Cricket: ಭಾರತ-ಬಾಂಗ್ಲಾ ಧರ್ಮಶಾಲಾ ಟಿ20 ಗ್ವಾಲಿಯರ್‌ಗೆ ಸ್ಥಳಾಂತರ

ಹೊಸದಿಲ್ಲಿ: ಭಾರತ-ಬಾಂಗ್ಲಾದೇಶ ನಡುವೆ ಧರ್ಮಶಾಲಾದಲ್ಲಿ ನಡೆಯಬೇಕಿದ್ದ ಮೊದಲ ಟಿ20 ಪಂದ್ಯವನ್ನು ಗ್ವಾಲಿಯರ್‌ಗೆ ಸ್ಥಳಾಂತರಿಸಲಾಗಿದೆ. ಧರ್ಮಶಾಲಾ ಸ್ಟೇಡಿಯಂನ ಡ್ರೆಸ್ಸಿಂಗ್‌ ರೂಮ್‌ನ ನವೀಕರಣ ಕೆಲಸ ನಡೆಯುತ್ತಿರುವುದೇ ಇದಕ್ಕೆ ಕಾರಣ ಎಂದು ಬಿಸಿಸಿಐ ತಿಳಿಸಿದೆ.

ಈ ಪಂದ್ಯವನ್ನು ಅ. 6ರಂದು ಆಡಲಾಗುವುದು. ಇದು ನೂತನವಾಗಿ ನಿರ್ಮಿಸಲಾದ “ಶ್ರೀಮಂತ್‌ ಮಾಧವರಾವ್‌ ಸಿಂಧಿಯಾ ಕ್ರಿಕೆಟ್‌ ಸ್ಟೇಡಿಯಂ’ನಲ್ಲಿ ನಡೆಯುವ ಮೊದಲ ಅಂತಾರಾಷ್ಟ್ರೀಯ ಪಂದ್ಯವಾಗಲಿದೆ. ಹಾಗೆಯೇ 2010ರ ಫೆ. 24ರಂದು, ಸಚಿನ್‌ ತೆಂಡುಲ್ಕರ್‌ ದಕ್ಷಿಣ ಆಫ್ರಿಕಾ ವಿರುದ್ಧ ದ್ವಿಶತಕ ಬಾರಿಸಿದ ಬಳಿಕ ಗ್ವಾಲಿಯರ್‌ನಲ್ಲಿ ಆಡಲಾಗುವ ಮೊದಲ ಅಂತಾರಾಷ್ಟ್ರೀಯ ಪಂದ್ಯವೂ ಹೌದು.

ಅನಂತರ ಪ್ರವಾಸಿ ಇಂಗ್ಲೆಂಡ್‌ ವಿರುದ್ಧ ನಡೆಯುವ ಮೊದಲೆ ರಡು ಟಿ20 ಪಂದ್ಯಗಳ ತಾಣಗಳೂ ಅದಲು ಬದಲಾಗಿವೆ. ಅದರಂತೆ ಜ. 22ರಂದು ಕೋಲ್ಕತಾದಲ್ಲಿ ಮೊದಲ ಟಿ20 ಹಾಗೂ ಜ. 25ರಂದು ಚೆನ್ನೈಯಲ್ಲಿ 2ನೇ ಟಿ20 ಪಂದ್ಯವನ್ನು ಆಡಲಾಗುವುದು. ಗಣರಾಜ್ಯೋತ್ಸವ ಕಾರ್ಯಕ್ರಮಗಳ ಹಿಂದಿನ ದಿನದ ಭದ್ರತಾ ವ್ಯವಸ್ಥೆಗೆ ಸಂಬಂಧಿಸಿದಂತೆ, ಕೋಲ್ಕತಾ ಪೊಲೀಸ್‌ ಇಲಾಖೆ ಬಂಗಾಲ ಕ್ರಿಕೆಟ್‌ ಮಂಡಳಿಗೆ ಮನವಿ ಮಾಡಿದ ಹಿನ್ನೆಲೆಯಲ್ಲಿ ಈ ಬದಲಾವಣೆ ಸಂಭವಿಸಿದೆ.