ಭಾರತ ಅಥ್ಲೀಟ್ಸ್‌ಗೆ ಒಲಿಂಪಿಕ್ಸ್‌ ಅರ್ಹತೆ ತಪ್ಪುವ ಆತಂಕ; ದ್ಯುತಿ, ಹಿಮಾದಾಸ್‌ ಗೆ ನಿರಾಸೆ

ಹೊಸದಿಲ್ಲಿ: ಮುಂದಿನ ನವೆಂಬರ್‌ ತಿಂಗಳ ಅಂತ್ಯದವರೆಗೆ ಒಲಿಂಪಿಕ್ಸ್‌ ಅರ್ಹತಾ ಅವಧಿಯನ್ನು ವಿಶ್ವ ಅಥ್ಲೆಟಿಕ್ಸ್‌ ಸಂಸ್ಥೆ ಅಮಾನತುಗೊಳಿಸಿದೆ. ಈ ನಿರ್ಧಾರದಿಂದ ಭಾರತೀಯ ಟ್ರ್ಯಾಕ್‌ ಆ್ಯಂಡ್‌ ಫೀಲ್ಡ್‌ ಸ್ಪರ್ಧಿಗಳಿಗೆ ಬಲುದೊಡ್ಡ ಹೊಡೆತ ಬಿದ್ದಂತಾಗಿದೆ.

ಅಥ್ಲೀಟ್ಸ್‌ ಆಯೋಗ, ಕಾಂಟಿನೆಂಟಲ್‌ ಸಂಸ್ಥೆಗಳ ಅಧ್ಯಕ್ಷರು ಮತ್ತು ಕೌನ್ಸಿಲ್‌ನ ಸಲಹೆ ಪಡೆದ ಬಳಿಕ ವಿಶ್ವ ಅಥ್ಲೆಟಿಕ್ಸ್‌ ಏ.6ರಿಂದ ನ.30ರ ನಡುವಣ ಅವಧಿಯನ್ನು ಅಮಾನತುಗೊಳಿಸಲು ನಿರ್ಧರಿಸಿದೆ. ಈ ಅವಧಿಯ ನಡುವೆ ಜರುಗುವ ಯಾವುದೇ ಸ್ಪರ್ಧೆಗಳ ಫ‌ಲಿತಾಂಶವನ್ನು ಟೋಕೊಯೋ ಒಲಿಂಪಿಕ್ಸ್‌ನ ಪ್ರವೇಶ ಗುಣಮಟ್ಟ ಅಥವಾ ವಿಶ್ವ ಶ್ರೇಯಾಂಕಕ್ಕೆ ಪರಿಗಣಿಸುವಂತಿಲ್ಲ ಎಂದು ತಿಳಿಸಿದೆ.

ಈ ಬಗ್ಗೆ ಭಾರತ ತಂಡದ ಉಪ ಮುಖ್ಯ ಕೋಚ್‌ ರಾಧಾಕೃಷ್ಣನ್‌ ನಾಯರ್‌ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ವಿಶ್ವ ಅಥ್ಲೆಟಿಕ್ಸ್‌ ಕೂಟದ ಈ ನಿರ್ಧಾರದಿಂದ ತೇಜಿಂದರ್‌ ಪಾಲ್‌ (ಶಾಟ್‌ಪುಟ್‌), ಅನು ರಾಣಿ (ಜಾವೆಲಿನ್‌), ಶ್ರೀಶಂಕರ್‌ (ಲಾಂಗ್‌ ಜಂಪ್‌) ಮತ್ತು ಅಥ್ಲೀಟ್‌ಗಳಾದ ದ್ಯುತಿ ಚಾಂದ್‌, ಹಿಮಾದಾಸ್‌ಗೆ ಹೊಡೆತ ಬೀಳಲಿದೆ ಎಂದು ಹೇಳಲಾಗಿದೆ