ರಷ್ಯಾದ ವೋಡ್ಕಾಕ್ಕೆ ಅಮೆರಿಕದಲ್ಲಿ ತಿರಸ್ಕಾರ!

ರಷ್ಯಾ ವಿರುದ್ಧ ಅಮೆರಿಕ ಭಾರೀ ನಿರ್ಬಂಧಗಳನ್ನು ಹೇರಿದ್ದರೂ, ವಸ್ತುಸ್ಥಿತಿಯಲ್ಲಿ ಇವಕ್ಕೆಲ್ಲ ತಲೆಕೆಡಿಸಿಕೊಳ್ಳುವ ಸ್ಥಿತಿಯಲ್ಲಿ ರಷ್ಯಾ ಇಲ್ಲ. ಆದರೆ ರಷ್ಯಾವನ್ನು ಹೆದರಿಸಲು ಅಮೆರಿಕದ ಬಾರ್‌ ಮಾಲಿಕರು ಹೊಸತೊಂದು ಮಾರ್ಗವನ್ನು ಕಂಡುಕೊಂಡಿದ್ದಾರೆ.

ಮಿಚಿಗನ್‌ನಲ್ಲಿನ ಬಾರ್‌ ಮಾಲಿಕ ಬಾಬ್‌ ಕ್ವೇ, ತನ್ನ ಬಾರ್‌ನಲ್ಲಿರುವ ಶೆಲ್ಫ್ ಗಳಿಂದ ರಷ್ಯಾದ ವೋಡ್ಕಾ ವನ್ನು ಹೊರಗೆ ಹಾಕಿದ್ದಾರೆ. ಅದರ ಬದಲು ಉಕ್ರೇನಿನ ವೆಕ್ಟರ್‌ ಅನ್ನು ಇಟ್ಟಿದ್ದಾರೆ. ಅದರ ಮೇಲೆ, “ಉಕ್ರೇನನ್ನು ಬೆಂಬಲಿಸಿ’ ಎಂದು ಬರೆದಿದ್ದಾರೆ. ಇದನ್ನು ಫೇಸ್‌ಬುಕ್‌ನಲ್ಲಿ ಬೇರೆ ಹಾಕಿದ್ದಾರೆ.

ಇದರಿಂದ ಉತ್ತೇಜಿತರಾಗಿರುವ ಸಾವಿರಾರು ಮಂದಿ, ಬಾರ್‌ಗಳಲ್ಲಿ ವೆಕ್ಟರ್‌ಗಾಗಿ ಕೇಳುತ್ತಿದ್ದಾರೆ, ವೋಡ್ಕಾ ವನ್ನು ನಿರಾಕರಿಸುತ್ತಿದ್ದಾರೆ. ಸ್ಟೋಲಿ ಎನ್ನುವ ಇನ್ನೊಂದು ಬ್ರಾಂಡ್‌ಗೆ ರಷ್ಯಾ ಮೂಲದ ವ್ಯಕ್ತಿಯೊಬ್ಬರು ಮಾಲಿಕರು. ಆದರೆ ಸ್ಟೋಲಿ ತಯಾರಾಗುವುದು ಲಾಟ್ವಿಯದಲ್ಲಿ! ಹಾಗಿದ್ದರೂ ಸ್ಟೋಲಿ, ಉಕ್ರೇನನ್ನು ಬೆಂಬಲಿಸಲು, ಯೂರೋಪ್‌ನಲ್ಲಿ ಶಾಂತಿ ಕಾಪಾಡಿಕೊಳ್ಳಲು ಕರೆ ನೀಡಿದೆ. ಅಮೆರಿಕದ ಹಲವು ಕಡೆ ಹೀಗೊಂದು ಹೊಸ ಪ್ರಯೋಗ ಶುರುವಾಗಿದೆ.