ಮನೆಯಲ್ಲೇ ಕಾರ್ಮಿಕ ದಿನ ಆಚರಿಸಲು ಮನವಿ

ಹುಬ್ಬಳ್ಳಿ: ಮೇ 1ರಂದು ವಿಶ್ವ ಕಾರ್ಮಿಕ ದಿನವನ್ನು ಎಲ್ಲಾ ವಿಭಾಗದ ಕಾರ್ಮಿಕರು ನೌಕರರು ತಮ್ಮ ಮನೆಗಳಲ್ಲಿಯೇ ಆಚರಿಸಲು ಸಿಐಟಿಯು ಕರೆ ನೀಡಿದೆ. ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಬಹಿರಂಗವಾಗಿ ಕಾರ್ಯಕ್ರಮ ಹಾಗೂ ಮೆರವಣಿಗೆ ನಡೆಸಲು ಸಾಧ್ಯವಿಲ್ಲದ ಕಾರಣ ಮನೆಯಲ್ಲಿಯೇ ಆಚರಿಸಬೇಕು. ಶುಭಾಶಯ, ಬೇಡಿಕೆಗಳ ಫಲಕಗಳ ಪ್ರದರ್ಶನ, ಪ್ರಣಾಳಿಕೆ ಓದುವುದು, ಹುತಾತ್ಮ ಸ್ಥಂಬಗಳನ್ನು ರಚಿಸಿ ಗೌರವ ಸಲ್ಲಿಸುವುದು, ಹೋರಾಟದ ಹಾಡುಗಳನ್ನು ಹಾಡುವ ಮೂಲಕ ಮನೆಯಲ್ಲಿಯೇ ಸಾಮಾಜಕ ಅಂತರ ಕಾಯ್ದುಕೊಂಡು ಮಾಸ್ಕ್ ಧರಿಸಿ ಆಚರಣೆ ಮಾಡಬೇಕೆಂದು ಸಿಐಟಿಯು ಜಿಲ್ಲಾ ಸಮಿತಿ ಪ್ರಧಾನ ಕಾರ್ಯದರ್ಶಿ ಮಹೇಶ ಪತ್ತಾರ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.