ಕುರಿಗಳಿಗೆ ಸೊಳ್ಳೆ  ಪರದೆಯ ಹೊದಿಕೆ !

ಹೊಸಪೇಟೆ: ಪ್ರಾಣಿಗಳನ್ನು ಸೊಳ್ಳೆ ಕಾಟದಿಂದ ತಪ್ಪಿಸಲು ಕೂಡಾ ಸೊಳ್ಳೆ ಪರದೆ ಕೂಡಾ ಬಳಕೆ ಮಾಡಲಾಗುತ್ತಿದ್ದು, ಕುರಿಗಾಹಿಗಳು ತಮ್ಮ ಕುರಿಗಳನ್ನು ಸೊಳ್ಳೆಯ ಕಾಟದಿಂದ ತಪ್ಪಿಸಲು ಸೊಳ್ಳೆ ಪರದೆ ಬಳಕೆ ಮಾಡುವ ಪದ್ಧತಿ ಆರಂಭಿಸಿದ್ದಾರೆ.

ಹಂಪಿ ಪ್ರದೇಶದ ಅಕ್ಕ-ತಂಗಿಯರ ಗುಂಡಿನ ಬಳಿ ಬೀಡು ಬಿಟ್ಟಿರುವ ಕುರಿಗಾಹಿಗಳು, ಸಾವಿರಾರು ರೂಪಾಯಿ ಖರ್ಚು
ಮಾಡಿ ಕುರಿಗಳಿಗೆ ಸೊಳ್ಳೆ ಪರದೆ ನಿರ್ಮಿಸಿದ್ದಾರೆ.

ಬೆಳಗಾವಿ ಜಿಲ್ಲೆಯಿಂದ ವಲಸೆ ಬಂದು ಹಂಪಿ ಪ್ರದೇಶದಲ್ಲಿ ಬೀಡುಬಿಟ್ಟಿರುವ ಕುರಿಗಾಹಿ ಕುಟಂಬಗಳು ಪರದೆ ಬಳಕೆ ಮಾಡುತ್ತಿದ್ದಾರೆ. ಗುಡ್ಡಗಾಡು ಪ್ರದೇಶದಲ್ಲಿ ತಮ್ಮೊಂದಿಗೆ ಹಗಲಿರುಳು ಜೀವಿಸುತ್ತಿರುವ ಕುರಿಗಳಿಗೆ ಈ ವರ್ಷ ವಿಪರೀತ ಸೊಳ್ಳೆ ಕಾಟವಿದೆ ಎಂಬುದನ್ನು ಅರಿತ ಶಂಕರ, ಲಕ್ಷ್ಮಣ ಹಾಗೂ ಸಹದೇವ ಎಂಬುವರು ಸಾವಿರಾರು ರೂಪಾಯಿ ಖರ್ಚು ಮಾಡಿ ಸೊಳ್ಳೆ ಪರದೆ ನಿರ್ಮಿಸಿದ್ದಾರೆ.

ಸೊಳ್ಳೆ ಕಾಟದಿಂದ ರಾತ್ರಿ ಇಡೀ ನಿದ್ರೆಯಿಲ್ಲದೇ ಕುರಿಗಳು ದಿಕ್ಕುತಪ್ಪಿ ನಡೆದಾಡುತ್ತವೆ. ನಡೆದಾಡಲು ಪರದಾಡುತ್ತಿದ್ದವು.
ಮೊದಲು ನಮಗೆ ಅರಿವಿಗೆ ಬಂದಿರಲಿಲ್ಲ. ಮೈ ತುಂಬ ಕೂದಲು ಇರುವ ಕುರಿಗಳಿಗೆ ಸೊಳ್ಳೆ ಕಚ್ಚಲು ಸಾಧ್ಯವಿಲ್ಲ ಎಂದು ಭಾವಿಸಿದ್ದೇವು. ಹಿರಿಯರ ಸಲಹೆಯಂತೆ ಪ್ರಥಮ ಬಾರಿಗೆ ಕುರಿಗಳಿಗೆ ಸೊಳ್ಳೆ ಪದರೆಯನ್ನು ನಿರ್ಮಿಸಿದ್ದೇವೆ. ಇದರಿಂದ ಅವು ಯಾವುದೇ ಸದ್ದು ಇಲ್ಲದಂತೆ ರಾತ್ರಿ ನಿದ್ರೆ ಮಾಡುತ್ತವೆ. ಇಲ್ಲಿ ಮಾತ್ರವಲ್ಲ ಜಿಲ್ಲಾದ್ಯಂತ ಸಂಚಾರಿ ಕುರಿಗಾಹಿಗಳು ಸೊಳ್ಳೆ ಪರದೆಯಿಂದ ತಮ್ಮ ಕುರಿಗಳಿಗೆ ರಕ್ಷಣೆ ನೀಡುತ್ತಿದ್ದಾರೆ ಎಂದು ಕುರಿಗಾಹಿಗಳು ತಿಳಿಸಿದ್ದಾರೆ.

ಕುರಿಗಳ ಫೋಷಣೆಗೆ ಹಾಗೂ ಅಲೆದಾಡುವ ನಮಗೆ ಈ ವರ್ಷ ಸೊಳ್ಳೆಗಳ ಕಾಟಕ್ಕೆ ಕುರಿಗಳು ಪರದಾಡುತ್ತಿವೆ. ಕುರಿಗಳಿಗೆ ಸೊಳ್ಳೆ ಪರದೆ ಮೂಲಕ ಅವುಗಳಿಗೆ ರಕ್ಷಣೆ ನೀಡಿದ್ದು, ಸೊಳ್ಳೆ ಪರದೆಯೊಳಗೆ ಸುಖವಾಗಿ ಕುರಿಗಳು ನಿದ್ರೆ ಮಾಡುತ್ತಿವೆ.
ಶಂಕರ,ಕುರಿಗಾಹಿ.

ನಮ್ಮ ದೇಶದಲ್ಲಿ ಸೊಳ್ಳೆ ಕಡಿತದಿಂದ ಕುರಿಗಳಿಗೆ ಯಾವುದೇ ಕಾಯಿಲೆ ಬರುವುದಿಲ್ಲ. ಕುರುಡು ನೊಣದಿಂದ ಕುರಿಗಳಿಗೆ ನೀಲಿ ನಾಲಿಗೆ ರೋಗ ಕಾಣಿಸಿಕೊಳ್ಳುತ್ತವೆ. ಸೊಳ್ಳೆ ಕಾಟದಿಂದ ಕುರಿಗಳಿಗೆ ರಾತ್ರಿ ನಿದ್ರೆ ಇಲ್ಲದಂತಾಗಿ ನಿಶಕ್ತಿ ಹೊಂದಬಹುದು. ಸೊಳ್ಳೆ ಪರದೆ ನಿರ್ಮಾಣ ಮಾಡುವುದರಿಂದ ವಿಷ ಜಂತುಗಳ ಹಾವಳಿ ಹಾಗೂ ಕಾಡು ಪ್ರಾಣಿಗಳ ಹಾವಳಿ ಸ್ವಲ್ಪ ಮಟ್ಟಿಗೆ ತಡೆಯಬಹುದು.
ಡಾ| ಬಸವರಾಜ ಬೆಣ್ಣಿ,
ಸಹಾಯಕ ನಿದೇರ್ಶಕರು, ಪಶು ಸಂಗೋಪನಾ ಇಲಾಖೆ.

ಪಿ.ಸತ್ಯನಾರಾಯಣ