ಭಾರೀ ಮಳೆ: ಚಾರ್ಮಾಡಿ ಘಾಟಿ ಸಂಚಾರ ಸ್ಥಗಿತ

ಬೆಳ್ತಂಗಡಿ: ತಾಲೂಕಿನಾದ್ಯಂತ ಭರ್ಜರಿ ಮಳೆಯಾಗಿದ್ದು, ಚಾರ್ಮಾಡಿ ಘಾಟಿ ಸಂಚಾರ ಸ್ಥಗಿತಗೊಂಡಿದೆ. ಮಂಗಳವಾರ ಬೆಳಗ್ಗಿನಿಂದ ಜನತೆ ಸಮಸ್ಯೆಯಲ್ಲಿ ನರಳುವಂತಾಯಿತು. ತಾಲೂಕಿನ ವಿವಿಧೆಡೆ ಉತ್ತಮ ಮಳೆಯಾಗಿದ್ದು, ನದಿ-ತೊರೆಗಳು ತುಂಬಿ ಹರಿಯುತ್ತಿವೆ. ಉಜಿರೆಯಲ್ಲಿ ಚರಂಡಿ ಸಮಸ್ಯೆ ಸೋಮವಾರ ನಿವಾರಿಸಿದ್ದು, ಚರಂಡಿಯಿಂದ ತೆಗೆದು ರಸ್ತೆ ಬದಿಗೆ ಹಾಕಲಾಗಿದ್ದ ಹೂಳು ಮತ್ತೆ ರಸ್ತೆಯಲ್ಲಿ ಹರಿದು ಅಪಾಯಕಾರಿಯಾಗಿ ಕಂಡುಬಂತು. ಸಮಸ್ಯೆ ನಿವಾರಣೆಗಾಗಿ ಕಾರ್ಮಿಕರು ಮತ್ತೆ ರಸ್ತೆಯಿಂದ ಬದಿಗೆ ಹಾಕುವಂತಾಯಿತು.

ರಸ್ತೆಯಲ್ಲೇ ನೀರು
ಉಜಿರೆ ಬಳಿ ನೀರು ಚರಂಡಿಯಲ್ಲಿ ತುಂಬಿ ಸತತ ಐದನೇ ದಿನವೂ ರಸ್ತೆಯಲ್ಲಿ  ಹರಿಯಿತು. ಮಧ್ಯಾಹ್ನ ಬಳಿಕ ಮತ್ತೆ 
ಚರಂಡಿ ಅಳವಡಿಕೆ ಕಾರ್ಯ ಮುಂದುವರಿದಿದೆ. ಸಾರ್ವಜನಿಕರು ಸತತ ಸಮಸ್ಯೆ ಅನುಭವಿಸುವಂತಾಗಿದೆ.

ನದಿಗಳಲ್ಲಿ ನೀರು ಹೆಚ್ಚಳ
ಸೋಮಾವತಿ ಹಾಗೂ ನೇತ್ರಾವತಿ ನದಿಗಳಲ್ಲಿ ಮಂಗಳವಾರವೂ ನೀರಿನ ಹರಿವು ಹೆಚ್ಚಾಗಿದ್ದು ಕಂಡುಬಂತು. ನದಿ – ತೊರೆಗಳಲ್ಲೂ ನೀರಿನ ಹರಿವು ಹೆಚ್ಚಾಗಿದೆ. ಕಕ್ಕಿಂಜೆ ಬಳಿಯ ಕತ್ತರಿಗುಡ್ಡ ರಸ್ತೆ ಕುಸಿಯುವ ಹಂತದಲ್ಲಿದೆ.

ಜಲಪಾತದ ಸೊಬಗು
ಚಾರ್ಮಾಡಿ ಘಾಟಿಯಲ್ಲಿ ಜಲಪಾತಗಳು ಗರಿಗೆದರಿದ್ದು, ಪ್ರಯಾಣಿಕರನ್ನು ಆಕರ್ಷಿಸುತ್ತಿವೆ. ಆದರೆ ನಿರ್ವಹಣ ಕಾಮಗಾರಿ ನಡೆಯಲಿರುವುದರಿಂದ ಕೆಲವು ದಿನ ಪ್ರವಾಸಿಗರು ಕಾಯಬೇಕಾದ ಪರಿಸ್ಥಿತಿ ಉಂಟಾಗಲಿದೆ.