ಸುದೀಪ್ ಅವರ “ಕೋಟಿಗೊಬ್ಬ-3′ ಚಿತ್ರದ ಚಿತ್ರೀಕರಣ ಸರ್ಬಿಯಾ ದೇಶದಲ್ಲಿ ನಡೆಯುತ್ತಿದೆ. ಸುದೀಪ್ ಸೇರಿದಂತೆ ಇಡೀ ಚಿತ್ರತಂಡ ಚಿತ್ರೀಕರಣದಲ್ಲಿ ಬಿಝಿ. ಈಗ ಸುದೀಪ್ ಹಾಗೂ ಅವರ “ಕೋಟಿಗೊಬ್ಬ-3′ ಚಿತ್ರದ ಬಗ್ಗೆ ಸರ್ಬಿಯಾದ ಪತ್ರಿಕೆ ಹಾಗೂ ವೆಬ್‌ಸೈಟ್‌ಗಳಲ್ಲಿ ಸುದ್ದಿ ಬಂದಿದೆ. ಇದರಿಂದ ಚಿತ್ರತಂಡ ಹಾಗೂ ಸುದೀಪ್ ಅಭಿಮಾನಿಗಳು ಖುಷಿಯಾಗಿದ್ದಾರೆ. ಸರ್ಬಿಯಾದ ಟೆಲಿಗ್ರಾಫ್ ಎಂಬ ಪತ್ರಿಕೆ ಹಾಗೂ ವೆಬ್‌ಸೈಟ್‌ನಲ್ಲಿ ಸುದೀಪ್ ಅವರ ಸಿನಿಮಾದ ವಿವರದ ಜೊತೆಗೆ ಅವರ ಬಗ್ಗೆಯೂ ಬರೆಯಲಾಗಿದೆ.
ಸುದೀಪ್ ಅವರನ್ನು ಅಭಿಮಾನಿಗಳು “ಕಿಚ್ಚ ಸುದೀಪ್’ ಎಂದು ಕರೆಯುವ ಬಗ್ಗೆ, “ಕೋಟಿಗೊಬ್ಬ-2′ ಸಿನಿಮಾದ ಯಶಸ್ಸು ಜೊತೆಗೆ “ಕೋಟಿಗೊಬ್ಬ-3′ ಚಿತ್ರೀಕರಣದ ವಿಷಯಗಳನ್ನು ಇಲ್ಲಿ ಪ್ರಕಟಿಸಲಾಗಿದೆ. ಜೊತೆಗೆ ಸುದೀಪ್ ಅವರ ಕೆಲವು ಟ್ವೀಟ್‌ಗಳನ್ನು ಕೂಡಾ ಬಳಸಲಾಗಿದೆ. ಈ ಮೂಲಕ ಕನ್ನಡ ಚಿತ್ರ ಹಾಗೂ ಕನ್ನಡದ ನಟ ಸರ್ಬಿಯಾ ದೇಶದಲ್ಲೂ ಸುದ್ದಿಯಾಗಿದ್ದಾರೆ. ಅಂದಹಾಗೆ, ಈ ಹಿಂದೆ ಗಣೇಶ್‌ ತಮ್ಮ “ಚಮಕ್‌’ ಚಿತ್ರೀಕರಣಕ್ಕಾಗಿ ಇಟಲಿಗೆ ತೆರಳಿದ್ದಾಗ ಅಲ್ಲಿಯ ಪತ್ರಿಕೆಗಳು ಇದೇ ರೀತಿ ಕನ್ನಡ ಸಿನಿಮಾ ಬಗ್ಗೆ ಸುದ್ದಿ ಮಾಡಿದ್ದವು.
