ವಿವಿ ಆವರಣದಲ್ಲಿ ಮತ್ತೆ ಗೂಂಡಾಗಿರಿ

ಆನೇಕಲ್‌: ಮಚ್ಚು, ಲಾಂಗು ಹಾಗೂ ಬ್ಯಾಟ್‌ಗಳಿಂದ ಅಟ್ಟಿಸಿಕೊಂಡು ಹೋಗುತ್ತಿರೊ ರೌಡಿಗಳು…ರೌಡಿಗಳ ಅಟ್ಟಹಾಸದಿಂದ ಹಲ್ಲೆಗೆ ಒಳಗಾಗಿರೊ ವಿದ್ಯಾರ್ಥಿಗಳಿಂದ ರಕ್ಷಣೆಗಾಗಿ ಕಾಲೇಜು ಆವರಣದಲ್ಲಿ ಪ್ರತಿಭಟನೆ..

ಇದು ಯಾವುದೋ ಸಿನಿಮಾ ದೃಶ್ಯವಲ್ಲ. ಆನೇಕಲ್‌ನ ಹೃದಯಭಾಗದಲ್ಲಿರುವ ಅಲೆಯನ್ಸ್‌ ವಿವಿಯ ಆವರಣದಲ್ಲಿ ಕಂಡು ದೃಶ್ಯ. ವಿವಿಯನ್ನು ತಮ್ಮ ಕೈವಶ ಮಾಡಿಕೊಳ್ಳಬೇಕೆಂಬ ದಾಯಾದಿಗಳ ಕಲಹದಿಂದ ಇಡೀ ವಿವಿಯ ಆವರಣ ಯುದ್ಧಭೂಮಿಯಾಗಿ ಮಾರ್ಪಟ್ಟಿದೆ.

ಕಳೆದ ಮೂರು ದಿನಗಳಿಂದ ರೌಡಿಗಳ ಅಟ್ಟಹಾಸ ಹೆಚ್ಚಾಗಿದ್ದು, ಕಾಲೇಜು ಆವರಣದಲ್ಲಿ ಮಚ್ಚು ಲಾಂಗುಗಳು ಜಳಪಿಸಿದ್ದು ವಿದ್ಯಾ ಕೇಂದ್ರ ಅಕ್ಷರಶಃ ರಣರಂಗವಾಗಿದೆ. ಇದರಿಂದ ವಿವಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಸಾವಿರಾರು ವಿದ್ಯಾರ್ಥಿಗಳ ಭವಿಷ್ಯ ಡೋಲಾಯಮಾನವಾಗಿದೆ.

ವಿವಿ ಆಡಳಿತ ಮಂಡಳಿಯ ಸೋದರ, ಸೋದರಿಯರಾದ ಮಧುಕರ್‌ ಅಂಗೂರ್‌ ಹಾಗೂ ಶೈಲಜಾ ಚಬ್ಬಿಯ ಅಧಿಕಾರ ದಾಹಕ್ಕೆ ನಡೆಯುತ್ತಿರುವ ಕಾಳಗದಲ್ಲಿ ವಿವಿಯ ಅಮಾಯಕ ವಿದ್ಯಾರ್ಥಿಗಳು ಬಲಿಯಾಗುತ್ತಿದ್ದಾರೆ. ಕಳೆದ ಆರು ತಿಂಗಳಿಂದ ಅಲೆಯನ್ಸ್‌ ವಿವಿ ಕುಲಪತಿಯಾಗಿ ಮಧುಕರ್‌ ಅಂಗೂರ್‌ ಜವಾಬ್ದಾರಿ ತೆಗೆದುಕೊಂಡ ಮೇಲೆ ಪ್ರಶಾಂತವಾಗಿತ್ತು.

ಕಳೆದ ಮೂರು ದಿನಗಳಿಂದ ಮಧುಕರ್‌ ಸಹೋದರಿ ಶೈಲಜಾ ಚಬ್ಬಿ ಹಾಗೂ ಸುದೀರ್‌ ಅಂಗೂರ್‌ ಅಕ್ರಮವಾಗಿ ವಿವಿ ಅವರಣಕ್ಕೆ ರೌಡಿಗಳನ್ನು ಕಳುಹಿಸಿ ಸಿಬ್ಬಂದಿ, ವಿದ್ಯಾರ್ಥಿಗಳ ಮೇಲೆ ಹಲ್ಲೆ ನಡೆಸಿ, ವಿದ್ಯಾರ್ಥಿನಿಯರ ಜತೆ ಅಸಭ್ಯವಾಗಿ ವರ್ತಿಸುತ್ತಿದ್ದರು. ಇದನ್ನು ವಿರೋಧಿ ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸುತ್ತಿದ್ದರೂ ಯಾವುದಕ್ಕೂ ಕ್ಯಾರೆ ಎನ್ನದೆ ಆಡಳಿತ ಮಂಡಳಿ ಕಂಡು ಕಾಣದಂತಿದೆ. ಪೊಲೀಸರಂತೂ ಕಂಡು ಕಾಣದಂತಾಗಿಬಿಟ್ಟಿದ್ದಾರೆ.

