Bus Fare Hike: ಕರ್ನಾಟಕಕ್ಕೆ ಕೇರಳ ಸರಕಾರಿ ಬಸ್‌ ಟಿಕೆಟ್‌ ದರ ಏರಿಕೆ

ಕಾಸರಗೋಡು: ಕರ್ನಾಟಕಕ್ಕೆ ಕೇರಳ ರಾಜ್ಯ ಸಾರಿಗೆ ಬಸ್‌ (ಕೆಎಸ್ಸಾರ್ಟಿಸಿ) ಸೇವೆಗಳ ಟಿಕೆಟ್‌ ದರ ಹೆಚ್ಚಳಗೊಳಿಸಲಾಗಿದೆ. ಹೆಚ್ಚಳವನ್ನು ಜ. 7ರಂದು ಅಂತಿಮಗೊಳಿಸಲಾಗಿದ್ದು ಜಾರಿಗೆ ಬಂದಿದೆ. ಕರ್ನಾಟಕ ರಾಜ್ಯ ಸಾರಿಗೆ ಸಂಸ್ಥೆ ಟಿಕೆಟ್‌ ದರವನ್ನು ಹೆಚ್ಚಿಸಿದ ಹಿನ್ನೆಲೆಯಲ್ಲಿ ಕೇರಳ ರಾಜ್ಯವೂ ಅಂತಾರಾಜ್ಯ ಬಸ್‌ ಟಿಕೆಟ್‌ ದರ ಹೆಚ್ಚಳಗೊಳಿಸಿದೆ.

ಅಂತಾರಾಜ್ಯ ಒಪ್ಪಂದದ ಪ್ರಕಾರ ಎರಡು ರಾಜ್ಯಗಳ ನಡುವೆ ಟಿಕೆಟ್‌ ದರ ಏಕರೂಪವಾಗಿರಬೇಕೆಂದು ಈ ಹಿಂದೆ ತೀರ್ಮಾನಿಸಲಾಗಿತ್ತು. ಕರ್ನಾಟಕ ಸರಕಾರ ಬಸ್‌ ಪ್ರಯಾಣ ದರವನ್ನು ಶೇ. 15ರಷ್ಟು ಹೆಚ್ಚಿಸಿರುವ ಹಿನ್ನೆಲೆಯಲ್ಲಿ ಕೇರಳ ಸರಕಾರವು ಅಂತಾರಾಜ್ಯ ಬಸ್‌ ಪ್ರಯಾಣ ದರ ಹೆಚ್ಚಿಸಿದೆ.

ಇದರಂತೆ ಕಾಸರಗೋಡು-ಮಂಗಳೂರು ಟಿಕೆಟ್‌ ದರ 81 ರೂ.ಗಳಿಗೇರಿದೆ. ಈ ಹಿಂದೆ 74 ರೂ. ಪ್ರಯಾಣ ದರವಿತ್ತು. ಇದೀಗ 7 ರೂ. ಹೆಚ್ಚಳವಾಗಿದೆ. ಪುತ್ತೂರಿಗೆ ಇದೀಗ 85 ರೂ. ಆಗಿದ್ದು, ಈ ಹಿಂದೆ 74 ರೂ. ಆಗಿತ್ತು. ಸುಳ್ಯಕ್ಕೆ 80 ರೂ. ಟಿಕೆಟ್‌ ದರ ನಿಗದಿಗೊಳಿಸಲಾಗಿದೆ. ಈ ಹಿಂದೆ 73 ರೂ. ಇತ್ತು.