ಗಣೇಶ್‌ ಮೊಗದಲ್ಲಿ ಮುಗುಳು ನಗೆ!

ಗಣೇಶ್‌ ಅಭಿನಯದ “ಮುಗುಳು ನಗೆ’ ಚಿತ್ರದ ಫೋಟೋಗಳನ್ನು ಭದ್ರವಾಗಿ ಕಪಾಟಿನಲ್ಲಿಟ್ಟಿದ್ದ ಚಿತ್ರತಂಡವು, ಇದೀಗ ಅದನ್ನು ಬಿಡುಗಡೆ ಮಾಡಿದೆ. ಅಮೂಲ್ಯ, ಅಪೂರ್ವ, ನಿಖೀತಾ, ಆಶಿತಾ ಜೊತೆಗೆ ಗಣೇಶ್‌ ಇರುವ ಹಲವು ಫೋಟೋಗಳು ಇದೀಗ ಬಿಡುಗಡೆಯಾಗಿದೆ.

ಇದರ ಅರ್ಥ ಇಷ್ಟೇ. ಚಿತ್ರದ ಚಿತ್ರೀಕರಣ ಮುಕ್ತಾಯವಾಗಿ, ಚಿತ್ರದ ಪ್ರಮೋಷನ್‌ ಕೆಲಸಗಳು ಶುರುವಾಗಿದೆ. ಗಣೇಶ್‌ ಅಭಿನಯದ “ಪಟಾಕಿ’ ಚಿತ್ರ ಈ ತಿಂಗಳ ಕೊನೆಯಲ್ಲಿ ಬಿಡುಗಡೆಯಾಗುತ್ತಿದ್ದಂತೆಯೇ, “ಮುಗುಳು ನಗೆ’ಯ ಹಾಡುಗಳು ಬಿಡುಗಡೆಯಾಗಿ ಜೂನ್‌ ಕೊನೆಯ ಹೊತ್ತಿಗೆ ಅಥವಾ ಜುಲೈನಲ್ಲಿ ಬಿಡುಗಡೆಯಾಗಲಿದೆ.

ಸದ್ಯದಲ್ಲೇ ಫೈನಲ್‌ ಆಗಿರುವ ಹಾಡುಗಳನ್ನು ಬಿಡುಗಡೆ ಮಾಡಬೇಕೆಂದು ಚಿತ್ರತಂಡ ಓಡಾಡುತ್ತಿದೆ. ಈ ಚಿತ್ರದಲ್ಲಿ ಗಣೇಶ್‌ ಎದುರು ನಾಲ್ಕೈದು ಹುಡುಗಿಯರಿದ್ದು, ಆ ಪೈಕಿ ಅಮೂಲ್ಯ ಜಾಗಕ್ಕೆ ಅಪೂರ್ವ ಬಂದರೆ, ಭಾವನಾ ಮೆನನ್‌ ಜಾಗಕ್ಕೆ ಅಮೂಲ್ಯ ಬಂದಿದ್ದಾರೆ.  “ಮುಗುಳು ನಗೆ’ ಚಿತ್ರಕ್ಕೆ ಯೋಗರಾಜ್‌ ಭಟ್‌ ಅವರೇ ಕಥೆ, ಚಿತ್ರಕಥೆ, ಸಂಭಾಷಣೆ ಮತ್ತು ಸಾಹಿತ್ಯ ಬರೆಯುವುದರ ಜೊತೆಗೆ ನಿರ್ದೇಶನವನ್ನೂ ಮಾಡುತ್ತಿದ್ದಾರೆ.

ವಿ. ಹರಿಕೃಷ್ಣ ಅವರ ಸಂಗೀತ ಮತ್ತು ಸುಜ್ಞಾನ್‌ ಅವರ ಛಾಯಾಗ್ರಹಣ ಈ ಚಿತ್ರಕ್ಕಿದೆ. “ಲೈಫ‌ು ಇಷ್ಟೇನೇ’ ಚಿತ್ರದ ನಿರ್ಮಾಪಕರಲ್ಲೊಬ್ಬರಾಗಿದ್ದ ಸೈಯ್ಯದ್‌ ಸಲಾಂ ಈ ಚಿತ್ರದ ನಿರ್ಮಾಪಕರು. ಅನಂತ್‌ ನಾಗ್‌, ಅಚ್ಯುತ್‌ ಕುಮಾರ್‌, ರಂಗಾಯಣ ರಘು ಮುಂತಾದವರು ನಟಿಸಿರುವ ಈ ಚಿತ್ರದಲ್ಲಿ ಹಾಡೊಂದರಲ್ಲಿ ಜಗ್ಗೇಶ್‌ ಸಹ ಕಾಣಿಸಿಕೊಂಡಿದ್ದಾರೆ.