ಸರಕಾರಿ ಆಡಳಿತ ವ್ಯವಸ್ಥೆಯಲ್ಲಿ ಶಾಸಕಾಂಗದ ಪಾತ್ರ ಎಷ್ಟು ಮುಖ್ಯವೋ ಕಾರ್ಯಾಂಗದ ಪಾತ್ರ ಅಷ್ಟೇ ಮುಖ್ಯ. ಸರಕಾರದ ಎಲ್ಲ ಕಾರ್ಯಕ್ರಮಗಳನ್ನು, ಯೋಜನೆಗಳನ್ನು ಕಾರ್ಯಗತಗೊಳಿಸುವ ಹೊಣೆಗಾರಿಕೆ ಕಾರ್ಯಾಂಗದ ಮೇಲಿದೆ. ಅಂದರೆ ಸರಕಾರಿ ನೌಕರರ ಮೇಲಿದೆ. ಅದರಲ್ಲೂ ಸರಕಾರದ ಮಾತೃ ಇಲಾಖೆ ಎಂದು ಪರಿಗಣಿಸಲ್ಪಡುವ ಕಂದಾಯ ಇಲಾಖೆಯ ಅಧಿಕಾರಿಗಳ ಪಾತ್ರ ಅತ್ಯಂತ ಮುಖ್ಯವಾಗಿದೆ. ಗ್ರಾಮ ಲೆಕ್ಕಾಧಿಕಾರಿಯಿಂದ ತಹಶೀಲ್ದಾರ್‌ವರೆಗೂ ಸಾಮಾನ್ಯ ಜನರ ಹುಟ್ಟಿನಿಂದ ಸಾವಿನವರೆಗಿನ ಎಲ್ಲ ಚಟುವಟಿಕೆಗಳ ಕಾರ್ಯಗಳನ್ನು ದಾಖಲಿಸುವ, ವಿಲೇವಾರಿ ಮಾಡುವ ಜವಾಬ್ದಾರಿ ಕಂದಾಯ ಇಲಾಖೆ ಅಧಿಕಾರಿಗಳಿಗಿರುತ್ತದೆ.
ಮುಖ್ಯವಾಗಿ ತಹಶೀಲ್ದಾರ್‌ಗಳು ಪ್ರತಿ ತಾಲೂಕಿನ ದಂಡಾಧಿಕಾರಿಗಳಾಗಿ ಕಾರ್ಯ ನಿರ್ವಹಿಸುವ ಮಹತ್ವದ ಜವಾಬ್ದಾರಿ ಹೊಂದಿರುತ್ತಾರೆ. ಅವರ ಸೇವೆ ಯನ್ನು ಸರಕಾರ ಸಮರ್ಪಕವಾಗಿ ಬಳಸಿಕೊಳ್ಳುವುದರ ಮೂಲಕ ಸಾರ್ವಜನಿಕರ ಸಮಸ್ಯೆಗೆ ಪರಿಹಾರ ಒದಗಿಸುವ ಕೆಲಸ ಮಾಡಬೇಕಿದೆ. ರಾಜ್ಯದಲ್ಲಿ ಕಳೆದ ಒಂದು ವರ್ಷದಿಂದ ಸುಮಾರು 45 ತಹಸೀಲ್ದಾರ್‌ಗಳು ಯಾವುದೇ ಕಾನೂನಿನ ತೊಡಕಿ ಲ್ಲದಿದ್ದರೂ, ಅಮಾನತಿನಂಥ ಶಿಕ್ಷೆಗೆ ಒಳಗಾಗದಿದ್ದರೂ, ಅವರ ಸೇವಾನುಭವಕ್ಕೆ ಅರ್ಹ ಹುದ್ದೆ ದೊರೆಯದೇ ಸ್ಥಳ ನಿಯುಕ್ತಿಗಾಗಿ ಕಾದು ಕುಳಿತಿರುವುದು ಸರ್ಕಾರದ ಆಡಳಿತ ವ್ಯವಸ್ಥೆಯಲ್ಲಿನ ಹಿಡಿತ ಸಡಿಲಾದಂತೆ ಕಾಣಿಸುತ್ತದೆ.
