ರಿಟರ್ನ್ಸ್ ಸಲ್ಲಿಸದ ಕಂಪೆ‌ನಿ ಖಾತೆ ಸ್ಥಗಿತಕ್ಕೆ ಸೂಚನೆ

ಹೊಸದಿಲ್ಲಿ: ಅನುತ್ಪಾದಕ ಆಸ್ತಿ ಸಮಸ್ಯೆಯಿಂದ ಬಳಲುತ್ತಿರುವ ಬ್ಯಾಂಕ್‌ಗಳ ನೆರವಿಗೆ ಕೇಂದ್ರ ಸರಕಾರ ಧಾವಿಸಿದೆ. ಆದಾಯ ತೆರಿಗೆ ರಿಟರ್ನ್ಸ್ ಮತ್ತು ವಾರ್ಷಿಕ ಹಣಕಾಸು ವರದಿ ಸಲ್ಲಿಸದ ಸಂಸ್ಥೆಗಳ ಖಾತೆಗಳನ್ನು ಸ್ತಂಭನಗೊಳಿಸುವಂತೆ ಕೇಂದ್ರ ಸರಕಾರ ಆರ್‌ಬಿಐಗೆ ಸೂಚನೆ ನೀಡಿದೆ. ಮಾತ್ರವಲ್ಲದೆ ಎಲ್ಲ ಬ್ಯಾಂಕ್‌ಗಳಿಗೆ ಮತ್ತು ಸಂಸ್ಥೆಗಳಿಗೆ ಈ ಬಗ್ಗೆ ಸುತ್ತೋಲೆ ಹೊರಡಿಸುವಂತೆಯೂ ಸರಕಾರ ಸೂಚಿಸಿದೆ ಎಂದು ಕೇಂದ್ರ ಹಣಕಾಸು ಖಾತೆ ಸಹಾಯಕ ಸಚಿವ ಸಂತೋಷ್‌ ಕುಮಾರ್‌ ಗಂಗ್ವಾರ್‌ ಲೋಕಸಭೆಯಲ್ಲಿ ತಿಳಿಸಿದ್ದಾರೆ.

ಇತ್ತೀಚೆಗಷ್ಟೇ ಕೇಂದ್ರ ಕಾರ್ಪೊರೇಟ್‌ ಸಚಿವಾಲಯ 1,62,618 ಕಂಪೆನಿಗಳನ್ನು ಕಂಪೆನಿಗಳ ನೋಂದಣಿಯಿಂದ ರದ್ದು ಮಾಡಿತ್ತು. ಜತೆಗೆ ಯಾವ ಕಂಪೆನಿಗಳ ನಿರ್ದೇಶಕರು ಹಣಕಾಸು ವರದಿ ಸಲ್ಲಿಸುವಲ್ಲಿ ವಂಚನೆ ಎಸಗಿದ್ದಾರೆ ಎಂಬುದನ್ನೂ ಪತ್ತೆಹಚ್ಚುತ್ತಿದೆ. ಸತತ 3 ವರ್ಷ ವರದಿ ಸಲ್ಲಿಕೆ ಮಾಡದೇ ಇದ್ದರೆ, ಅಂಥ ನಿರ್ದೇಶಕರನ್ನು ಉದ್ದೇಶಪೂರ್ವಕ ಸುಸ್ತಿದಾರರು ಎಂದು ಘೋಷಿಸಲೂ ನಿರ್ಧರಿಸಲಾಗಿದೆ. ಜತೆಗೆ ಅವರನ್ನು ಮತ್ತೆ ಕಂಪೆನಿಯ ನಿರ್ದೇಶಕರನ್ನಾಗಿ ಮಾಡದೇ ಇರಲೂ ಶಿಫಾರಸು ಮಾಡಲಾಗಿದೆ.