ರೈಲು ಹಳಿ ಮೇಲೆ ನಿಂತು ಸೆಲ್ಫಿ ತೆಗೆದುಕೊಳ್ಳುವ ಹುಚ್ಚಿಗೆ ತರುಣ ಬಲಿ

ಪಣಜಿ : ಅಪಾಯಕಾರಿಯಾಗಿ ಸೆಲ್ಫಿ ತೆಗೆದುಕೊಳ್ಳುವ ಹುಚ್ಚಿಗೆ ಬಲಿಯಾಗುತ್ತಿರುವವರ ಸಂಖ್ಯೆ ಈಚಿನ ದಿನಗಳಲ್ಲಿ ಹೆಚ್ಚುತ್ತಲೇ ಇದೆ. ಇದಕ್ಕೆ ತಾಜಾ ಉದಾಹರಣೆಯಾಗಿ  ಇಲ್ಲಿಗೆ ಸಮೀಪದ ದಾವೋಜಿ ಗ್ರಾಮದಲ್ಲಿ 25ರ ಹರೆಯದ ವ್ಯಕ್ತಿಯೋರ್ವ ರೈಲಿನ ಹಳಿಯ ಮೇಲೆ ನಿಂತುಕೊಂಡು ಸೆಲ್ಫಿ ತೆಗೆದುಕೊಳ್ಳುವಾಗ ಧಾವಿಸಿ ಬಂದ ರೈಲು ಬಡಿದು ಮೃತಪಟ್ಟ ಘಟನೆ ನಡೆದಿದೆ.

ಸಚಿನ್‌ ಕುಂಡೇಕರ್‌ ಎಂಬಾತ ಇಲ್ಲಿಂದ 10 ಕಿ.ಮೀ. ದೂರದಲ್ಲಿರುವ ಕರ್ಮಾಲಿ ಸ್ಟೇಶನ್‌ನಲ್ಲಿ  ರೈಲಿನ ಹಳಿಯ ಮೇಲೆ ನಿಂತು ಸೆಲ್ಫಿ ತೆಗೆದುಕೊಳ್ಳುತ್ತಿದ್ದಾಗ ಈ ದುರ್ಘ‌ಟನೆ ನಡೆಯಿತು. ಕುಂಡೇಕರ್‌ ಜತೆಗೆ ಆತನ ಸ್ನೇಹಿತರೂ ಇದ್ದರು. 

ತೀವ್ರವಾಗಿ ಗಾಯಗೊಂಡ ಆತನನ್ನು ಒಡನೆಯೇ ಗೋವಾ ಮೆಡಿಕಲ್‌ ಕಾಲೇಜ್‌ ಆಸ್ಪತ್ರೆಗೆ ಒಯ್ಯಲಾಯಿತಾದರೂ ಆತ ಅದಾಗಲೇ ಮೃತಪಟ್ಟಿರುವುದಾಗಿ ವೈದ್ಯರು ಘೋಷಿಸಿದರು ಎಂದು ಕೊಂಕಣ್‌ ರೈಲ್ವೇ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಹರೀಶ್‌ ಮದಕೈಕರ್‌ ತಿಳಿಸಿದ್ದಾರೆ.