ತೆಲಂಗಾಣ, ಆಂಧ್ರ ವೆಬ್‌ ಸೈಟ್‌ ಹ್ಯಾಕರ್‌ಗಳಿಂದ 6 ಬಿಟ್‌ ಕಾಯಿನ್‌ ಡಿಮ್ಯಾಂಡ್‌

ಹೈದರಾಬಾದ್‌ : ತೆಲಂಗಾಣ ಮತ್ತು ಆಂಧ್ರ ಪ್ರದೇಶದ ವಿದ್ಯುತ್‌ ಸೌಕರ್ಯಗಳ ವೆಬ್‌ ಸೈಟ್‌ ಹ್ಯಾಕ್‌ ಮಾಡಿರುವ ಹ್ಯಾಕರ್‌ಗಳು, ಈ ವೆಬ್‌ ಸೈಟ್‌ಗಳನ್ನು ಪುನರ್‌ ಸ್ಥಾಪಿಸಲು ತಮಗೆ 6 ಬಿಟ್‌ ಕಾಯಿನ್‌ ಒತ್ತೆಹಣ (ಸುಮಾರು 20 ಲಕ್ಷ ರೂ.) ಕೊಡಬೇಕೆಂದು ಆಗ್ರಹಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ದಕ್ಷಿಣ ವಿದ್ಯುತ್‌ ವಿತರಣೆ ಕಂಪೆನಿಯ (ಎಸ್‌ಪಿಡಿಸಿಎಲ್‌) ನಿರ್ದೇಶಕ ಟಿ ಶ್ರೀನಿವಾಸ್‌ ಅವರು ಮಾಧ್ಯಮದೊಂದಿಗೆ ಮಾತನಾಡುತ್ತಾ, ಹ್ಯಾಕರ್‌ಗಳಿಂದ ಈ ವರೆಗೆ ಯಾವುದೇ ಡೇಟಾ ಕಳವಾಗಿಲ್ಲ; ನಮ್ಮ ಸಂಸ್ಥೆಯ ವೆಬ್‌ ಸೈಟ್‌ ಈಗಲೂ ಮುಕ್ತವಿದೆ; ಉತ್ತರ ವಿದ್ಯುತ್‌ ವಿತರಣ ಕಂಪೆನಿಯ ವೆಬ್‌ ಸೈಟನ್ನು ಪುನರ್‌ ಸ್ಥಾಪಿಸುವ ಕೆಲಸ ಸಾಗುತ್ತಿದೆ ಎಂದು ಹೇಳಿದರು.

“ಸಾಮಾನ್ಯವಾಗಿ ಒತ್ತೆ ಹಣ ಕೇಳುವ ದಾಳಿಕೋರರು ಲಿಂಕ್‌ ಒದಗಿಸುತ್ತಾರೆ. ಇಲ್ಲಿನ ಸಂದರ್ಭದಲ್ಲಿ ಹ್ಯಾಕರ್‌ಗಳು ಯಾವುದೇ ಲಿಂಕ್‌ ಒದಗಿಸಿಲ್ಲ. ಆದರೆ 6 ಬಿಟ್‌ ಕಾಯಿನ್‌ ಒತ್ತೆ ಹಣ ಕೇಳಿದ್ದಾರೆ. ಹಾಗಿದ್ದರೂ ಲಿಂಕ್‌ ಬರುವ ಮೊದಲೇ ನಮ್ಮ ವೆಬ್‌ಸೈಟ್‌ಗಳು ಕಾರ್ಯಾರಂಭ ಮಾಡಿವೆ. ನಾವು ತನಿಖೆ ಮುಂದುವರಿಸುತ್ತಿದ್ದೇವೆ ಎಂದವರು ಹೇಳಿದರು.