Mangaluru: ಬಾವುಟಗುಡ್ಡೆ ತಂಗುದಾಣ ಬಸ್‌ ಬೇ ಬಳಕೆಗೆ ಅನುವು

ಬಾವುಟಗುಡ್ಡೆ: ಬಾವುಟ ಗುಡ್ಡೆಯ ಎ.ಬಿ.ಶೆಟ್ಟಿ ರಸ್ತೆಯಲ್ಲಿ ಅಲೋಶಿ ಯಸ್‌ ಶಿಕ್ಷಣ ಸಂಸ್ಥೆಯ ಎದುರಿನ ಬಸ್‌ ತಂಗುದಾಣದ ಎದುರು ‘ಬಸ್‌ ಬೇ’ಗೆಂದು ಮೀಸಲಿರಿಸಿದ್ದ ಜಾಗ ಬಸ್‌ಗಳ ನಿಲುಗಡೆಗೆ ಸಿಗಲಿದೆ. ಇದರಿಂದಾಗಿ ಇಲ್ಲಿನ ಟ್ರಾಫಿಕ್‌ ಜಾಮ್‌ ಸಮಸ್ಯೆಗೆ ಪರಿಹಾರ ಸಿಗುವ ನಿರೀಕ್ಷೆ ಇದೆ.

ಬಾವುಟಗುಡ್ಡೆಯಲ್ಲಿ ಬಸ್‌ ತಂಗು ದಾಣದ ಎದುರು ಇದ್ದ ಖಾಲಿ ಜಾಗ ಮತ್ತು ರಸ್ತೆಯ ನಡುವೆ ಫ‌ುಟ್‌ಪಾತ್‌ ನಿರ್ಮಿಸಲಾಗಿತ್ತು. ಹಾಗಾಗಿ ಬಸ್‌ಗಳು ತಂಗುದಾಣದ ಎದುರಿನ ಸ್ಥಳದಲ್ಲಿ ನಿಲುಗಡೆಯಾಗದೆ ಅದಕ್ಕಿಂತ ಹಿಂದೆ ರಸ್ತೆಯಲ್ಲಿಯೇ ನಿಲುಗಡೆಯಾಗುತ್ತಿದ್ದವು. ಇದರಿಂದ ವಾಹನಗಳ ಸಂಚಾರಕ್ಕೆ ಅಡ್ಡಿ ಯಾಗಿತ್ತು. ಈ ಬಗ್ಗೆ ‘ಸುದಿನ’ದಲ್ಲಿ 2 ಬಾರಿ ವರದಿ ಪ್ರಕಟಿಸಿ ಗಮನ ಸೆಳೆಯಲಾಗಿತ್ತು. ಇದೀಗ ಈ ಹಿಂದೆ ತಂಗುದಾಣವಿದ್ದ ಸ್ಥಳದಲ್ಲಿ ಶಿಕ್ಷಣ ಸಂಸ್ಥೆಯವರಿಂದಲೇ ವ್ಯವಸ್ಥಿತವಾದ ಹೊಸ ತಂಗುದಾಣ ನಿರ್ಮಾಣಗೊಂಡಿದೆ. ಮಾತ್ರವಲ್ಲದೆ, ರಸ್ತೆ ಮತ್ತು ತಂಗುದಾಣದ ಎದುರಿನ ಜಾಗದ ನಡುವೆ ಇದ್ದ ಫ‌ುಟ್‌ಪಾತ್‌ನ್ನು ತೆರವುಗೊಳಿಸಲಾಗಿದೆ. ಹಾಗಾಗಿ ಬಸ್‌ಗಳು ತಂಗುದಾಣ ಸನಿಹಕ್ಕೆ ಹೋಗಲು ಸಾಧ್ಯವಾಗಲಿದೆ.

ನೂತನ ತಂಗುದಾಣ ನಿರ್ಮಾಣ ಪೂರ್ಣಗೊಂಡ ಅನಂತರ ಬಸ್‌ಗಳು ತಂಗುದಾಣದ ಎದುರಿನ ಬಸ್‌ಬೇಯನ್ನೇ ಬಳಕೆ ಮಾಡುವಂತೆ ನೋಡಿಕೊಳ್ಳಬೇಕಿದೆ.