ಅಯರ್‌ಲ್ಯಾಂಡ್‌ ಕ್ರಿಕೆಟಿಗ  ಮ್ಯಾಕ್ಸ್‌ ಸೊರೆನ್ಸೆನ್‌ ನಿವೃತ್ತಿ

ಡಬ್ಲಿನ್‌: ಅಯರ್‌ಲ್ಯಾಂಡ್‌ ತಂಡದ ಆಲ್‌ರೌಂಡರ್‌ ಮ್ಯಾಕ್ಸ್‌ ಸೊರೆನ್ಸೆನ್‌ ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ವಿದಾಯ ಘೋಷಿಸಿದ್ದಾರೆ. 

31ರ ಹರೆಯದ ಸೊರೆನ್ಸೆನ್‌ ಕಳೆದ ಕೆಲವು ಸಮಯದಿಂದ ಬಲ ಭುಜದ ನೋವಿನಿಂದ ನರಳುತ್ತಿದ್ದು, ಇದರಿಂದ ಸ್ಪರ್ಧಾತ್ಮಕ ಕ್ರಿಕೆಟ್‌ನಲ್ಲಿ ಕಾಣಿಸಿಕೊಳ್ಳಲು ಸಾಧ್ಯವಿಲ್ಲ ಎಂಬ ತೀರ್ಮಾನಕ್ಕೆ ಬಂದಿದ್ದಾರೆ. 

ಜೊಹಾನ್ಸ್‌ಬರ್ಗ್‌ನಲ್ಲಿ ಜನಿಸಿದ ಮ್ಯಾಕ್ಸ್‌ ಸೊರೆನ್ಸೆನ್‌ 2012-16ರ ಅವಧಿಯಲ್ಲಿ ಅಯರ್‌ಲ್ಯಾಂಡ್‌ ಪರ 13 ಏಕದಿನ ಹಾಗೂ 26 ಟಿ-20 ಪಂದ್ಯಗಳನ್ನಾಡಿದ್ದಾರೆ. ಕ್ರಮವಾಗಿ 16 ಹಾಗೂ 26 ವಿಕೆಟ್‌ ಉರುಳಿಸಿದ್ದಾರೆ. 2015ರ ಏಕದಿನ ವಿಶ್ವಕಪ್‌ ಪಂದ್ಯಾವಳಿಯಲ್ಲಿ ಆಡಿದ ಹೆಗ್ಗಳಿಕೆಯೂ ಸೊರೆನ್ಸೆನ್‌ ಪಾಲಿಗಿದೆ. ಗಾಯಾಳು ಟಿಮ್‌ ಮುರ್ತಗ ಬದಲು ಆಡುವ ಅವಕಾಶ ಲಭಿಸಿತ್ತು.

“ದೇಶದ ಪರ ಕ್ರಿಕೆಟ್‌ ಆಡಲು ಅವಕಾಶ ನೀಡಿದ ಅಯರ್‌ಲ್ಯಾಂಡ್‌ ಕ್ರಿಕೆಟ್‌ ಮಂಡಳಿಗೆ ನಾನು ಕೃತಜ್ಞ. ನನ್ನ ಪಾಲಿಗೆ ಇದೊಂದು ಅದ್ಭುತ ಪಯಣ…’ ಎಂದು ಸೊರೆನ್ಸೆನ್‌ ಹೇಳಿದ್ದಾರೆ.