ಕೋಟಿಗೊಬ್ಬ 3′ ಚಿತ್ರವನ್ನು ಸೂರಪ್ಪ ಬಾಬು ನಿರ್ಮಿಸುತ್ತಿದ್ದು, ಈ ಹಿಂದೆ “ಕೋಟಿಗೊಬ್ಬ 2′ ಚಿತ್ರವನ್ನೂ ಅವರೇ ನಿರ್ಮಿಸುತ್ತಿದ್ದಾರೆ. ಅಷ್ಟೇ ಅಲ್ಲ, ವಿಷ್ಣುವರ್ಧನ್‌ ಅಭಿನಯದ “ಕೋಟಿಗೊಬ್ಬ’ ಚಿತ್ರವನ್ನೂ ಅವರೇ ನಿರ್ಮಿಸಿದ್ದರು. ಒಂದೇ ಹೆಸರಿನ ಮೂರು ಚಿತ್ರಗಳನ್ನು ಬಾಬು ನಿರ್ಮಿಸುತ್ತಿದ್ದಾರೆ. ಈ ಚಿತ್ರವನ್ನು ಹೊಸ ನಿರ್ದೇಶಕ ಶಿವ ಕಾರ್ತಿಕ್‌ ನಿರ್ದೇಶಿಸುತ್ತಿದ್ದಾರೆ. “ಕೋಟಿಗೊಬ್ಬ 3′ ಚಿತ್ರದಲ್ಲಿ ಮಡ್ಡೋನ ಸೆಬಾಸ್ಟಿಯನ್‌ ನಾಯಕಿಯಾಗಿ ನಟಿಸುತ್ತಿದ್ದು, ಇದು ಅವರ ಮೊದಲ ಚಿತ್ರವಾಗಿದೆ. ಇದಕ್ಕೂ ಮುನ್ನ ಮಲಯಾಳಂನ “ಪ್ರೇಮಂ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ಅವರು, “ಕಿಂಗ್‌ ಲಯರ್‌’ನಲ್ಲೂ ನಟಿಸಿದ್ದಾರೆ. ಚಿತ್ರದಲ್ಲಿ ಶ್ರದ್ಧಾ ದಾಸ್‌ ಕೂಡಾ ಪ್ರಮುಖ ಪಾತ್ರ ಮಾಡುತ್ತಿದ್ದಾರೆ.
ಈಗಾಗಲೇ ಸುದೀಪ್ ಜೊತೆಗಿರುವ ಫೋಟೋ ಹಾಕಿ ಚಿತ್ರೀಕರಣದ ಅನುಭವ ಹಂಚಿಕೊಂಡಿದ್ದರು ಶ್ರದ್ಧಾ. ಇನ್ನು, ಬಾಲಿವುಡ್‌ ನಟ ಅಫ್ತಾಬ್‌ ಶಿವದಾಸಾನಿ ಕೂಡಾ ನಟಿಸುತ್ತಿದ್ದು, ಈ ಚಿತ್ರದಲ್ಲಿ ಇಂಟರ್‌ಪೋಲ್‌ ಅಧಿಕಾರಿಯಾಗಿ ಕಾಣಿಸಿಕೊಳ್ಳುತ್ತಿರುವ ಅವರಿಗಿದು ಮೊದಲ ಕನ್ನಡ ಚಿತ್ರ. ಚಿತ್ರಕ್ಕೆ ಅರ್ಜುನ್‌ ಜನ್ಯ ಸಂಗೀತ ಸಂಯೋಜಿಸುತ್ತಿದ್ದಾರೆ. ಇನ್ನು ಶೇಖರ್‌ ಚಂದ್ರ ಅವರ ಛಾಯಾಗ್ರಹಣವಿದೆ. ಚಿತ್ರದಲ್ಲಿ ಸುದೀಪ್, ಮಡ್ಡೋನ, ಅಫ್ತಾಬ್‌ ಜೊತೆಗೆ ನವಾಬ್‌ ಷಾ, ರವಿಶಂಕರ್‌, ರಂಗಾಯಣ ರಘು ಮುಂತಾದವರು ನಟಿಸುತ್ತಿದ್ದಾರೆ.
