175 ದಿನ ಪೂರೈಸಿದ ಲೂಸ್‌ ಮಾದ ಯೋಗಿ ಅಭಿನಯದ ‘ಲಂಕೆ’

ಕಳೆದ ಎರಡು ವರ್ಷಗಳಿಂದ ಕೊರೊನ ಅಲೆಗೆ ಸಿಲುಕಿ ಕನ್ನಡ ಚಿತ್ರರಂಗ ಸಾಕಷ್ಟು ಅನುಭವಿಸಿದೆ. ಕೊರೊನ ಕರಿನೆರಳಿನಲ್ಲೂ ಬಿಡುಗಡೆಗೊಂಡು ಜನಮನ ಗೆದ್ದಿರುವ ಚಿತ್ರ ಲಂಕೆ.

ಲೂಸ್‌ ಮಾದ ಯೋಗಿ ನಾಯಕನಾಗಿ ನಟಿಸಿ, ರಾಮ್‌ ಪ್ರಸಾದ್‌ ಎಂ.ಡಿ ನಿರ್ಮಿಸಿ, ನಿರ್ದೇಶಿಸಿರುವ ಲಂಕೆ ಚಿತ್ರ ಯಶಸ್ವಿ 175 ದಿನಗಳನ್ನು ಪೂರೈಸಿದೆ. ಸಂತಸದ ಸಂಭ್ರಮದಲ್ಲಿ ನಾಯಕ ಹಾಗೂ ತಮ್ಮ ಇಡೀ ಚಿತ್ರ ತಂಡಕ್ಕೆ ಧನ್ಯವಾದ ಅರ್ಪಿಸಿರುವ “ಲಂಕೆ’ಯ ನಿರ್ದೇಶಕ ರಾಮ್‌ ಪ್ರಸಾದ್‌ ಎಂ. ಡಿ “ಚಿತ್ರದ 175 ದಿನಗಳ ಯಶಸ್ಸಿನ ಸಂತೋಷ ಹಂಚಿಕೊಳ್ಳಲು ಸದ್ಯದಲ್ಲೇ ಸಮಾರಂಭ ಆಯೋಜಿಸಲಿದ್ದೇವೆ’ ಎಂದು ಹೇಳಿದರು.

ಇದನ್ನೂ ಓದಿ:ಥಿಯೇಟರ್‌ ಗೆ ಬಂದ ‘ಡಿಯರ್‌ ಸತ್ಯ’

“ಈ ಖುಷಿ ಸಮಯದಲ್ಲಿ ಚಿತ್ರದಲ್ಲಿ ನಟಿಸಿರುವ ಸಂಚಾರಿ ವಿಜಯ್‌ ಇಲ್ಲದಿರುವುದು ನಮಗೆ ದುಃಖದ ಸಂಗತಿ. ಮತ್ತೂಂದು ಖುಷಿಯ ವಿಚಾರವೆಂದರೆ ನಮ್ಮ ಚಿತ್ರ ತೆಲುಗಿನಲ್ಲೂ ನಿರ್ಮಾಣವಾಗುತ್ತಿದ್ದು, ಏಪ್ರಿಲ್‌ನಲ್ಲಿ ಈ ಚಿತ್ರದ ಚಿತ್ರೀಕರಣ ಆರಂಭವಾಗಲಿದೆ. ಲಂಕೆ ಚಿತ್ರದಲ್ಲಿ ತಾಯಿ ಪಾತ್ರದ ಮೂಲಕ ಎಲ್ಲರ ಗಮನಸೆಳೆದಿದ್ದ ಎಸ್ತಾರ್‌ ನರೋನ, ತೆಲುಗು ಅವತರಣಿಕೆಯಲ್ಲಿ ನೆಗೆಟೀವ್‌ ಶೇಡ್‌ನ‌ಲ್ಲಿ ಕಾಣಿಸಿ ಕೊಳ್ಳಲಿದ್ದು, ನಾನೇ ನಿರ್ದೇಶನ ಮಾಡಲಿದ್ದೇನೆ. ಈ ಬಗ್ಗೆ ಸಾಕಷ್ಟು ಮಾಹಿತಿಯನ್ನು ಸದ್ಯದಲ್ಲೇ ನೀಡುತ್ತೇನೆ’ ಎಂದು ನಿರ್ದೇಶಕ ರಾಮ್‌ ಪ್ರಸಾದ್‌ ಎಂ.ಡಿ ತಿಳಿಸಿದ್ದಾರೆ.