ ಕಾಲ ಕಳೆದಿದ್ದೀರಾ ಉಳಿದ ಕಡಿಮೆ ಅವ ಧಿಯಲ್ಲಾದರೂ ಕೆಲಸ ಮಾಡಿ ಎಂದು ರಾಹುಲ್‌ ಅವರು ಮೋದಿಗೆ ಟಾಂಗ್‌ ನೀಡಿದರು.