KTR ಫಾರ್ಮುಲಾ ರೇಸ್‌ ಕೇಸ್‌ ರದ್ದು: ತೀರ್ಪು ಕಾಯ್ದಿರಿಸಿದ ಹೈಕೋರ್ಟ್‌

ಹೈದ್ರಾಬಾದ್‌: ಫಾರ್ಮುಲಾ ಇ ರೇಸ್‌ ಪ್ರಕರಣಕ್ಕೆ ಸಂಬಂಧಿಸಿದಂತೆ ತಮ್ಮ ವಿರುದ್ಧ ಭ್ರಷ್ಟಾಚಾರ ನಿಗ್ರಹ ದಳ ದಾಖಲಿಸಿರುವ ಎಫ್ಐಆರ್‌ ರದ್ದು ಕೋರಿದ್ದ ಬಿಆರ್‌ಎಸ್‌ ಕಾರ್ಯಾಧ್ಯಕ್ಷ ಕೆ.ಟಿ.ರಾಮರಾವ್‌ (ಕೆಟಿಆರ್‌) ಅರ್ಜಿ ವಿಚಾರಣೆ ನಡೆಸಿರುವ ತೆಲಂಗಾಣ ಹೈಕೋರ್ಟ್‌ ಆದೇಶ ಕಾಯ್ದಿರಿಸಿದೆ. ಜತೆಗೆ, ಕೆಟಿಆರ್‌ ಅವರನ್ನು ಬಂಧಿಸದಂತೆ ನೀಡಿದ್ದ ಮಧ್ಯಂತರ ಆದೇಶವನ್ನೂ ಮುಂದುವರಿಸಿದೆ.

ಬಿಆರ್‌ಎಸ್‌ ಆಡಳಿತದಲ್ಲಿದ್ದಾಗ, ಜಾಗತಿಕ ಗಮನ ಸೆಳೆಯಲು ಹೈದ್ರಾಬಾದ್‌ನಲ್ಲಿ ಫಾರ್ಮುಲಾ ಇ ರೇಸ್‌ ಆಯೋಜಿಸಲಾಗಿತ್ತು. ಈ ವೇಳೆ, ಸೂಕ್ತ ಒಪ್ಪಿಗೆಗಳಿಲ್ಲದೆ 55 ಕೋಟಿ ರೂ. ಹಣವನ್ನು ಸಂಘಟಕರಿಗೆ ನೀಡಿದ ಆರೋಪವಿದೆ. ಇದರಲ್ಲಿ ಒಂದಿಷ್ಟು ಹಣವನ್ನು ವಿದೇಶಿ ಕರೆನ್ಸಿಗಳಲ್ಲೂ ನೀಡಲಾಗಿದೆ ಎಂಬ ಆರೋಪವಿದೆ. ಈ ಹಿನ್ನೆಲೆಯಲ್ಲಿ ಭ್ರಷ್ಟಾಚಾರ ನಿಗ್ರಹ ದಳ ಕೇಸ್‌ ದಾಖಲಿಸಿ, ತನಿಖೆ ನಡೆಸುತ್ತಿದೆ.