ಗುಲಾಲ್‌.ಕಾಮ್‌ ಫ‌ಸ್ಟ್‌ ಕಟ್‌ ರಿಲೀಸ್‌

ಕನ್ನಡದ ಅನೇಕ ಹೊಸಬರ ಚಿತ್ರಗಳು ಈಗ ಬಿಡುಗಡೆಗೆ ಸಜ್ಜಾಗಿವೆ. ಕೆಲವು ಚಿತ್ರಗಳು ಲಾಕ್‌ಡೌನ್‌ನಿಂದಾಗಿ ತಮ್ಮ ಚಿತ್ರಗಳ ಪೋಸ್ಟರ್‌, ಟ್ರೇಲರ್‌, ಸಾಂಗ್‌ ಇತ್ಯಾದಿಗಳನ್ನೆಲ್ಲಾ ಸಾಮಾಜಿಕ ತಾಣದಲ್ಲಿ ಬಿಡುಗಡೆ ಮಾಡುವ ಮೂಲಕ  ಪ್ರಚಾರಕ್ಕೆ ಇಳಿದಿದ್ದಾರೆ. ಆ ಸಾಲಿಗೆ ಈಗ “ಗುಲಾಲ್‌.ಕಾಮ್‌ ‘ ಸಿನಿಮಾವೂ ಸೇರಿದೆ. ಹೌದು, ಗೀತರಚನೆಕಾರ ಶಿವುಜಮಖಂಡಿ ನಿರ್ದೇಶನದ ಈ ಚಿತ್ರದಲ್ಲಿ ಬಿಗ್‌ಬಾಸ್‌ ಖ್ಯಾತಿಯ ದಿವಾಕರ್‌ ಹೀರೋ ಆಗಿದ್ದಾರೆ.

ನೇತ್ರಾ ಅವರಿಗೆ  ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಚಿತ್ರದ ಫ‌ಸ್ಟ್‌ ಕಟ್‌ ಬಿಡುಗಡೆಯಾಗಿದ್ದು, ಎಲ್ಲೆಡೆಯಿಂದಲೂ ಒಳ್ಳೆಯ ಮೆಚ್ಚುಗೆ ಸಿಕ್ಕಿದೆ. ಲಾಕ್‌ಡೌನ್‌ ಇರದೇ ಇದ್ದಿದ್ದರೆ, ಇಷ್ಟೊತ್ತಿಗೆ “ಗುಲಾಲ್‌. ಕಾಮ್‌ ‘ ರಿಲೀಸ್‌ ಆಗುತ್ತಿತ್ತು. ಕೊರೊನಾ  ಸಮಸ್ಯೆಯಿಂದ ಬಿಡುಗಡೆಗೆ ಬ್ರೇಕ್‌ ಬಿದ್ದಿದೆ. ಈಗಾಗಲೇ ಒಂದು ನಿಮಿಷದ ಟ್ರೇಲರ್‌ ಬಿಡುಗಡೆಯಾಗಿರುವುದಷ್ಟೇ ಅಲ್ಲ, ಒಂದು ಹಾಡನ್ನೂ ಕೂಡ ಬಿಡುಗಡೆ ಮಾಡಲಾಗಿದೆ.

“ಕಾಣೋ ಕನಸು ನೂರಾರು, ನನಸಾಗೋದೇ ಮೂರು,  ನಿದ್ದೇಲಿ ಕನಸು ಕಾಣೋರು, ಎದ್ದೇಳಿ ಒಂಚೂರು… ‘ ಎಂಬ ಹಾಡು ಕೇಳಿದವರು ಒಳ್ಳೆಯ ಕಾಮೆಂಟ್‌ ಮಾಡುತ್ತಿದ್ದಾರೆ. ಈ ಚಿತ್ರವನ್ನು ಧನಂಜಯ ಎಚ್‌. ಡಾ.ಗೋಪಾಲಕೃಷ್ಣ ಹವಾಲ್ದಾರ್‌ ನಿರ್ಮಾಣ ಮಾಡಿದ್ದಾರೆ. ಚಿತ್ರದಲ್ಲಿ ತಬಲ  ನಾಣಿ, ಶೋಭರಾಜ್‌, ಮೋಹನ ಜುನೇಜಾ, ಸದಾನಂದ, ಮನು ಪಾಟೀಲ್‌, ಮಲ್ಲು, ಪೂಜಾ ಮೈಸೂರು ಸೇರಿದಂತೆ ಇತರರು ನಟಿಸಿದ್ದಾರೆ