ಸುದೀಪ್ ಅಭಿನಯದ “ಕೋಟಿಗೊಬ್ಬ-3′ ಬಿಡುಗಡೆಯ ಹಂತಕ್ಕೆ ಬಂದಿದ್ದು, ಏಪ್ರಿಲ್‌ ಕೊನೆಯಲ್ಲಿ ತೆರೆಗೆ ತರಲು ಚಿತ್ರತಂಡ ಪ್ಲಾನ್‌ ಮಾಡಿಕೊಂಡಿದೆ. ಈಗ ಚಿತ್ರ ತಂಡದಿಂದ ಒಂದು ಸುದ್ದಿ ಹೊರಬಂದಿದೆ. ಅದು ಚಿತ್ರದ ತೆಲುಗು ಬಿಡುಗಡೆಯ ಕುರಿತಾಗಿ.
ಹೌದು, “ಕೋಟಿಗೊಬ್ಬ-3′ ಈಗ ತೆಲುಗಿನಲ್ಲೂ ತೆರೆ ಕಾಣುತ್ತಿದೆ. ಆರಂಭದಲ್ಲಿ ಚಿತ್ರ ತಂಡ ಕೇವಲ ಕನ್ನಡದಲ್ಲಷ್ಟೇ ಬಿಡುಗಡೆ ಮಾಡಲು ಯೋಚಿಸಿತ್ತು. ಆದರೆ, ಈಗ ತೆಲುಗಿನ ನಿರ್ಮಾಪಕರು ಬಂದು ಚಿತ್ರದ ತೆಲುಗು ಬಿಡುಗಡೆಯ ಸಂಪೂರ್ಣ ಹಕ್ಕನ್ನು ಪಡೆದಿದ್ದು. ಅಲ್ಲಿ “ಕೆ3- ಕೋಟಿಕೊಕ್ಕುಡು’ ಎಂಬ ಟೈಟಲ್‌ ನಡಿ ತೆರೆ ಕಾಣಲಿದೆ. ಈ ಹಿಂದೆ “ಕೋಟಿಗೊಬ್ಬ-2′ ಚಿತ್ರ ತಮಿಳಿನಲ್ಲಿ “ಮುಡಿಂಜ ಇವನ ಪಿಡಿ’ ಎಂಬ ಟೈಟಲ್‌ ನಡಿ ಬಿಡುಗಡೆಯಾಗಿತ್ತು. ಈಗ “ಕೋಟಿಗೊಬ್ಬ-3′ ತೆಲುಗು ಸರದಿ.
ಇದನ್ನೂ ಓದಿ:ಚಿತ್ರ ವಿಮರ್ಶೆ: ಆ್ಯಕ್ಷನ್‌ ಅಬ್ಬರದಲ್ಲಿ ರಣ ಕಹಳೆ
ಸೂರಪ್ಪ ಬಾಬು ನಿರ್ಮಾ ಣದ ಈ ಚಿತ್ರವನ್ನು ಶಿವ ಕಾರ್ತಿಕ್‌ ನಿರ್ದೇಶಿಸಿದ್ದಾರೆ. ಚಿತ್ರಕ್ಕೆ ಅರ್ಜುನ್‌ ಜನ್ಯಾ ಸಂಗೀತವಿದೆ. ಇನ್ನು ಚಿತ್ರದ ಪ್ರಚಾರ ಕಾರ್ಯಗಳಿಗೆ ಚಾಲನೆ ನೀಡಿರುವ ಚಿತ್ರತಂಡ, “ಕೋಟಿಗೊಬ್ಬ-3′ ಚಿತ್ರದ ಆಡಿಯೊ ಬಿಡುಗಡೆ ಮತ್ತು ಪ್ರಿ-ರಿಲೀಸ್‌ ಕಾರ್ಯಕ್ರಮವನ್ನು ಕೋಟೆನಾಡು ಚಿತ್ರದುರ್ಗದಲ್ಲಿ ಆಯೋಜಿಸುವ ಯೋಚನೆಯಲ್ಲಿದೆ.
ಸದ್ಯ ರಾಜ್ಯದಲ್ಲಿ ಕೋವಿಡ್ ಎರಡನೇ ಹಂತದ ಅಲೆಯ ಆತಂಕ ಆವರಿಸಿರುವುದರಿಂದ, ಪರಿಸ್ಥಿತಿಯನ್ನು ಗಮನದಲ್ಲಿರಿಸಿಕೊಂಡು ಕಾರ್ಯಕ್ರಮದ ಯೋಜನೆ ಮಾಡಲು ಮುಂದಾಗಿದೆ. ಮೂಲಗಳ ಪ್ರಕಾರ ಏಪ್ರಿಲ್‌ 20 ರಂದು ಈ ಕಾರ್ಯಕ್ರಮ ನಡೆಯುವ ಸಾಧ್ಯತೆ ಇದೆ ಎನ್ನಲಾಗುತ್ತಿದ್ದು, ಈ ಬಗ್ಗೆ ಚಿತ್ರತಂಡ ಇನ್ನಷ್ಟೇ ಅಧಿಕೃತ ಮಾಹಿತಿ ನೀಡಬೇಕಿದೆ.
