ವಿಂಡೀಸಿಗೆ ಮುನ್ನಡೆ ತಂದಿತ್ತ ಬ್ರಾತ್‌ವೇಟ್‌

ಕಿಂಗ್‌ಸ್ಟನ್‌ (ಜಮೈಕಾ): ಪ್ರವಾಸಿ ಪಾಕಿಸ್ಥಾನ ವಿರುದ್ಧದ ಟೆಸ್ಟ್‌ ಪಂದ್ಯದಲ್ಲಿ ಎರಡು ರನ್ನಿಗೆ ಎರಡು ವಿಕೆಟ್‌ ಕಳೆದುಕೊಂಡು ತೀವ್ರ ಒತ್ತಡದಲ್ಲಿದ್ದ ವೆಸ್ಟ್‌ ಇಂಡೀಸಿಗೆ ನಾಯಕ ಕ್ರೆಗ್‌ ಬ್ರಾತ್‌ವೇಟ್‌ ಇನ್ನಿಂಗ್ಸ್‌ ಲೀಡ್‌ ಕೊಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ದ್ವಿತೀಯ ದಿನದಾಟದ ಅಂತ್ಯಕ್ಕೆ 8 ವಿಕೆಟಿಗೆ 251 ರನ್‌ ಮಾಡಿರುವ ವಿಂಡೀಸ್‌, 34 ರನ್ನುಗಳ ಅಲ್ಪ ಮುನ್ನಡೆಯಲ್ಲಿದೆ. ಪಾಕ್‌ 217ಕ್ಕೆ ಆಲೌಟ್‌ ಆಗಿತ್ತು.

ಆರಂಭಕಾರನೂ ಆಗಿರುವ ಬ್ರಾತ್‌ವೇಟ್‌ ಪಾಕ್‌ ಬೌಲಿಂಗ್‌ ಆಕ್ರಮಣವನ್ನು ದಿಟ್ಟ ರೀತಿಯಲ್ಲಿ ನಿಭಾಯಿಸಿ 97 ರನ್‌ ಬಾರಿಸಿದರು. ಶತಕಕ್ಕೆ ಇನ್ನೇನು 3 ರನ್‌ ಬೇಕೆನ್ನುವಾಗ ರನೌಟ್‌ ದುರದೃಷ್ಟಕ್ಕೆ ಸಿಲುಕಿದರು. ಆಗಷ್ಟೇ ವಿಂಡೀಸ್‌ ಪಾಕಿಸ್ಥಾನದ ಮೊತ್ತವನ್ನು ಹಿಂದಿಕ್ಕಿತ್ತು.

ಬ್ರಾತ್‌ವೇಟ್‌ 221 ಎಸೆತಗಳಿಂದ ಕಪ್ತಾನನ ಇನ್ನಿಂಗ್ಸ್‌ ಕಟ್ಟಿದರು. ಹೊಡೆದದ್ದು 12 ಬೌಂಡರಿ. 100 ರನ್‌ ತಲಪುವಷ್ಟರಲ್ಲಿ 5 ವಿಕೆಟ್‌ ಕಳೆದುಕೊಂಡು ಮತ್ತೂಮ್ಮೆ ಸಂಕಟಕ್ಕೆ ಸಿಲುಕಿದ ತಂಡವನ್ನು ಬ್ರಾತ್‌ವೇಟ್‌-ಜಾಸನ್‌ ಹೋಲ್ಡರ್‌ ಸೇರಿಕೊಂಡು ಮೇಲೆತ್ತಿದರು. 31 ಓವರ್‌ಗಳನ್ನು ದಿಟ್ಟ ರೀತಿಯಲ್ಲಿ ನಿಭಾಯಿಸಿದ ಈ ಜೋಡಿ 6ನೇ ವಿಕೆಟಿಗೆ 96 ರನ್‌ ಪೇರಿಸಿತು. ಹೋಲ್ಡರ್‌ 108 ಎಸೆತ ಎದುರಿಸಿ 58 ರನ್‌ ಕೊಡುಗೆ ಸಲ್ಲಿಸಿದರು (10 ಬೌಂಡರಿ).

ಸಂಕ್ಷಿಪ್ತ ಸ್ಕೋರ್‌: ಪಾಕಿಸ್ಥಾನ-217. ವೆಸ್ಟ್‌ ಇಂಡೀಸ್‌-8 ವಿಕೆಟಿಗೆ 251 (ಬ್ರಾತ್‌ವೇಟ್‌ 97, ಹೋಲ್ಡರ್‌ 58, ಚೇಸ್‌ 21, ಅಬ್ಟಾಸ್‌ 42ಕ್ಕೆ 3, ಅಫ್ರಿದಿ 59ಕ್ಕೆ 2).