ರಾಜ್ಯ ಸರಕಾರದಲ್ಲಿ ಎಲ್ಲ ಇಲಾಖೆಗಳಲ್ಲಿಯೂ ಸುಮಾರು 2 ಲಕ್ಷಕ್ಕೂ ಹೆಚ್ಚು ಹುದ್ದೆಗಳು ಖಾಲಿ ಇವೆ. ಇಂತಹ ಪರಿಸ್ಥಿತಿಯಲ್ಲಿ ರಾಜ್ಯ ಸರಕಾರ ಕೋವಿಡ್ ಲಾಕ್‌ಡೌನ್‌ ಪರಿಣಾಮ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿ ಹೊಸ ನೇಮಕಾತಿಗಳನ್ನೂ ಸ್ಥಗಿತಗೊಳಿಸಿದೆ. ಅಲ್ಲದೇ ರಾಜ್ಯದ ಅರ್ಧಭಾಗ ಪ್ರವಾಹಕ್ಕೆ ತುತ್ತಾಗಿ ಜನರು ಸಂಕಷ್ಟದ ಜೀವನ ಕಳೆಯುತ್ತಿದ್ದಾರೆ. ಇಂಥ ಸಂದಿಗ್ಧ ಪರಿಸ್ಥಿತಿಯಲ್ಲಿ ಅರ್ಹ ಅಧಿಕಾರಿಗಳಿಗೆ ಸೂಕ್ತ ಸ್ಥಳ ನಿಯುಕ್ತಿ ಮಾಡದೇ ಮನೆಯಲ್ಲಿಯೇ ಕೂರಿಸಿ ಸಂಬಳ ನೀಡುವುದು, ಸಾರ್ವಜನಿಕರ ತೆರಿಗೆ ಹಣವನ್ನು ಪೋಲು ಮಾಡುವುದಲ್ಲದೇ ಅರ್ಹ ಸರಕಾರಿ ನೌಕರರ ಶ್ರಮವನ್ನೂ ಬಳಕೆ ಮಾಡಿಕೊಳ್ಳದೆ ಇರುವುದು ಕೂಡ ಸಂಪನ್ಮೂಲವನ್ನು ವ್ಯರ್ಥ ಮಾಡಿದಂತಾಗುತ್ತದೆ.
ಅರ್ಹತೆ ಇದ್ದರೂ ಸೂಕ್ತ ಹುದ್ದೆ ದೊರೆಯದೇ ಸ್ಥಳ ನಿಯುಕ್ತಿಗಾಗಿ ಕಾಯುವುದು ಕೇವಲ ಕಂದಾಯ ಇಲಾಖೆಗೆ ಸೀಮಿತವಾಗಿಲ್ಲ. ಸರಕಾರಿ ವ್ಯವಸ್ಥೆಯಲ್ಲಿ ಎಲ್ಲ ಇಲಾಖೆಗಳಲ್ಲಿಯೂ ಈ ಪ್ರವೃತ್ತಿ ನಿರಂತವಾಗಿದ್ದು, ಇತ್ತೀಚೆಗೆ ಲೋಕೋಪಯೋಗಿ ಇಲಾಖೆಯಲ್ಲಿಯೂ ಮುಖ್ಯ ಎಂಜಿನಿಯರ್‌ ಹುದ್ದೆಗೆ ಭಡ್ತಿ ಪಡೆದಿದ್ದ ಎಂಜಿನಿ ಯರ್‌ಗಳು ಹುದ್ದೆಗಾಗಿ ಆರು ತಿಂಗಳು ಕಾದು ಇತ್ತೀಚೆಗೆ ಹುದ್ದೆ ಪಡೆದುಕೊಂಡಿರುವ ಉದಾಹರಣೆ ಇದೆ. ಸರಕಾರಿ ವ್ಯವಸ್ಥೆಯಲ್ಲಿ ಸ್ಥಳ ನಿಯುಕ್ತಿಗಾಗಿ ಕಾಯುವುದರಿಂದ ಹಿರಿಯ ಐಎಎಸ್‌ ಅಧಿಕಾರಿಗಳೂ ಕೂಡ ಇದರಿಂದ ಹೊರತಾಗಿಲ್ಲ. ಕೆಲವು ಸಾರಿ ಅಧಿಕಾರಿಗಳ ಗ್ರೇಡ್‌ಗೆ ತಕ್ಕ ಹುದ್ದೆ ಖಾಲಿ ಇಲ್ಲದೇ ಇರುವುದು ಅಥವಾ ಆಯಕಟ್ಟಿನ ಸ್ಥಳ ಸಿಗದೇ ಇರುವ ಕಾರಣಕ್ಕೆ ಪರ್ಯಾಯ ಹುದ್ದೆಗಾಗಿ ಕಾಯ್ದು ಕುಳಿತುಕೊಳ್ಳುವ ಪ್ರವೃತ್ತಿ ನಿರಂತರವಾಗಿ ನಡೆಯುತ್ತಲೇ ಇದೆ. ಇದೆಲ್ಲದರ ಹಿಂದೆ ಅಧಿಕಾರಿಗಳನ್ನು ನಿಯುಕ್ತಿಗೊಳಿಸಲು ರಾಜಕೀಯ ನಾಯಕರ ಶಿಫಾರಸ್ಸುಗಳು ಹೆಚ್ಚು ಪ್ರಭಾವ ಬೀರುವುದರಿಂದ ಆಡಳಿತ ವ್ಯವಸ್ಥೆಯಲ್ಲಿ ವ್ಯತ್ಯಾಸ ಉಂಟಾಗುತ್ತದೆ. ಇದು ಸುಗಮ ಆಡಳಿತದ ಮೇಲೆ ಪರಿಣಾಮ ಬೀರಲಿದ್ದು, ಅದರ ಪರಿಣಾಮ ಅಂತಿಮವಾಗಿ ಸಾರ್ವಜನಿಕರ ಮೇಲಾಗುತ್ತದೆ.
ಸರ್ಕಾರಿ ಅಧಿಕಾರಿಗಳ ವರ್ಗಾವಣೆ ಅಥವಾ ನಿಯೋಜನೆಗೆ ಶಾಸಕರು ಹಾಗೂ ರಾಜಕಾರಣಿಗಳ ಶಿಫಾರಸು ಇರಬಾರದು ಎಂದು ಹೈಕೋರ್ಟ್‌ ಸ್ಪಷ್ಟವಾಗಿ ಸೂಚನೆ ನೀಡಿದೆ. ಸಾಮಾನ್ಯ ಜನರ ಹಿತದೃಷ್ಟಿಯಿಂದ ಆಡಳಿತ ವ್ಯವಸ್ಥೆ ಸುಗಮವಾಗಿ ಸಾಗಲು ಹಾಗೂ ಸರಕಾರಿ ನೌಕರರ ಸೇವೆ ಸದ್ಬಳಕೆ ಮಾಡಿಕೊಳ್ಳಲು ಸರ್ಕಾರ ಹೆಚ್ಚಿನ ಮುತುವರ್ಜಿ ವಹಿಸುವುದು ಅತ್ಯಂತ ಅಗತ್ಯವಿದೆ. ಸರಕಾರಿ ನೌಕರರ ಸೇವೆ ಸದ್ಬಳಕೆ ಯಾದರೆ ಮಾತ್ರ ಸಾಮಾನ್ಯರಿಗೆ ಸರಕಾರಿ ಸೇವೆ ಪಡೆಯಲು ಸಾಧ್ಯವಾಗುತ್ತದೆ. ಈ ನಿಟ್ಟಿನಲ್ಲಿ ಸರಕಾರ ಗಮನ ಹರಿಸುವಂತಾಗಲಿ.
