Moon: 3D ಗ್ಲಾಸ್‌ ಧರಿಸಿ ಫೋಟೋ ನೋಡಿ

ಹೊಸದಿಲ್ಲಿ: ಚಂದ್ರನ ದಕ್ಷಿಣ ಧ್ರುವದಲ್ಲಿ ವಿರಾಜಮಾನನಾಗಿರುವ ವಿಕ್ರಮ್‌ ಲ್ಯಾಂಡರ್‌ನ 3ಡಿ ಫೋಟೋವನ್ನು ಇಸ್ರೋ ಬಿಡುಗಡೆ ಗೊಳಿಸಿದೆ. ಪ್ರಗ್ಯಾನ್‌ ರೋವರ್‌, ವಿಕ್ರಮ್‌ ಲ್ಯಾಂಡರ್‌ನ ಫೋಟೋ ಒಂದನ್ನು ಸೆರೆ ಹಿಡಿದು ಕಳುಹಿಸಿತ್ತು. ಆ ಚಿತ್ರವನ್ನು ಇಸ್ರೋ ಅನಾಗ್ಲಿಫ್ ತಂತ್ರಜ್ಞಾನದ ಮೂಲಕ ನಾವ್‌ಕ್ಯಾಂ ಸ್ಟಿರಿಯೋ ಚಿತ್ರಗಳನ್ನು ಬಳಸಿ 3ಡಿಗೆ ಪರಿವರ್ತಿಸಿದೆ.

ಇದರಿಂದ ಲ್ಯಾಂಡರ್‌ ಅನ್ನು ತ್ರಿ ಡೈಮೆನ್ಶನ್‌ಲ್ಲಿ ವೀಕ್ಷಿಸ ಬಹುದು. ಬ್ಲೂ ಆ್ಯಂಡ್‌ ಗ್ರೀನ್‌ ಲೆನ್ಸ್‌ನಿಂದ ವೀಕ್ಷಿ ಸಲು ವಿನ್ಯಾಸಗೊಳಿಸಲಾಗಿದೆ. ಆ ರೀತಿಯಲ್ಲಿ ನೋಡಿದರೆ ಮಾತ್ರ, ಈ ಚಿತ್ರಗಳ ಸೂಕ್ಷ್ಮತೆ ಹಾಗೂ 3ಡಿ ವಿನ್ಯಾಸವನ್ನು ಕಣ್ತುಂಬಿಕೊಳ್ಳಬಹುದಾಗಿದೆ.

ಆದಿತ್ಯ-ಎಲ್‌1 ಕಕ್ಷೆ ಮೇಲ್ದರ್ಜೆ ಯಶಸ್ವಿ: ಸೂರ್ಯನ ಅಧ್ಯಯನ ನಡೆಸಲು ಉಡಾಯಿಸಲಾಗಿರುವ ಆದಿತ್ಯ-ಎಲ್‌1ರ 2ನೇ ಹಂತದ ಕಕ್ಷೆ ಮೇಲ್ದರ್ಜೆಗೆ ಏರಿಸುವಿಕೆಯನ್ನು ಯಶಸ್ವಿಯಾಗಿ ಮಂಗಳವಾರ ನಡೆಸಲಾಗಿದೆ. ಸೆ.10ರಂದು ಮೂರನೇ ಹಂತದ ಕಕ್ಷೆಯನ್ನು ಮೇಲ್ದರ್ಜೆಗೆ ಏರಿಸುವ ಪ್ರಕ್ರಿಯೆ ನಡೆಯಲಿದೆ.