Mangaluru: ಮಣ್ಣು ಕುಸಿದು ಬಿದ್ದು ಕಾರ್ಮಿಕ ಸಾವು

ಮಂಗಳೂರು: ಒಳಚರಂಡಿ ಕಾಮಗಾರಿ ನಡೆಸುತ್ತಿದ್ದಾಗ ಮಣ್ಣು ಕುಸಿದು ಅದರೊಳಗೆ ಸಿಲುಕಿ ಕಾರ್ಮಿಕಮೋರ್ವ ಮೃತಪಟ್ಟ ಘಟನೆ ಹೊಯಿಗೆಬೈಲ್‌ನಲ್ಲಿ ಸೋಮವಾರ ಸಂಜೆ ಸಂಭವಿಸಿದೆ.

ಪಶ್ಚಿಮ ಬಂಗಾಲದ ಕಮಲ್‌ ಹುಸೇನ್‌ (20) ಮೃತಪಟ್ಟ ಕಾರ್ಮಿಕ. ಜೆಸಿಬಿ ಸಹಿತವಾಗಿ ಮೂವರು ಕಾರ್ಮಿಕರು ಕೆಲಸದಲ್ಲಿ ನಿರತರಾಗಿದ್ದರು. ಒಬ್ಬರು ಸುಮಾರು ಏಳೆಂಟು ಅಡಿ ಆಳದಲ್ಲಿ ಕೆಲಸ ಮಾಡುತ್ತಿದ್ದರು. ಆಗ ಕೆಸರು ಮಣ್ಣು ಕುಸಿದು ಅದರಡಿ ಅವರು ಸಿಲುಕಿದರು. ಅವರನ್ನು ಇತರ ಕಾರ್ಮಿಕರು, ಸ್ಥಳೀಯರು ಮೇಲಕ್ಕೆತ್ತಿ ಆಸ್ಪತ್ರೆಗೆ ಸಾಗಿಸುವಾಗ ದಾರಿ ಮಧ್ಯೆ ಮೃತಪಟ್ಟಿದ್ದಾರೆ.