ರೌಡಿಗಳ ಅಟ್ಟಹಾಸ: ಸೋಮವಾರ ಸಂಜೆ ವಿವಿ ಆವರಣದಲ್ಲಿ ಹೈಡ್ರಾಮಾ ನಡೆದಿದ್ದು, ರೌಡಿಗಳು ವಿವಿಯಲ್ಲಿನ ವಿದ್ಯಾರ್ಥಿಗಳು ಹಾಗೂ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ್ದು, ದಾಂಧಲೆ ಮಾಡಿದ್ದಾರೆ. ತನ್ಮೂಲಕ ವಿವಿಯನ್ನು ತಮ್ಮ ವಶಕ್ಕೆ ಪಡೆಯಲು ರೌಡಿಸಂ ನಡೆಸುತ್ತಿದ್ದಾರೆ ಎಂದು ಆರೋಪಿಸಲಾಗಿದೆ.

ಪೊಲೀಸರ ನಿರ್ಲಕ್ಷ್ಯ: ಇಷ್ಟೇಲ್ಲ ಘಟನೆ ಪೊಲೀಸರ ಮುಂದೆಯೇ ನಡೆಯುತ್ತಿದ್ದರೂ. ಪೊಲೀಸರು ಮಾತ್ರ ಯಾವುದೇ ಮೂಕಪ್ರೇಕ್ಷಕರಾಗಿದ್ದಾರೆ. ತಮ್ಮ ಮಂದೆಯೇ ಐದಾರು ಕಾರುಗಳಲ್ಲಿ ರೌಡಿಗಳು ವಿವಿಯ ಆವರಣ ಪ್ರವೇಶಿಸಿ ವಿದ್ಯಾರ್ಥಿಗಳು, ಸಿಬ್ಬಂದಿ ಅಟ್ಟಾಡಿಸುತ್ತಿದ್ದರು ಕಾನೂನು ಕ್ರಮ ತೆಗೆದುಕೊಳ್ಳಲು ಹಿಂದೇಟು ಹಾಕುತ್ತಿದ್ದಾರೆ.

ಕೆಲ ಪುಡಿರೌಡಿಗಳು ಪೊಲೀಸರನ್ನು ಕಂಡ ಕಾರುಗಳ ಕೆಳಗೆ ಮಚ್ಚು, ಲಾಂಗುಗಳನ್ನು ಬಿಸಾಡಿದರೆ, ಇನ್ನು ಕೆಲವರು ನೇರವಾಗಿಯೇ ಪೊಲೀಸರ ಎದುರೇ ಮಾರಕಾಸ್ತ್ರಗಳನ್ನು ಹಿಡಿದು ಹಲ್ಲೆಗೆ ಮುಂದಾಗುತ್ತಿದ್ದು, ಪೊಲೀಸರು ಯಾವೊಬ್ಬ ರೌಡಿಗಳನ್ನು ಬಂಧಿಸುವ ಧೈರ್ಯ ಮಾಡಿಲ್ಲ. ರೌಡಿಗಳ ಅಟ್ಟಹಾಸ ತೀವ್ರಗೊಂಡ ಮಾಹಿತಿ ಪಡೆದ ಮಾಧ್ಯಮಗಳು ಕ್ಯಾಮೆರಾ ಸಮೇತ ವಿವಿ ಆವರಣಕ್ಕೆ ಪ್ರವೇಶಿಸಿದಾಗ ಕಾಟಾಚಾರಕ್ಕೆ ಎಂಬಂತೆ ನಾಲ್ಕೈದು ಮಂದಿ ಪುಡಿರೌಡಿಗಳನ್ನು ವಶಕ್ಕೆ  ಪಡೆದರು.

ಟಿಶರ್ಟ್‌ ವಿತರಣೆ: ಕಳೆದ ಎರಡು ವರ್ಷಗಳಿಂದ ಮಧುಕರ್‌ ಅಂಗರೂ ಮತ್ತು ಸಹೋದರಿ ಶೈಲಜಾ ಜಬ್ಬಿ ವಿವಿಯನ್ನು ತಮ್ಮ ವಶಕ್ಕೆ ಪಡೆಯಲು ಪರಸ್ಪರ ಬಹಿರಂಗವಾಗಿಯೇ ಹೊಡೆದಾಟ ಮಾಡಿಕೊಂಡು ಬರುತ್ತಿದ್ದಾರೆ. ಇದಕ್ಕಾಗಿ ಚಾಮರಾಜಪೇಟೆ, ಕಲಾಸಿಪಾಳ್ಯ ಸೇರಿದಂತೆ ನಗರದ ವಿವಿಧ ಠಾಣಾ ವ್ಯಾಪ್ತಿಯ ರೌಡಿಗಳನ್ನು ಇಬ್ಬರು ಕರೆಸುತ್ತಾರೆ. ಇವರಿಗೆ ಸೆಕ್ಯೂರಿಟಿ ಗಾರ್ಡ್‌ಗಳ ಸಮವಸ್ತ್ರ ಕೊಟ್ಟ ವಿವಿಯ ಆವರಣದೊಳಗೆ ಪ್ರವೇಶಿಸುತ್ತಾರೆ ಎಂದು ಮೂಲಗಳು ತಿಳಿಸಿವೆ.